മഹാരാഷ്ട്ര ഉപമുഖ്യമന്ത്രി അജിത് പവാറിന്റെ മരണത്തിന് ഇടയാക്കിയ വിമാനാപകടത്തിൽ സുപ്രീം കോടതിയുടെ മേൽനോട്ടത്തിൽ അന്വേഷണം വേണമെന്ന ആവശ്യവുമായി പ്രതിപക്ഷ നേതാക്കൾ രംഗത്തെത്തി. അപകടത്തിൽ ദുരൂഹതയുണ്ടെന്നും സംഭവത്തെക്കുറിച്ച് സമഗ്രമായ അന്വേഷണം നടത്തണമെന്നും കോൺഗ്രസ് അധ്യക്ഷൻ മല്ലികാർജുൻ ഖർഗെ ആവശ്യപ്പെട്ടു. അജിത് പവാറിന്റേത് അസ്വാഭാവികമായ മരണമാണെന്നും രാജ്യത്തെ പ്രമുഖ നേതാക്കളും കോർപ്പറേറ്റ് ഉദ്യോഗസ്ഥരും നിരന്തരം വിമാനയാത്ര നടത്തുന്നവരാണെന്നിരിക്കെ ഇത്തരം അപകടങ്ങൾ ഗൗരവമായി കാണണമെന്നും അദ്ദേഹം ഡൽഹിയിൽ മാധ്യമങ്ങളോട് പറഞ്ഞു.
അപകടസമയത്തെ മോശം കാലാവസ്ഥയും കാഴ്ചാപരിധിയും മുൻനിർത്തി മുതിർന്ന കോൺഗ്രസ് നേതാവ് ദിഗ്വിജയ് സിംഗും ഗുരുതരമായ ചോദ്യങ്ങൾ ഉന്നയിച്ചു. സാധാരണഗതിയിൽ അഞ്ച് കിലോമീറ്റർ ദൃശ്യപരത ഉണ്ടെങ്കിൽ മാത്രമേ ലാൻഡിംഗിന് അനുമതി നൽകാവൂ എന്നിരിക്കെ, വെറും 3,000 മീറ്റർ മാത്രം കാഴ്ചാപരിധിയുള്ളപ്പോൾ ലാൻഡിംഗിന് എന്തിനാണ് പൈലറ്റിന് അനുമതി നൽകിയതെന്ന് അദ്ദേഹം ചോദിച്ചു. കൂടാതെ, വിമാനം ലാൻഡിംഗിന് രണ്ട് തവണ പരാജയപ്പെട്ടതും അദ്ദേഹം ചൂണ്ടിക്കാട്ടി.
അപകടത്തിൽപ്പെട്ട വിമാനം പ്രവർത്തിപ്പിച്ചിരുന്ന ‘വിഎസ്ആർ വെഞ്ചേഴ്സ്’ (VSR Ventures) എന്ന കമ്പനിയുടെ സുരക്ഷാ മാനദണ്ഡങ്ങളെക്കുറിച്ചും പ്രതിപക്ഷം ആശങ്ക പ്രകടിപ്പിച്ചു. ഇതേ കമ്പനിയുടെ വിമാനം മുൻപും അപകടത്തിൽപ്പെട്ടിട്ടുണ്ടെന്ന് ദിഗ്വിജയ് സിംഗ് ആരോപിച്ചു. തകർന്ന വിമാനത്തിന് ഡിജിസിഎ (DGCA) ക്ലിയറൻസ് നൽകിയതിൽ അപാകതയുണ്ടോ എന്നും അതിന്റെ മെയിന്റനൻസ് ചുമതല ആർക്കായിരുന്നുവെന്നും പ്രത്യേകം അന്വേഷിക്കണമെന്നും അദ്ദേഹം ആവശ്യപ്പെട്ടു.
പശ്ചിമ ബംഗാൾ മുഖ്യമന്ത്രി മമത ബാനർജിയാണ് അപകടത്തിൽ ആദ്യമായി ദുരൂഹത ആരോപിച്ചത്. കേന്ദ്ര ഏജൻസികളിലുള്ള വിശ്വാസം നഷ്ടപ്പെട്ടുവെന്നും അതിനാൽ സുപ്രീം കോടതിയുടെ നേരിട്ടുള്ള മേൽനോട്ടത്തിലുള്ള അന്വേഷണം മാത്രമേ സത്യം പുറത്തുകൊണ്ടുവരികയുള്ളൂ എന്നും അവർ വ്യക്തമാക്കി. അജിത് പവാർ ബിജെപി സഖ്യം വിട്ട് ശരദ് പവാറിനൊപ്പം ചേരാൻ ആലോചിച്ചിരുന്നതായി വിവരമുണ്ടെന്നും ഈ സാഹചര്യത്തിൽ അപകടം അന്വേഷിക്കണമെന്നും മമത ബാനർജി കൂട്ടിച്ചേർത്തു.
ബിജു ജനതാദൾ ഉൾപ്പെടെയുള്ള മറ്റ് പ്രതിപക്ഷ പാർട്ടികളും അന്വേഷണ ആവശ്യവുമായി രംഗത്തെത്തിയിട്ടുണ്ട്. വിമാനാപകടത്തെക്കുറിച്ച് പഠിക്കാൻ എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ ബ്യൂറോ (AAIB) ഇതിനകം അന്വേഷണം ആരംഭിച്ചിട്ടുണ്ടെങ്കിലും, രാഷ്ട്രീയ പ്രത്യാഘാതങ്ങൾ ഭയന്ന് നിഷ്പക്ഷമായ ഒരു അന്വേഷണം വേണമെന്ന ഉറച്ച നിലപാടിലാണ് പ്രതിപക്ഷം.
