ജമ്മു കശ്മീർ മുൻ മുഖ്യമന്ത്രി ഫറൂഖ് അബ്ദുള്ളയും ഉപമുഖ്യമന്ത്രി സുരേന്ദ്ര ചൗധരിയും പങ്കെടുത്ത വിവാഹ ചടങ്ങിനിടെ വെടിവെപ്പ്. ജമ്മുവിലെ ഗ്രേറ്റർ കൈലാഷ് മേഖലയിൽ ബുധനാഴ്ച രാത്രി പത്തരയോടെയാണ് സംഭവം നടന്നത്. പാർട്ടിക്കാരന്റെ മകന്റെ വിവാഹത്തിൽ പങ്കെടുത്ത ശേഷം പുറത്തിറങ്ങവെയാണ് ഇരുവരുടെയും നേർക്ക് വെടിയുതിർത്തത്. അക്രമി മദ്യലഹരിയിലായിരുന്നുവെന്നും സുരക്ഷാ ഉദ്യോഗസ്ഥരുടെ സമയോചിതമായ ഇടപെടൽ മൂലമാണ് വലിയൊരു അപകടം ഒഴിവായതെന്നും പോലീസ് അറിയിച്ചു.
തന്റെ പിതാവ് തലനാരിഴയ്ക്കാണ് രക്ഷപ്പെട്ടതെന്നും ഇതൊരു വധശ്രമമാണെന്നും ജമ്മു കശ്മീർ മുഖ്യമന്ത്രി ഒമർ അബ്ദുള്ള പ്രതികരിച്ചു. അതീവ സുരക്ഷയുള്ള മുൻ മുഖ്യമന്ത്രിയുടെ തൊട്ടടുത്തെത്തി വെടിയുതിർക്കാൻ ഒരാൾക്ക് എങ്ങനെ സാധിച്ചു എന്നത് ഗൗരവകരമായ കാര്യമാണെന്നും അദ്ദേഹം എക്സിൽ കുറിച്ചു. സുരക്ഷാ ഉദ്യോഗസ്ഥർ തോക്ക് തട്ടിമാറ്റിയതിനാലാണ് ഫറൂഖ് അബ്ദുള്ള പരിക്കേൽക്കാതെ രക്ഷപ്പെട്ടത്. സുരക്ഷാ വീഴ്ചയെക്കുറിച്ച് വിശദമായ അന്വേഷണം നടത്താൻ സർക്കാർ ഉത്തരവിട്ടു.
വെടിയുതിർത്ത കമൽ സിംഗ് ജംവാൾ എന്നയാളെ പോലീസ് സ്ഥലത്തുവെച്ചുതന്നെ പിടികൂടി. ഇയാളെ നിലവിൽ ചോദ്യം ചെയ്തുവരികയാണ്. വെടിവെപ്പിൽ ആർക്കും പരിക്കേറ്റിട്ടില്ലെങ്കിലും ഉപമുഖ്യമന്ത്രി സുരേന്ദ്ര ചൗധരിക്ക് വെടിയുണ്ടയുടെ ചില്ല് തെറിച്ച് ചെറിയ പോറലേറ്റതായി ചില റിപ്പോർട്ടുകൾ സൂചിപ്പിക്കുന്നു. സംഭവത്തിന് പിന്നിൽ വ്യക്തിപരമായ കാരണങ്ങളാണോ അതോ രാഷ്ട്രീയ ഗൂഢാലോചനയുണ്ടോ എന്ന് പോലീസ് പരിശോധിക്കുന്നുണ്ട്. ജമ്മുവിലെ സുരക്ഷാ ക്രമീകരണങ്ങൾ ശക്തമാക്കാൻ ഡിജിപി നിർദ്ദേശം നൽകി.
