പത്തനംതിട്ട: കോന്നിയിൽ നടന്ന തെരഞ്ഞെടുപ്പ് കൺവെൻഷനിൽ പ്രസംഗിക്കുന്നതിനിടെ ചോദ്യം ചോദിച്ചയാളോട് രോഷം കാട്ടി മുഖ്യമന്ത്രി പിണറായി വിജയൻ. സംസ്ഥാനത്തിന്റെ അടിസ്ഥാന വികസനങ്ങളെക്കുറിച്ച് മുഖ്യമന്ത്രി സംസാരിച്ചുകൊണ്ടിരിക്കെ സദസ്സിൽ നിന്ന് ഒരാൾ ‘സിഎമ്മേ ഒരു ചോദ്യം’ എന്ന് ഉറക്കെ വിളിച്ചു പറഞ്ഞു. ഇത് കേട്ടയുടൻ പ്രസംഗം നിർത്തിയ മുഖ്യമന്ത്രി, “അത് വീട്ടിൽ പോയി ചോദിച്ചാൽ മതി” എന്ന് മറുപടി നൽകുകയായിരുന്നു. ഈ സംഭവം രാഷ്ട്രീയ വൃത്തങ്ങളിൽ വലിയ ചർച്ചകൾക്ക് തുടക്കമിട്ടിരിക്കുകയാണ്.
തെരഞ്ഞെടുപ്പ് പ്രചാരണ വേളയിൽ മുഖ്യമന്ത്രി നടത്തുന്ന രണ്ടാമത്തെ വിവാദ പരാമർശമാണിത്. നേരത്തെ അമ്പലപ്പുഴയിലെ സ്വതന്ത്ര സ്ഥാനാർത്ഥി ജി. സുധാകരന്റെ നിലപാടിനെ ‘ചെറ്റത്തരം’ എന്ന് മുഖ്യമന്ത്രി വിശേഷിപ്പിച്ചത് വലിയ വിവാദമായിരുന്നു. മനോരമ ന്യൂസിന് നൽകിയ അഭിമുഖത്തിലാണ് സുധാകരനെതിരെ മുഖ്യമന്ത്രി ആഞ്ഞടിച്ചത്. ഈ പ്രയോഗത്തിനെതിരെ ജി. സുധാകരൻ തന്നെ പിന്നീട് രംഗത്തെത്തുകയും, ‘ചെറ്റ’ എന്നത് പാവപ്പെട്ടവന്റെ പ്രതീകമാണെന്നും അത് കേട്ടതിൽ അഭിമാനമുണ്ടെന്നും തിരിച്ചടിക്കുകയും ചെയ്തിരുന്നു.
കോന്നിയിലെ സംഭവത്തിന് പിന്നാലെ പ്രതിപക്ഷ നേതാക്കളും മുഖ്യമന്ത്രിക്കെതിരെ രംഗത്തെത്തിയിട്ടുണ്ട്. പഴയ ‘പരനാറി’, ‘നികൃഷ്ട ജീവി’ പ്രയോഗങ്ങളുടെ തുടർച്ചയായാണ് മുഖ്യമന്ത്രിയുടെ ഈ പുതിയ ശൈലിയെന്ന വിമർശനം ശക്തമായിട്ടുണ്ട്. എന്നാൽ, വികസന ചർച്ചകൾക്കിടയിൽ ബോധപൂർവ്വം തടസ്സമുണ്ടാക്കാൻ ശ്രമിച്ചതിനെയാണ് മുഖ്യമന്ത്രി എതിർത്തതെന്ന് ഇടത് നേതാക്കൾ വിശദീകരിക്കുന്നു. വരും ദിവസങ്ങളിൽ പ്രചാരണ രംഗത്ത് ഈ വിഷയം സജീവമായി ചർച്ച ചെയ്യപ്പെടാൻ സാധ്യതയുണ്ട്.
