സോഷ്യൽ മീഡിയയിലൂടെയുള്ള വ്യക്തിഹത്യയെത്തുടർന്ന് കോഴിക്കോട് സ്വദേശി ദീപക് ആത്മഹത്യ ചെയ്ത സംഭവത്തിൽ പ്രതി ഷിംജിത മുസ്തഫയെ പോലീസ് അറസ്റ്റ് ചെയ്തു. ദീപക്കിനെതിരെ സമൂഹമാധ്യമങ്ങളിൽ അപവാദപ്രചാരണം നടത്തിയതിനും ആത്മഹത്യാ പ്രേരണയ്ക്കുമാണ് ഇവർക്കെതിരെ കേസെടുത്തിരിക്കുന്നത്. ദീപക്കിന്റെ ദൃശ്യങ്ങൾ ചിത്രീകരിക്കാൻ ഷിംജിത ഉപയോഗിച്ച മൊബൈൽ ഫോൺ കണ്ടെത്താനുള്ള ശ്രമത്തിലാണ് അന്വേഷണസംഘം. ഇത് ലഭിച്ചാൽ മാത്രമേ ദൃശ്യങ്ങൾ എഡിറ്റ് ചെയ്തിട്ടുണ്ടോ എന്നതടക്കമുള്ള കാര്യങ്ങളിൽ വ്യക്തത ലഭിക്കൂ.
അതേസമയം, ദീപക് തന്നെ ലൈംഗികമായി അധിക്ഷേപിച്ചു എന്ന് യുവതി ആരോപിച്ച സ്വകാര്യ ബസിലെ ജീവനക്കാരുടെ മൊഴി പോലീസ് ഇന്ന് രേഖപ്പെടുത്തും. യുവതിയുടെ ആരോപണങ്ങൾ ശരിയാണോ എന്ന് പരിശോധിക്കുന്നതിന്റെ ഭാഗമായാണ് നടപടി. ബസിലെ സിസിടിവി ദൃശ്യങ്ങൾ പോലീസ് നേരത്തെ വിശദമായി പരിശോധിച്ചിരുന്നു. എന്നാൽ യുവതിയുടെ പരാതി ശരിവെക്കുന്ന തരത്തിലുള്ള യാതൊരു തെളിവുകളും ഈ ദൃശ്യങ്ങളിൽ നിന്ന് കണ്ടെത്താൻ പോലീസിന് കഴിഞ്ഞിട്ടില്ല. ബസിനുള്ളിൽ അത്തരമൊരു അതിക്രമം നടന്നതായി പ്രാഥമിക പരിശോധനയിൽ വ്യക്തമാകാത്തത് യുവതിയുടെ വാദങ്ങളെ പ്രതിരോധത്തിലാക്കുന്നുണ്ട്.
അപമാനിക്കപ്പെട്ടതിലുള്ള മനോവിഷമത്തിലാണ് ദീപക് ജീവനൊടുക്കിയതെന്ന് ബന്ധുക്കൾ ആരോപിക്കുന്നു. യുവതി വീഡിയോ സമൂഹമാധ്യമങ്ങളിൽ പ്രചരിപ്പിച്ചതോടെ ദീപക്കിന് വലിയ രീതിയിലുള്ള സൈബർ ആക്രമണം നേരിടേണ്ടി വന്നിരുന്നു. ഷിംജിതയെ വിശദമായി ചോദ്യം ചെയ്യുന്നതിലൂടെ സംഭവത്തിന് പിന്നിൽ മറ്റാരെങ്കിലും ഉണ്ടോ എന്നും പോലീസ് അന്വേഷിക്കും. ദീപക്കിന്റെ കുടുംബത്തിന്റെ മൊഴി കൂടി രേഖപ്പെടുത്തിയ ശേഷം അന്വേഷണ റിപ്പോർട്ട് വേഗത്തിൽ സമർപ്പിക്കാനാണ് പോലീസ് നീക്കം.
