അമേരിക്കയും ഇസ്രയേലും സംയുക്തമായി നടത്തുന്ന ആക്രമണങ്ങൾക്ക് മുന്നിൽ ഇറാൻ കീഴടങ്ങില്ലെന്ന് പ്രസിഡന്റ് മസൂദ് പെസെഷ്കിയാൻ പ്രഖ്യാപിച്ചു. സംഘർഷം ഒൻപതാം ദിവസത്തിലേക്ക് കടക്കവെയാണ് രാജ്യത്തിന്റെ ഉറച്ച നിലപാട് അദ്ദേഹം വ്യക്തമാക്കിയത്. ഇറാന്റെ പരമോന്നത നേതാവ് ആയത്തൊള്ള അലി ഖമനേയിയെ വധിച്ചതിന് അമേരിക്കൻ പ്രസിഡന്റ് ഡോണൾഡ് ട്രംപ് വലിയ വില കൊടുക്കേണ്ടി വരുമെന്ന് ഇറാന്റെ സുരക്ഷാ കൗൺസിൽ മേധാവി അലി ലരിജാനിയും മുന്നറിയിപ്പ് നൽകി. തങ്ങളുടെ നേതാവിന്റെയും ജനങ്ങളുടെയും രക്തത്തിന് നിഷ്ഠുരമായി പകരം വീട്ടുമെന്നും അദ്ദേഹം സോഷ്യൽ മീഡിയയിലൂടെ വ്യക്തമാക്കി.
ഔദ്യോഗിക ടിവി ചാനലിന് നൽകിയ അഭിമുഖത്തിൽ ട്രംപിനെതിരെ കടുത്ത ഭാഷയിലാണ് ലരിജാനി വിമർശനം ഉന്നയിച്ചത്. ഖമനേയിയെ കൊലപ്പെടുത്തിയതിനും ആയിരത്തിലധികം ഇറാൻ പൗരന്മാരെ രക്തസാക്ഷികളാക്കിയതിനും ട്രംപിനെ വെറുതെ വിടില്ലെന്ന് അദ്ദേഹം പറഞ്ഞു. ഐആർജിസിയുടെ മുൻ കമാൻഡർ കൂടിയായ ലരിജാനി, ഖമനേയിയുടെ ഏറ്റവും അടുത്ത അനുയായി ആയാണ് അറിയപ്പെടുന്നത്. ഫെബ്രുവരി 28-ന് നടന്ന വ്യോമാക്രമണത്തിലാണ് ഖമനേയി കൊല്ലപ്പെട്ടത് എന്ന വാർത്തകൾക്ക് പിന്നാലെ ഇറാൻ സൈന്യം തിരിച്ചടിക്കാനൊരുങ്ങുന്നതിന്റെ സൂചനയാണിത്.
നിലവിൽ ടെഹ്റാനിലും പരിസര പ്രദേശങ്ങളിലും യുഎസ്-ഇസ്രയേൽ സഖ്യം ആക്രമണം ശക്തമാക്കിയിരിക്കുകയാണ്. എന്നാൽ ഒരു പ്രകോപനത്തിനും വഴങ്ങില്ലെന്നും രാജ്യത്തിന്റെ പരമാധികാരം സംരക്ഷിക്കാൻ ഏതറ്റം വരെയും പോകുമെന്നും ഇറാൻ ഭരണകൂടം ആവർത്തിച്ചു. പശ്ചിമേഷ്യയിൽ യുദ്ധം പടരുന്ന സാഹചര്യത്തിൽ അന്താരാഷ്ട്ര സമൂഹം ആശങ്കയോടെയാണ് ഈ നീക്കങ്ങളെ നോക്കിക്കാണുന്നത്. വരും ദിവസങ്ങളിൽ ഇറാന്റെ ഭാഗത്തുനിന്ന് വലിയ സൈനിക നീക്കങ്ങൾ ഉണ്ടായേക്കാമെന്നാണ് പ്രതിരോധ വിദഗ്ധർ വിലയിരുത്തുന്നത്.
