രാഷ്ട്രീയ പാർട്ടികൾക്ക് അയച്ച ഔദ്യോഗിക ഇമെയിലിലെ കത്തിൽ ബിജെപി കേരള ഘടകത്തിന്റെ സീൽ പതിഞ്ഞ സംഭവത്തിൽ വിശദീകരണവുമായി മുഖ്യ തിരഞ്ഞെടുപ്പ് ഓഫീസർ ഡോ. രത്തൻ യു. ഖേൽക്കർ. ഇത് തികച്ചും സാങ്കേതികമായ ഒരു ക്ലെറിക്കൽ പിശക് മാത്രമാണെന്നും അശ്രദ്ധമൂലം സംഭവിച്ചതാണെന്നും കമ്മീഷൻ സമ്മതിച്ചു. സ്ഥാനാർത്ഥികളുടെ ക്രിമിനൽ പശ്ചാത്തലം സംബന്ധിച്ച മാർഗ്ഗനിർദ്ദേശങ്ങളിൽ വ്യക്തത തേടി ബിജെപി നൽകിയ അപേക്ഷയിലെ കത്തിന്റെ പകർപ്പാണ് മറ്റ് പാർട്ടികൾക്കും അയച്ചുപോയതെന്ന് അധികൃതർ വ്യക്തമാക്കി.
സംഭവം വലിയ രാഷ്ട്രീയ വിവാദത്തിന് വഴിവെച്ചിരിക്കുകയാണ്. ബിജെപിയും തിരഞ്ഞെടുപ്പ് കമ്മീഷനും ഒരേ സീലാണോ ഉപയോഗിക്കുന്നതെന്ന് എക്സിലൂടെ സിപിഎം ചോദിച്ചു. കമ്മീഷൻ ബിജെപിയുടെ ഏജന്റായി പ്രവർത്തിക്കുകയാണെന്നും ദേശീയതലത്തിൽ ഉയരുന്ന ആരോപണങ്ങൾ ശരിവെക്കുന്നതാണ് ഈ സംഭവമെന്നും സിപിഎം കുറ്റപ്പെടുത്തി. മാർച്ച് 21-ന് തന്നെ പിശക് ശ്രദ്ധയിൽപ്പെട്ട ഉടൻ കത്ത് പിൻവലിച്ച് എല്ലാ പാർട്ടികൾക്കും ജില്ലാ കളക്ടർമാർക്കും പുതിയ അറിയിപ്പ് നൽകിയിരുന്നുവെന്ന് കമ്മീഷൻ മറുപടി നൽകി.
ക്ലെറിക്കൽ പിഴവ് ഉയർത്തിക്കാട്ടി തെറ്റായ പ്രചാരണങ്ങൾ നടത്തുന്നത് ഒഴിവാക്കണമെന്ന് മുഖ്യ തിരഞ്ഞെടുപ്പ് ഓഫീസർ ആവശ്യപ്പെട്ടു. തിരഞ്ഞെടുപ്പ് പ്രക്രിയയിൽ പുറത്തുനിന്നുള്ള ഇടപെടലുകൾ അസാധ്യമാണെന്നും പഴുതടച്ച സംവിധാനമാണ് കമ്മീഷൻ ഒരുക്കിയിട്ടുള്ളതെന്നും അദ്ദേഹം കൂട്ടിച്ചേർത്തു. വിവാദത്തിന് പിന്നാലെ നിഷ്പക്ഷത ഉറപ്പാക്കാനുള്ള നടപടികൾ ശക്തമാക്കാനാണ് കമ്മീഷന്റെ തീരുമാനം.
