അമേരിക്കൻ-ഇസ്രായേൽ സംയുക്ത ആക്രമണത്തിൽ കൊല്ലപ്പെട്ട ഇറാന്റെ പരമോന്നത നേതാവ് ആയത്തുള്ള അലി ഖമനേയിയുടെ വധത്തിൽ ഇന്ത്യ ഔദ്യോഗികമായി അനുശോചനം രേഖപ്പെടുത്തി. വിദേശകാര്യ സെക്രട്ടറി വിക്രം മിസ്രി ഡൽഹിയിലെ ഇറാൻ എംബസി സന്ദർശിച്ച് കേന്ദ്ര സർക്കാരിന് വേണ്ടിയുള്ള അനുശോചനം അറിയിക്കുകയും അനുശോചന പുസ്തകത്തിൽ ഒപ്പിടുകയും ചെയ്തു. ഖമനേയി വധത്തിൽ ഇന്ത്യ പുലർത്തിയ മൗനത്തെ പ്രതിപക്ഷം രൂക്ഷമായി വിമർശിച്ചതിന് പിന്നാലെയാണ് ഈ നയതന്ത്ര നീക്കം. എന്നാൽ, ഇറാന്റെ തിരിച്ചടിയെത്തുടർന്ന് സമുദ്രമേഖലയിൽ 38 കപ്പലുകളും ആയിരക്കണക്കിന് നാവികരും കുടുങ്ങിക്കിടക്കുന്നത് വലിയ ആശങ്കയ്ക്ക് കാരണമായിട്ടുണ്ട്.
പശ്ചിമേഷ്യൻ സംഘർഷങ്ങളിൽ പ്രധാനമന്ത്രി നരേന്ദ്ര മോദി തുടരുന്ന നിശബ്ദത രാജ്യത്തിന്റെ പ്രതിച്ഛായയ്ക്ക് കളങ്കമാണെന്ന് കോൺഗ്രസ് ആരോപിച്ചു. അമേരിക്കയ്ക്കും ഇസ്രായേലിനും മുന്നിൽ കീഴടങ്ങുന്ന നയമാണ് കേന്ദ്ര സർക്കാരിന്റേതെന്നും പ്രധാനമന്ത്രി മറ്റുള്ളവരുടെ പാവയായി മാറിയെന്നും കോൺഗ്രസ് നേതാവ് പവൻ ഖേര കുറ്റപ്പെടുത്തി. അതിഥിയെ വിളിച്ചുവരുത്തി അപമാനിക്കുന്ന രീതിയിലാണ് ഇന്ത്യയുടെ നിലപാടുകളെന്നും, വിദേശകാര്യ മന്ത്രിയും പെട്രോളിയം മന്ത്രിയും വിഷയം ഗൗരവമായി കാണുന്നില്ലെന്നും പ്രതിപക്ഷം വിമർശിച്ചു.
