തിരുവല്ല: ബലാത്സംഗക്കേസിൽ അറസ്റ്റിലായി റിമാൻഡിൽ കഴിയുന്ന രാഹുൽ മാങ്കൂട്ടത്തിൽ എംഎൽഎയെ നാളെ നേരിട്ട് ഹാജരാക്കാൻ തിരുവല്ല ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി ഉത്തരവിട്ടു. ഇതുസംബന്ധിച്ച് കോടതി പ്രൊഡക്ഷൻ വാറണ്ട് പുറപ്പെടുവിച്ചു. നാളെ രാവിലെ രാഹുലിനെ ഹാജരാക്കാനാണ് പോലീസിന് നൽകിയിരിക്കുന്ന നിർദ്ദേശം.
ഏഴ് ദിവസത്തെ കസ്റ്റഡി ആവശ്യപ്പെട്ട് പോലീസ്
കേസുമായി ബന്ധപ്പെട്ട് കൂടുതൽ തെളിവെടുപ്പുകൾ നടത്തുന്നതിനായി രാഹുലിനെ ഏഴ് ദിവസത്തെ പോലീസ് കസ്റ്റഡിയിൽ വിട്ടുനൽകണമെന്ന് പ്രോസിക്യൂഷൻ കോടതിയിൽ ആവശ്യപ്പെട്ടു. എന്നാൽ, രാഹുലിനെതിരെ ചുമത്തിയിരിക്കുന്ന കുറ്റങ്ങൾ നിലനിൽക്കില്ലെന്നും അദ്ദേഹത്തിന് ഉടൻ ജാമ്യം അനുവദിക്കണമെന്നുമാണ് പ്രതിഭാഗത്തിന്റെ വാദം. അന്വേഷണ ഉദ്യോഗസ്ഥന്റെ റിപ്പോർട്ട് ലഭിക്കാതെ ജാമ്യാപേക്ഷ പരിഗണിക്കാൻ കഴിയില്ലെന്ന് കോടതി വ്യക്തമാക്കി. കസ്റ്റഡി അപേക്ഷയിലും ജാമ്യാപേക്ഷയിലും പ്രതിയെ ഹാജരാക്കിയ ശേഷം നാളെ കോടതി അന്തിമ തീരുമാനമെടുത്തേക്കും.
മാവേലിക്കര ജയിലിൽ ‘തടവുകാരൻ നമ്പർ 26’
നിലവിൽ മാവേലിക്കര സബ് ജയിലിൽ മൂന്നാം നമ്പർ സെല്ലിലാണ് രാഹുൽ കഴിയുന്നത്. ജയിലിൽ പ്രത്യേക പരിഗണനകളൊന്നും നൽകാതെ ഒരു സാധാരണ തടവുകാരനായാണ് അദ്ദേഹത്തെ പാർപ്പിച്ചിരിക്കുന്നത്. സുരക്ഷാ കാരണങ്ങളാൽ സെല്ലിൽ ഒറ്റയ്ക്കാണ് താമസമെന്നും പായയിലാണ് കിടക്കുന്നതെന്നും ജയിൽ അധികൃതർ അറിയിച്ചു. ബലാത്സംഗക്കേസിലാണ് അകപ്പെട്ടതെങ്കിലും താൻ നിരപരാധിയാണെന്നും പുറത്തിറങ്ങിയാൽ കൂടുതൽ ശക്തനായി തിരിച്ചുവരുമെന്നും ജയിലിലേക്ക് കൊണ്ടുപോകുന്നതിനിടെ രാഹുൽ ഉദ്യോഗസ്ഥരോട് പറഞ്ഞതായി റിപ്പോർട്ടുകളുണ്ട്.
യുവതിയുടെ പരാതിയിൽ കുരുക്ക് മുറുകുന്നു
വിദേശത്തുതാമസിക്കുന്ന മലയാളി യുവതി നൽകിയ ബലാത്സംഗ പരാതിയിലാണ് രാഹുൽ ഇപ്പോൾ ജയിലിലായിരിക്കുന്നത്. ശാരീരിക പീഡനത്തിന് പുറമെ ഗർഭഛിദ്രത്തിന് നിർബന്ധിച്ചെന്ന ഗുരുതരമായ ആരോപണവും ഇയാൾക്കെതിരെയുണ്ട്. കേസിൽ നിർണ്ണായകമായ പല തെളിവുകളും ഫോണിൽ നിന്ന് മായ്ച്ചുകളയാൻ രാഹുൽ ശ്രമിച്ചതായും അന്വേഷണ സംഘം കോടതിയെ അറിയിച്ചിട്ടുണ്ട്.
