തിരുവനന്തപുരം: വെനസ്വേലയ്ക്ക് നേരെ അമേരിക്ക നടത്തുന്ന സൈനിക നീക്കങ്ങളെയും സാമ്രാജ്യത്വ കടന്നുകയറ്റങ്ങളെയും രൂക്ഷമായി വിമർശിച്ച് കേരള മുഖ്യമന്ത്രി പിണറായി വിജയൻ. വെനസ്വേലൻ പ്രസിഡന്റ് നിക്കോളാസ് മഡുറോയ്ക്കും അവിടുത്തെ ജനങ്ങൾക്കും മുഖ്യമന്ത്രി ഐക്യദാർഢ്യം പ്രഖ്യാപിച്ചു. ഒരു സ്വതന്ത്ര രാഷ്ട്രത്തിന്റെ ആഭ്യന്തര കാര്യങ്ങളിൽ കടന്നുകയറാനും അവിടുത്തെ ജനാധിപത്യ സർക്കാരിനെ അട്ടിമറിക്കാനും അമേരിക്ക നടത്തുന്ന ശ്രമങ്ങൾ അപലപനീയമാണെന്ന് അദ്ദേഹം പറഞ്ഞു.
വെനസ്വേലയിലെ എണ്ണസമ്പത്ത് കൈക്കലാക്കാനാണ് അമേരിക്കൻ സാമ്രാജ്യത്വം ഇത്തരം പ്രകോപനങ്ങൾ സൃഷ്ടിക്കുന്നതെന്ന് മുഖ്യമന്ത്രി കുറ്റപ്പെടുത്തി. ഉപരോധങ്ങളിലൂടെയും സൈനിക ഭീഷണികളിലൂടെയും ഒരു രാജ്യത്തെ തകർക്കാൻ ശ്രമിക്കുന്നത് അന്താരാഷ്ട്ര നിയമങ്ങളുടെ ലംഘനമാണ്. വെനസ്വേലൻ ജനതയുടെ അതിജീവന പോരാട്ടം ലോകമെമ്പാടുമുള്ള ജനാധിപത്യ വിശ്വാസികൾക്ക് ആവേശം നൽകുന്നതാണെന്നും അദ്ദേഹം കൂട്ടിച്ചേർത്തു.
സമൂഹമാധ്യമങ്ങളിലൂടെ പുറത്തുവിട്ട പ്രസ്താവനയിൽ, വെനസ്വേലയുടെ പരമാധികാരം സംരക്ഷിക്കാൻ അന്താരാഷ്ട്ര സമൂഹം ഒന്നിച്ചുനിൽക്കണമെന്ന് പിണറായി വിജയൻ ആവശ്യപ്പെട്ടു. സാമ്രാജ്യത്വ വിരുദ്ധ പോരാട്ടങ്ങളിൽ വെനസ്വേലയെ തനിച്ചാക്കില്ലെന്നും കേരളം ആ ജനതയ്ക്കൊപ്പം നിൽക്കുന്നുവെന്നും മുഖ്യമന്ത്രി വ്യക്തമാക്കി. മുൻപും ലാറ്റിൻ അമേരിക്കൻ രാജ്യങ്ങളിലെ ഇടതുപക്ഷ സർക്കാരുകൾക്ക് നേരെ അമേരിക്കൻ ഇടപെടലുകൾ ഉണ്ടായപ്പോൾ സമാനമായ പിന്തുണയുമായി മുഖ്യമന്ത്രി രംഗത്തെത്തിയിരുന്നു.
