ധാക്ക: ബംഗ്ലാദേശിൽ ഹിന്ദു വിഭാഗത്തിൽപ്പെട്ട മാധ്യമപ്രവർത്തകന് നേരെ ബൈക്കിലെത്തിയ സംഘത്തിന്റെ വെടിയേറ്റു. തലയ്ക്ക് ഗുരുതരമായി പരിക്കേറ്റ ഇദ്ദേഹത്തെ വിദഗ്ധ ചികിത്സയ്ക്കായി ആശുപത്രിയിൽ പ്രവേശിപ്പിച്ചു. രാജ്യത്ത് ഹിന്ദു ന്യൂനപക്ഷങ്ങൾക്കും മാധ്യമപ്രവർത്തകർക്കും നേരെ തുടർച്ചയായി ഉണ്ടാകുന്ന അക്രമങ്ങളുടെ പരമ്പരയിലെ ഏറ്റവും പുതിയ സംഭവമാണിത്.
തിങ്കളാഴ്ച ജോലി കഴിഞ്ഞ് മടങ്ങുന്നതിനിടെയാണ് മാധ്യമപ്രവർത്തകന് നേരെ ആക്രമണം ഉണ്ടായത്. ഹെൽമറ്റ് ധരിച്ചെത്തിയ രണ്ടംഗ സംഘം ഇദ്ദേഹത്തെ തടഞ്ഞുനിർത്തി തലയിലേക്ക് വെടിയുതിർക്കുകയായിരുന്നു. വെടിയേറ്റ ഉടൻ തന്നെ അദ്ദേഹം റോഡിൽ വീഴുകയും അക്രമികൾ വേഗത്തിൽ രക്ഷപ്പെടുകയും ചെയ്തു. നാട്ടുകാരാണ് ഇദ്ദേഹത്തെ ഉടൻ തന്നെ അടുത്തുള്ള ആശുപത്രിയിൽ എത്തിച്ചത്. നിലവിൽ ഇദ്ദേഹത്തിന്റെ നില അതീവ ഗുരുതരമായി തുടരുകയാണ്.
സംഭവത്തിന് പിന്നിലെ കാരണം ഇതുവരെ വ്യക്തമായിട്ടില്ല. ബംഗ്ലാദേശിലെ നിലവിലെ രാഷ്ട്രീയ അസ്ഥിരാവസ്ഥയ്ക്കിടയിൽ ഹിന്ദു സമൂഹത്തിന് നേരെ നടക്കുന്ന ആക്രമണങ്ങളിൽ അന്താരാഷ്ട്ര തലത്തിൽ വലിയ പ്രതിഷേധം ഉയരുന്നുണ്ട്. മാധ്യമപ്രവർത്തകന് നേരെയുള്ള ആക്രമണത്തെ പ്രാദേശിക പത്രപ്രവർത്തക സംഘടനകൾ ശക്തമായി അപലപിച്ചു. കുറ്റവാളികളെ ഉടൻ പിടികൂടണമെന്നും ന്യൂനപക്ഷങ്ങളുടെ സുരക്ഷ ഉറപ്പാക്കണമെന്നും അവർ സർക്കാരിനോട് ആവശ്യപ്പെട്ടു.
