ദുബായ്: ഇസ്രയേലും അമേരിക്കയും സംയുക്തമായി ഇറാനെ ആക്രമിക്കുന്നതിനിടെ ദുബായിലെ അമേരിക്കന് കോണ്സുലേറ്റിന് നേര്ക്ക് ഇറാന്റെ ഡ്രോണ് ആക്രമണം. ഇന്ത്യന് സമയം ചൊവ്വാഴ്ച അര്ധരാത്രിയോടെയുണ്ടായ ഡ്രോണ് ആക്രമണത്തില് കോണ്സുലേറ്റിന് സമീപത്ത് തീപിടിത്തം ഉണ്ടായതായാണ് റിപ്പോര്ട്ട്. സംഭവത്തില് ആര്ക്കും പരിക്കേറ്റിട്ടില്ലെന്ന് ദുബായ് ഭരണകൂടം അറിയിച്ചു.
ആക്രമണത്തെ പ്രതിരോധിച്ചെന്ന് യുഎഇ സര്ക്കാര് വ്യക്തമാക്കി. കെട്ടിടത്തില് ഡ്രോണ് പതിച്ചെന്നും എന്നാല് യുഎസ് ഉദ്യോഗസ്ഥരെല്ലാം സുരക്ഷിതരാണെന്നും യുഎസ് സ്റ്റേറ്റ് സെക്രട്ടറി മാര്ക് റൂബിയോ വ്യക്തമാക്കി. വലിയ സ്ഫോടനശബ്ദം കേട്ടതായും തൊട്ടുപിന്നാലെ കോണ്സുലേറ്റിന് സമീപം തീജ്വാലകള് കണ്ടതായും എഎഫ്പി റിപ്പോര്ട്ട് ചെയ്തു. സംഘര്ഷം ആരംഭിച്ചതോടെ ദുബായിയും മറ്റ് ഗള്ഫ് നഗരങ്ങളും കനത്ത ആക്രമണ ഭീഷണിയിലാണ്. സൗദിയിലെ എല്ലാ കോണ്സുലാര് സേവനങ്ങളും നിര്ത്തിവെക്കാന് യുഎസ് ഭരണകൂടം നിര്ദേശിച്ചിരുന്നു്.
ഇനിയൊരു അറിയിപ്പ് ഉണ്ടാകുന്നതുവരെ എംബസി സന്ദര്ശനങ്ങള് ഒഴിവാക്കണം. യുഎസ് പൗരന്മാര് സുരക്ഷിത കേന്ദ്രങ്ങളില് തന്നെ തുടരണമെന്നും യുഎസ് അധികൃതര് നിര്ദേശിച്ചിട്ടുണ്ട്. റിയാദിലെ എംബസി ആക്രമണത്തിന് ശക്തമായ മറുപടി നല്കുമെന്ന് കഴിഞ്ഞ ദിവസം പ്രസിഡന്റ് ട്രംപ് വ്യക്തമാക്കിയിയരുന്നു.
Iran drone attack on US consulate in Dubai
