ന്യൂഡൽഹി: വ്യാജവാർത്തകളും വിദ്വേഷ പ്രസംഗങ്ങളും തടയുന്നതിന്റെ ഭാഗമായി സോഷ്യൽ മീഡിയ പ്ലാറ്റ്ഫോമുകൾക്ക് കർശന നിയന്ത്രണങ്ങളുമായി കേന്ദ്ര ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയം. നിയമവിരുദ്ധമെന്ന് സർക്കാർ സംവിധാനങ്ങൾ പറയുന്ന ഉള്ളടക്കം നീക്കം ചെയ്യാനുള്ള സമയപരിധി വെട്ടിക്കുറച്ചും എഐ നിർമ്മിത ഉള്ളടക്കത്തിനടക്കം കർശന നിയന്ത്രണം ഏർപ്പെടുത്തിയും 2021ലെ ഐടി നിയമം ഭേദഗതി ചെയ്ത് ഉത്തരവിറക്കി.
പുതിയ ഐടി നിയമങ്ങൾ പ്രകാരം, ഉപഭോക്താക്കൾ പങ്കുവെക്കുന്ന ഉള്ളടക്കത്തിന്റെ (Content) ഉത്തരവാദിത്തം പ്ലാറ്റ്ഫോമുകൾക്ക് കൂടി ഉണ്ടായിരിക്കുമെന്നാണ് മന്ത്രാലയം വ്യക്തമാക്കുന്നത്.
ഓരോ സോഷ്യൽ മീഡിയ കമ്പനിയും ഇന്ത്യയിൽ പരാതി പരിഹാര ഓഫീസർമാരെ നിയമിക്കണം. ഉപഭോക്താക്കൾ നൽകുന്ന പരാതികളിൽ നിശ്ചിത സമയത്തിനകം നടപടി സ്വീകരിക്കണം.
രാജ്യത്തിന്റെ സുരക്ഷയെയും സമാധാനത്തെയും ബാധിക്കുന്ന തരത്തിലുള്ള വ്യാജവാർത്തകളോ സന്ദേശങ്ങളോ ശ്രദ്ധയിൽപ്പെട്ടാൽ 24 മുതൽ 36 മണിക്കൂറിനുള്ളിൽ അവ നീക്കം ചെയ്യണം.
ഒരു വിവാദ സന്ദേശം ആദ്യം ആരാണ് അയച്ചതെന്ന വിവരം ആവശ്യപ്പെട്ടാൽ അത് സർക്കാരിന് കൈമാറാൻ കമ്പനികൾ ബാധ്യസ്ഥരാണ്.
സ്ത്രീകളുടെ അന്തസ്സിനെ ബാധിക്കുന്ന തരത്തിലുള്ള അശ്ലീല ദൃശ്യങ്ങളോ ഫോട്ടോകളോ റിപ്പോർട്ട് ചെയ്താൽ 24 മണിക്കൂറിനുള്ളിൽ അത് നീക്കം ചെയ്യേണ്ടതുണ്ട്.
സർക്കാരിന്റെ ഈ നീക്കം അഭിപ്രായ സ്വാതന്ത്ര്യത്തിന്മേലുള്ള കടന്നുകയറ്റമാണെന്ന് വിവിധ കോണുകളിൽ നിന്ന് വിമർശനം ഉയരുന്നുണ്ടെങ്കിലും, ഡിജിറ്റൽ ലോകത്തെ സുരക്ഷിതമാക്കാൻ ഇത്തരം നിയന്ത്രണങ്ങൾ അത്യാവശ്യമാണെന്ന നിലപാടിലാണ് കേന്ദ്ര സർക്കാർ.
