അബ്ദുറഹ്മാൻ രണ്ടത്താണി ഇടതുമുന്നണിയിലേക്ക് മാറുമെന്ന അഭ്യൂഹങ്ങൾക്ക് വിരാമമായി. അദ്ദേഹം മുസ്ലിം ലീഗിൽ തന്നെ തുടരുമെന്ന് ഔദ്യോഗികമായി അറിയിച്ചു. പാണക്കാടെത്തി സാദിഖലി ശിഹാബ് തങ്ങൾ, അബ്ബാസലി ശിഹാബ് തങ്ങൾ, മുനവ്വറലി ശിഹാബ് തങ്ങൾ എന്നിവരുമായി നടത്തിയ കൂടിക്കാഴ്ചയ്ക്ക് ശേഷമാണ് തീരുമാനം വ്യക്തമാക്കിയത്. ഇതോടെ മലപ്പുറം ജില്ലയിലെ എൽഡിഎഫ് സ്ഥാനാർത്ഥി ചർച്ചകളിൽ നിന്ന് രണ്ടത്താണി സ്വപ്നം ഒഴിവായി.
തിരൂരങ്ങാടിയിലോ വള്ളിക്കുന്നിലോ എൽഡിഎഫ് സ്വതന്ത്രനായി രണ്ടത്താണി മത്സരിക്കുമെന്ന് നേരത്തെ വാർത്തകൾ വന്നിരുന്നു. മലപ്പുറം ജില്ലാ സെക്രട്ടറിയേറ്റ് അദ്ദേഹത്തിന്റെ പേര് സംസ്ഥാന നേതൃത്വത്തിന് കൈമാറുകയും ചെയ്തിരുന്നു. എന്നാൽ ലീഗ് നേതൃത്വവുമായുള്ള ചർച്ചകൾക്കൊടുവിൽ പാർട്ടിയിൽ ഉറച്ചുനിൽക്കാൻ അദ്ദേഹം തീരുമാനിക്കുകയായിരുന്നു. യുഡിഎഫിന്റെ വിജയത്തിനായി സജീവമായി രംഗത്തുണ്ടാകുമെന്നും അദ്ദേഹം കൂട്ടിച്ചേർത്തു.
