ഇറാനെതിരായ സൈനിക നീക്കം അമേരിക്കയ്ക്ക് അനായാസം വിജയിക്കാവുന്ന ഒന്നാണെന്നും എന്നാൽ തനിക്ക് യുദ്ധത്തേക്കാൾ സമാധാനപരമായ കരാറിനോടാണ് താൽപ്പര്യമെന്നും യുഎസ് പ്രസിഡന്റ് ഡോണൾഡ് ട്രംപ് വ്യക്തമാക്കി. അമേരിക്കയും ഇറാനും തമ്മിലുള്ള നിർണ്ണായക ചർച്ചകൾ വ്യാഴാഴ്ച ജനീവയിൽ നടക്കാനിരിക്കെയാണ് ട്രംപിന്റെ ഈ പ്രതികരണം. ഇറാൻ വഴങ്ങിയില്ലെങ്കിൽ ആ രാജ്യത്തെ ജനതയ്ക്ക് മോശം ദിനങ്ങളായിരിക്കും കാത്തിരിക്കുന്നതെന്ന കർശന മുന്നറിയിപ്പും ട്രംപ് നൽകിയിട്ടുണ്ട്.
സൈനിക നടപടിക്കെതിരെ പെന്റഗണിലെ മുതിർന്ന ഉദ്യോഗസ്ഥർ രംഗത്തെത്തിയെന്ന തരത്തിലുള്ള മാധ്യമ റിപ്പോർട്ടുകൾ ട്രംപ് പൂർണ്ണമായും തള്ളിക്കളഞ്ഞു. ജോയിന്റ് ചീഫ്സ് ഓഫ് സ്റ്റാഫ് ചെയർമാൻ ജനറൽ ഡാൻ കെയ്ൻ ഉൾപ്പെടെയുള്ളവർ യുദ്ധത്തിനെതിരെ ഉപദേശിച്ചെന്ന വാർത്തകൾ വ്യാജമാണെന്ന് അദ്ദേഹം ട്രൂത്ത് സോഷ്യലിലൂടെ പ്രതികരിച്ചു. യുദ്ധം ആവശ്യമായി വന്നാൽ അമേരിക്കൻ വിജയം സുനിശ്ചിതമാണെന്നാണ് ജനറൽ കെയ്നിന്റെ അഭിപ്രായമെന്നും അദ്ദേഹം വ്യക്തമാക്കി.
അമേരിക്കൻ മാധ്യമങ്ങളായ വാൾ സ്ട്രീറ്റ് ജേണലും ആക്സിയവും ഉൾപ്പെടെയുള്ളവർ ട്രംപിന്റെ അടുത്ത ഉപദേശകർ നയതന്ത്ര ചർച്ചകൾക്ക് കൂടുതൽ സമയം വേണമെന്ന് ആവശ്യപ്പെട്ടതായി റിപ്പോർട്ട് ചെയ്തിരുന്നു. എന്നാൽ ഇത്തരം വാർത്തകളെല്ലാം തള്ളിയ ട്രംപ്, അന്തിമ തീരുമാനം തന്റേതാണെന്ന് വ്യക്തമാക്കി. ഇറാൻ ഭരണകൂടം ഒത്തുതീർപ്പിന് തയ്യാറാകണമെന്നും അല്ലാത്തപക്ഷം കടുത്ത നടപടികൾ നേരിടേണ്ടി വരുമെന്നുമാണ് അമേരിക്കൻ പ്രസിഡന്റിന്റെ നിലപാട്.
