മഹാരാഷ്ട്ര ഉപമുഖ്യമന്ത്രി അജിത് പവാറിന്റെ മരണത്തിനിടയാക്കിയ വിമാനാപകടത്തിന്റെ ഞെട്ടിപ്പിക്കുന്ന മിനിറ്റുകൾ തിരിച്ചുള്ള വിവരങ്ങൾ സിവിൽ ഏവിയേഷൻ മന്ത്രാലയം പുറത്തുവിട്ടു. രാവിലെ 08.18-ന് ബാരാമതി എയർ ട്രാഫിക് കൺട്രോളുമായി (ATC) VI-SSK എന്ന ചാർട്ടേഡ് വിമാനം ആദ്യമായി ബന്ധപ്പെട്ടത് മുതൽ 08.44-ന് തകർന്നു വീഴുന്നത് വരെയുള്ള നിർണ്ണായക വിവരങ്ങളാണ് ലഭ്യമായിരിക്കുന്നത്. ബാരാമതിയിൽ നിന്ന് 30 നോട്ടിക്കൽ മൈൽ അകലെയായിരിക്കുമ്പോൾ വിമാനം ലാൻഡിംഗിനായി താഴ്ത്താൻ പൈലറ്റിന് നിർദ്ദേശം നൽകിയിരുന്നു. എന്നാൽ പ്രദേശത്തെ ദൃശ്യപരത വെറും 3,000 മീറ്റർ മാത്രമാണെന്നും കാറ്റ് ശാന്തമാണെന്നും എടിസി പൈലറ്റിനെ അറിയിച്ചു.
റൺവേ 11-ലേക്ക് ലാൻഡ് ചെയ്യാനുള്ള ആദ്യ ശ്രമത്തിനിടെ റൺവേ വ്യക്തമായി കാണുന്നില്ലെന്ന് പൈലറ്റുമാർ റിപ്പോർട്ട് ചെയ്തിരുന്നു. ഇതേത്തുടർന്ന് ലാൻഡിംഗ് ഒഴിവാക്കി വിമാനം വീണ്ടും ഉയർത്തുകയും (Go-around) രണ്ടാമതും ലാൻഡിംഗിനായി ശ്രമിക്കുകയും ചെയ്തു. കുറച്ചു നിമിഷങ്ങൾക്കുള്ളിൽ റൺവേ ദൃശ്യമായെന്ന് പൈലറ്റുമാർ മറുപടി നൽകി. 08.43-ന് ലാൻഡിംഗിനുള്ള അന്തിമ അനുമതി എടിസി നൽകിയെങ്കിലും വിമാനത്തിൽ നിന്ന് പിന്നീട് പ്രതികരണമൊന്നും ഉണ്ടായില്ല. കൃത്യം ഒരു മിനിറ്റിനുള്ളിൽ റൺവേയുടെ അരികിൽ വലിയ തീജ്വാലകൾ ഉയർന്നതായാണ് എടിസി രേഖകൾ വ്യക്തമാക്കുന്നത്.
ബാരാമതി വിമാനത്താവളത്തിലെ റൺവേ 11-ന് ഇടതുവശത്തായാണ് വിമാനത്തിന്റെ അവശിഷ്ടങ്ങൾ ചിതറിക്കിടക്കുന്നത്. അജിത് പവാറിനെ കൂടാതെ അദ്ദേഹത്തിന്റെ രണ്ട് സ്റ്റാഫ് അംഗങ്ങൾ, പേഴ്സണൽ സെക്യൂരിറ്റി ഓഫീസർ, രണ്ട് പൈലറ്റുമാർ എന്നിവരടക്കം ആറുപേരും അപകടത്തിൽ കൊല്ലപ്പെട്ടു. ജില്ലാ പരിഷത്ത് തിരഞ്ഞെടുപ്പ് പ്രചാരണത്തിന്റെ ഭാഗമായുള്ള പൊതുയോഗത്തിൽ പങ്കെടുക്കാൻ പോകുന്നതിനിടെയാണ് ഈ ദുരന്തം സംഭവിച്ചത്. അപകടത്തെക്കുറിച്ച് വിശദമായി പഠിക്കാൻ എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ ബ്യൂറോ (AAIB) പ്രത്യേക അന്വേഷണം ആരംഭിച്ചിട്ടുണ്ട്.
