രാജ്യത്ത് വർദ്ധിച്ചുവരുന്ന ഡിജിറ്റൽ അറസ്റ്റ് തട്ടിപ്പുകൾ തടയാൻ ബാങ്കുകൾ ജാഗ്രത പാലിക്കണമെന്ന് സുപ്രീം കോടതി ഉത്തരവിട്ടു. ഉപഭോക്താക്കളുടെ അക്കൗണ്ടുകളിൽ അസ്വാഭാവികമായ വലിയ തുകയുടെ ഇടപാടുകൾ ശ്രദ്ധയിൽപ്പെട്ടാൽ ബാങ്കുകൾ ഉടൻ തന്നെ ബന്ധപ്പെട്ട വ്യക്തിക്ക് മുന്നറിയിപ്പ് നൽകണമെന്ന് ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ച് നിർദ്ദേശിച്ചു. ഇത്തരം തട്ടിപ്പുകളിലൂടെ രാജ്യത്ത് ഇതിനകം 54,000 കോടി രൂപയിലധികം നഷ്ടപ്പെട്ടതായി നിരീക്ഷിച്ച കോടതി, ഇതിനെ വെറുമൊരു വഞ്ചന എന്നതിലുപരി ‘കൊള്ള’യായിട്ടാണ് കണക്കാക്കേണ്ടതെന്ന് വ്യക്തമാക്കി.
തട്ടിപ്പുകാർ പണം കൈമാറാൻ ഉപയോഗിക്കുന്ന ‘മ്യൂൾ അക്കൗണ്ടുകൾ’ തുടങ്ങുന്നതിൽ ബാങ്ക് ഉദ്യോഗസ്ഥർക്ക് പങ്കുണ്ടോ എന്ന് അന്വേഷിക്കാൻ സിബിഐക്ക് കോടതി അനുമതി നൽകി. ഇതിനായി അഴിമതി നിരോധന നിയമപ്രകാരം കേസെടുക്കാൻ സിബിഐക്ക് പ്രത്യേക അനുമതിയുടെ ആവശ്യമില്ലെന്നും കോടതി വ്യക്തമാക്കി. ഇത്തരം അക്കൗണ്ടുകൾ കണ്ടെത്താൻ ആർട്ടിഫിഷ്യൽ ഇന്റലിജൻസ് (AI) ഉൾപ്പെടെയുള്ള ആധുനിക സാങ്കേതികവിദ്യകൾ പ്രയോജനപ്പെടുത്താൻ റിസർവ് ബാങ്കിനോടും (RBI) ആവശ്യപ്പെട്ടിട്ടുണ്ട്.
ഡിജിറ്റൽ അറസ്റ്റ് തട്ടിപ്പുകളിൽ രാജ്യവ്യാപകമായി കേന്ദ്രീകൃത അന്വേഷണം നടത്താൻ സിബിഐയോട് കോടതി ഉത്തരവിട്ടു. കൂടാതെ, തട്ടിപ്പിനായി വ്യാജ സിം കാർഡുകൾ ഉപയോഗിക്കുന്നത് തടയാൻ കേന്ദ്ര സർക്കാർ ഉടൻ ചട്ടങ്ങൾ രൂപീകരിക്കണം. തട്ടിപ്പിനിരയാകുന്നവർക്ക് പണം തിരികെ ലഭിക്കുന്നതിനായി ആർബിഐയും ടെലികോം വകുപ്പും ചേർന്ന് പ്രത്യേക നഷ്ടപരിഹാര പദ്ധതി തയ്യാറാക്കണമെന്നും കോടതി നിർദ്ദേശിച്ചു.
