രാജ്യത്തെ റെയിൽവേ വികസനത്തിൽ വൻ കുതിച്ചുചാട്ടം ലക്ഷ്യമിട്ട് കേന്ദ്ര ബജറ്റിൽ ഏഴ് പുതിയ അതിവേഗ റെയിൽ ഇടനാഴികൾ (High-Speed Rail Corridors) പ്രഖ്യാപിച്ചപ്പോൾ കേരളം വീണ്ടും അവഗണിക്കപ്പെട്ടു. വാരണാസി, ഹൈദരാബാദ്, ചെന്നൈ, ബെംഗളൂരു തുടങ്ങിയ പ്രധാന നഗരങ്ങളെ ബന്ധിപ്പിക്കുന്ന പദ്ധതികൾ പ്രഖ്യാപിച്ച ധനമന്ത്രി നിർമല സീതാരാമൻ, കേരളത്തിന്റെ ദീർഘകാല ആവശ്യമായ അതിവേഗ പാതയെക്കുറിച്ച് മൗനം പാലിച്ചു. കൊച്ചി, തിരുവനന്തപുരം തുടങ്ങിയ നഗരങ്ങളെ ദേശീയ അതിവേഗ റെയിൽ ശൃംഖലയുടെ ഭാഗമാക്കുമെന്ന പ്രതീക്ഷയിലായിരുന്ന സംസ്ഥാനത്തിന് വലിയ തിരിച്ചടിയാണ് ഈ പ്രഖ്യാപനം.
സംസ്ഥാന ബജറ്റിൽ കേരളം സ്വന്തമായി പ്രഖ്യാപിച്ച ‘റീജിയണൽ റാപ്പിഡ് ട്രാൻസിറ്റ് സിസ്റ്റം’ (RRTS) പദ്ധതിക്ക് കേന്ദ്ര പിന്തുണ ലഭിക്കുമെന്ന പ്രതീക്ഷയും ഇതോടെ മങ്ങി. സിൽവർ ലൈൻ പദ്ധതിക്ക് പകരമായി സംസ്ഥാന സർക്കാർ മുന്നോട്ടുവെച്ച ഈ പുതിയ പദ്ധതിക്ക് കേന്ദ്ര ബജറ്റിൽ പ്രത്യേക തുകയോ അംഗീകാരമോ ലഭിക്കാത്തത് വരും ദിവസങ്ങളിൽ വലിയ രാഷ്ട്രീയ ചർച്ചകൾക്ക് വഴിവെക്കും. റെയിൽവേ പാത ഇരട്ടിപ്പിക്കലിനും ശബരി റെയിൽവേയ്ക്കും നാമമാത്രമായ തുക മാത്രമാണ് ലഭിച്ചതെന്ന ആക്ഷേപവും ശക്തമാണ്. വരാനിരിക്കുന്ന നിയമസഭാ തെരഞ്ഞെടുപ്പ് മുന്നിൽക്കണ്ട് കേരളത്തിന് വലിയ പരിഗണന ലഭിക്കുമെന്ന് പ്രത്യാശിച്ചവർക്ക് നിരാശയാണ് ഫലം.
അതിവേഗ റെയിൽവേയിൽ അവഗണിച്ചെങ്കിലും, കേരളം ഉൾപ്പെടെയുള്ള നാല് സംസ്ഥാനങ്ങളിൽ ‘അപൂർവ്വ ധാതു ഇടനാഴി’ (Rare Earth Corridor) സ്ഥാപിക്കുമെന്ന പ്രഖ്യാപനം മാത്രമാണ് ആശ്വാസമായത്. വിഴിഞ്ഞം തുറമുഖം കേന്ദ്രീകരിച്ച് ചരക്ക് ഗതാഗതത്തിന് ഇത് ഗുണകരമാകുമെങ്കിലും യാത്രക്കാരുടെ യാത്രാക്ലേശം പരിഹരിക്കുന്നതിനുള്ള പദ്ധതികളെ കേന്ദ്രം തഴഞ്ഞതിനെതിരെ കേരളത്തിൽ നിന്നുള്ള എംപിമാർ പാർലമെന്റിൽ പ്രതിഷേധം രേഖപ്പെടുത്തി. അയൽ സംസ്ഥാനങ്ങളായ തമിഴ്നാടിനും കർണാടകയ്ക്കും അതിവേഗ റെയിൽ പദ്ധതികൾ ലഭിച്ചപ്പോൾ കേരളത്തെ മാത്രം ഒഴിവാക്കിയത് രാഷ്ട്രീയ പ്രേരിതമാണെന്ന ആരോപണം ഉയർന്നു കഴിഞ്ഞു.
