രാജ്യത്തിന്റെ പ്രതിരോധ ചരിത്രത്തിലെ ഏറ്റവും വലിയ കരാറിന് പച്ചക്കൊടി. 114 റഫാൽ യുദ്ധവിമാനങ്ങൾ വാങ്ങുന്നതിന് പ്രതിരോധ മന്ത്രാലയം അനുമതി നൽകി. മൂന്നര ലക്ഷം കോടി രൂപയിലധികം വിലമതിക്കുന്ന ഈ കരാറിന് പ്രതിരോധമന്ത്രി അധ്യക്ഷനായ ഡിഫൻസ് അക്വിസിഷൻ കൗൺസിൽ (DAC) അംഗീകാരം നൽകിയിരിക്കുകയാണ്. 88 ഒറ്റ സീറ്റ് വിമാനങ്ങളും 26 ഇരട്ട സീറ്റ് വിമാനങ്ങളുമാണ് ഉൾപ്പെടുന്നത്. സ്കാൽപ് മിസൈലുകൾ ഘടിപ്പിച്ച 18 റഫാൽ വിമാനങ്ങൾ ഫ്രഞ്ച് കമ്പനിയായ ദാസോ ഏവിയേഷൻ നേരിട്ട് നിർമിച്ച് നൽകും. ബാക്കി 96 വിമാനങ്ങൾ ഇന്ത്യയിൽ ‘മേക്ക് ഇൻ ഇന്ത്യ’ പദ്ധതിയുടെ ഭാഗമായി ഇന്ത്യൻ കമ്പനികളുടെ പങ്കാളിത്തത്തോടെ നിർമിക്കും.
ഫ്രഞ്ച് പ്രസിഡന്റ് ഇമ്മാനുവൽ മാക്രോയുടെ ഇന്ത്യ സന്ദർശനത്തിന് മുന്നോടിയായാണ് ഈ വൻ ഇടപാടിനുള്ള നീക്കം. പ്രധാനമന്ത്രി അധ്യക്ഷനായ കാബിനറ്റ് കമ്മിറ്റി ഓൺ സെക്യൂരിറ്റി (CCS) അന്തിമ അംഗീകാരം നൽകിയ ശേഷമായിരിക്കും കരാർ ഔദ്യോഗികമാകുക. ഇതിനൊപ്പം നാവികസേനയ്ക്കായി 26 റഫാൽ മറൈൻ വിമാനങ്ങളുടെ ഓർഡറും അനുവദിച്ചിട്ടുണ്ട്. ഇതോടൊപ്പം ബോയിങ് നിർമിക്കുന്ന P-8I ദീർഘദൂര നിരീക്ഷണ വിമാനങ്ങൾ ആറെണ്ണം കൂടി നാവികസേനയ്ക്ക് വാങ്ങാനും അനുമതി ലഭിച്ചു.
ആകെ 3.6 ലക്ഷം കോടി രൂപയിലധികം വിലമതിക്കുന്ന പ്രതിരോധ പദ്ധതികൾക്കാണ് പ്രതിരോധ മന്ത്രാലയം ഇപ്പോൾ അനുമതി നൽകിയിരിക്കുന്നത്. ഇന്ത്യൻ വ്യോമസേനയുടെയും നാവികസേനയുടെയും യുദ്ധശേഷി ഗണ്യമായി വർധിപ്പിക്കുന്നതിനൊപ്പം ആധുനിക സാങ്കേതികവിദ്യയുടെ സ്ഥാനാന്തരവും പ്രാദേശിക നിർമാണവും ലക്ഷ്യമിട്ടുള്ളതാണ് ഈ കരാറുകൾ. ഫ്രാൻസുമായുള്ള പ്രതിരോധ സഹകരണത്തിന്റെ പുതിയ അധ്യായമായി ഇത് കണക്കാക്കപ്പെടുന്നു.
Green Signal to India’s Largest Defence Deal Ever: Approval for 114 Rafale Fighter Jets
