തൃശൂർ : മട്ടത്തൂർ ഗ്രാമപഞ്ചായത്തിൽ ബിജെപി പിന്തുണയോടെ വൈസ് പ്രസിഡന്റ് സ്ഥാനത്തേക്ക് തിരഞ്ഞെടുക്കപ്പെട്ട കോൺഗ്രസിലെ കെ.വി. പ്രസാദ് രാജിവെക്കും. ബിജെപി അംഗങ്ങളുടെ വോട്ടോടെ വൈസ് പ്രസിഡന്റായത് വലിയ രാഷ്ട്രീയ വിവാദമായ സാഹചര്യത്തിലാണ് പാർട്ടി നേതൃത്വത്തിന്റെ കർശന നിർദ്ദേശത്തെത്തുടർന്ന് രാജിവെക്കാൻ തീരുമാനിച്ചത്. മട്ടത്തൂരിൽ ബിജെപിയുമായി ചേർന്ന് ഭരണമുണ്ടാക്കിയത് കോൺഗ്രസിനും യുഡിഎഫിനും വലിയ രാഷ്ട്രീയ തിരിച്ചടിയും നാണക്കേടുമുണ്ടാക്കിയെന്ന് പാർട്ടി വിലയിരുത്തി.
പഞ്ചായത്ത് വൈസ് പ്രസിഡന്റ് തിരഞ്ഞെടുപ്പിൽ യുഡിഎഫ് സ്ഥാനാർത്ഥിയായ കെ.വി. പ്രസാദിന് എട്ട് വോട്ടുകളാണ് ലഭിച്ചത്. യുഡിഎഫിന്റെ ആറ് വോട്ടുകൾക്ക് പുറമെ രണ്ട് ബിജെപി അംഗങ്ങളും പ്രസാദിനെ പിന്തുണയ്ക്കുകയായിരുന്നു. ഇടതുപക്ഷം ഭരിക്കുന്ന പഞ്ചായത്തിൽ ബിജെപിയുമായി ധാരണയുണ്ടാക്കി വൈസ് പ്രസിഡന്റ് സ്ഥാനം നേടിയതിനെതിരെ സിപിഎം രംഗത്തെത്തിയിരുന്നു. കോൺഗ്രസ്-ബിജെപി കൂട്ടുകെട്ട് പരസ്യമായെന്ന ആരോപണവുമായി എൽഡിഎഫ് പ്രതിഷേധം ശക്തമാക്കിയതോടെയാണ് കോൺഗ്രസ് നേതൃത്വം അടിയന്തര ഇടപെടൽ നടത്തിയത്.
ബിജെപിയുടെ ഒരു വോട്ടുപോലും സ്വീകരിച്ച് ഭരണം നടത്താൻ കോൺഗ്രസ് ആഗ്രഹിക്കുന്നില്ലെന്ന് പാർട്ടി നേതൃത്വം വ്യക്തമാക്കി. കെ.വി. പ്രസാദിനോട് ഉടൻ രാജിവെക്കാൻ ഡിസിസി നിർദ്ദേശിക്കുകയായിരുന്നു. മതേതര നിലപാടുകളിൽ വിട്ടുവീഴ്ചയില്ലെന്നും ബിജെപി പിന്തുണയോടെ ലഭിച്ച സ്ഥാനം വേണ്ടെന്നുമാണ് കോൺഗ്രസ് നിലപാട്. വരും ദിവസങ്ങളിൽ കെ.വി. പ്രസാദ് ഔദ്യോഗികമായി രാജി സമർപ്പിക്കും. ഇതോടെ മട്ടത്തൂർ പഞ്ചായത്തിൽ വീണ്ടും തിരഞ്ഞെടുപ്പിനുള്ള കളമൊരുങ്ങും.
