കല്പറ്റ: വയനാട് ഉരുൾപൊട്ടൽ ദുരന്തബാധിതർക്കായി സർക്കാർ നിർമ്മിക്കുന്ന പുനരധിവാസ ടൗൺഷിപ്പിലെ വീടുകളുടെ നറുക്കെടുപ്പ് ആരംഭിച്ചു. ആദ്യഘട്ടത്തിൽ പൂർത്തിയാക്കിയ 178 വീടുകൾ ആർക്കൊക്കെയെന്ന് നിശ്ചയിക്കാനാണ് മേപ്പാടിയിൽ വെച്ച് നറുക്കെടുപ്പ് നടത്തുന്നത്. വീടുകളുടെ ഔദ്യോഗികമായ താക്കോൽദാനം ഈ മാസം 25-ന് മുഖ്യമന്ത്രി പിണറായി വിജയൻ നിർവ്വഹിക്കും.
പൂർണ്ണമായും വീട് നഷ്ടപ്പെട്ടവരുടെ പട്ടികയിൽ ഉൾപ്പെട്ട 178 ഗുണഭോക്താക്കൾക്കാണ് ആദ്യഘട്ടത്തിൽ വീട് ലഭിക്കുക. ഏഴ് സെന്റ് സ്ഥലവും രണ്ട് ബെഡ്റൂമുകളോട് കൂടിയ ആയിരം ചതുരശ്ര അടി വീടുമാണ് ഓരോ കുടുംബത്തിനും നൽകുന്നത്. നറുക്കെടുപ്പിലൂടെ വീട് നിശ്ചയിക്കപ്പെട്ട ഉടൻ തന്നെ പട്ടയവും വൈദ്യുതി കണക്ഷനും ഉൾപ്പെടെയുള്ള രേഖകൾ ഗുണഭോക്താക്കൾക്ക് രജിസ്റ്റർ ചെയ്ത് നൽകും. രജിസ്ട്രേഷൻ ഫീസുകൾ പൂർണ്ണമായും സർക്കാർ ഒഴിവാക്കിയിട്ടുണ്ട്.
കല്പറ്റയിലെ എൽസ്റ്റൺ എസ്റ്റേറ്റിലാണ് അത്യാധുനിക സൗകര്യങ്ങളോടെയുള്ള ടൗൺഷിപ്പ് ഒരുങ്ങുന്നത്. ആരോഗ്യ കേന്ദ്രം, കമ്മ്യൂണിറ്റി സെന്റർ, മാർക്കറ്റ് എന്നിവയുൾപ്പെടെയുള്ള സൗകര്യങ്ങൾ മൂന്ന് സോണുകളിലായി നിർമ്മിക്കുന്ന ഈ ടൗൺഷിപ്പിൽ ഉണ്ടാകും. ദുരന്തത്തിൽ കടകളും മറ്റ് ഉപജീവന മാർഗ്ഗങ്ങളും നഷ്ടപ്പെട്ടവർക്ക് സാമ്പത്തിക സഹായം നൽകുന്ന കാര്യവും സർക്കാർ പരിഗണനയിലുണ്ടെന്ന് മന്ത്രി ഒ.ആർ. കേളു അറിയിച്ചു. സ്വന്തമായി ഒരു വീടെന്ന സ്വപ്നം യാഥാർത്ഥ്യമാകുന്നതിന്റെ സന്തോഷത്തിലാണ് ദുരന്തത്തെ അതിജീവിച്ച കുടുംബങ്ങൾ.
