നിയമസഭാ തിരഞ്ഞെടുപ്പിൽ മത്സരിക്കാൻ സീറ്റ് ലഭിക്കാത്തതിനെത്തുടർന്ന് പാർട്ടി വിടുമെന്ന അഭ്യൂഹങ്ങൾ തള്ളി കെ. സുധാകരൻ എംപി രംഗത്തെത്തി. കോൺഗ്രസ് ഹൈക്കമാൻഡിന്റെ തീരുമാനത്തോട് പൂർണ്ണമായും സഹകരിക്കുമെന്നും പാർട്ടിയെ വെല്ലുവിളിച്ച് എങ്ങോട്ടും പോകാനില്ലെന്നും അദ്ദേഹം വ്യക്തമാക്കി. എഐസിസി അധ്യക്ഷൻ മല്ലികാർജ്ജുൻ ഖർഗെയും സംഘടനാ ജനറൽ സെക്രട്ടറി കെ.സി. വേണുഗോപാലും സുധാകരനുമായി നേരിട്ട് സംസാരിച്ചതോടെയാണ് മണിക്കൂറുകൾ നീണ്ട രാഷ്ട്രീയ അനിശ്ചിതത്വത്തിന് വിരാമമായത്. പാർട്ടി നയങ്ങൾക്കൊപ്പം നിൽക്കണമെന്ന ഖർഗെയുടെ നിർദ്ദേശം അദ്ദേഹം അംഗീകരിക്കുകയായിരുന്നു.
ഡൽഹിയിൽ നടന്ന തിരക്കിട്ട ചർച്ചകൾക്കൊടുവിൽ മാധ്യമങ്ങളെ കണ്ട സുധാകരൻ, താൻ ഇപ്പോഴും കോൺഗ്രസിനുള്ളിൽ തന്നെയാണെന്നും അച്ചടക്കമുള്ള പ്രവർത്തകനായി തുടരുമെന്നും അറിയിച്ചു. പാർട്ടിയുടെ നന്മയ്ക്ക് വേണ്ടിയാണ് ഹൈക്കമാൻഡ് ഇത്തരമൊരു തീരുമാനമെടുത്തതെങ്കിൽ അതിനെ മാനിക്കുന്നു. തന്നെ പിന്തുണയ്ക്കുന്നവർ എല്ലായിടത്തും ഉണ്ടെന്നത് ശരിയാണ്, എന്നാൽ ആ പിന്തുണ പാർട്ടിയെ ശക്തിപ്പെടുത്താനാണ് ഉപയോഗിക്കേണ്ടതെന്നും അദ്ദേഹം കൂട്ടിച്ചേർത്തു. നേരത്തെ സ്വതന്ത്രനായി മത്സരിക്കുമെന്ന് കരുതിയിരുന്ന സുധാകരൻ ഇതോടെ തന്റെ മുൻനിലപാടിൽ നിന്ന് പിൻവാങ്ങിയിരിക്കുകയാണ്.
കെ.സി. വേണുഗോപാലുമായി രണ്ടുതവണ നടത്തിയ ചർച്ചകളും മല്ലികാർജ്ജുൻ ഖർഗെ നേരിട്ട് വിളിച്ചതുമാണ് സുധാകരന്റെ മനംമാറ്റത്തിന് പിന്നിലെ പ്രധാന ഘടകങ്ങൾ. എംപിമാർ നിയമസഭയിലേക്ക് മത്സരിക്കേണ്ടതില്ലെന്ന രാഹുൽ ഗാന്ധിയുടെ കർശന നിലപാട് സുധാകരന് ബോധ്യപ്പെട്ടതായാണ് സൂചന. ഇതോടെ കണ്ണൂർ മണ്ഡലത്തിൽ ടി.ഒ. മോഹനനെ സ്ഥാനാർത്ഥിയായി പ്രഖ്യാപിക്കുന്നതിൽ ഇനി തടസ്സങ്ങളുണ്ടാകില്ല. സുധാകരൻ ഉടൻ തന്നെ കണ്ണൂരിലേക്ക് മടങ്ങുമെന്നും തിരഞ്ഞെടുപ്പ് പ്രചാരണങ്ങളിൽ സജീവമാകുമെന്നും അദ്ദേഹത്തിന്റെ ഓഫീസ് അറിയിച്ചു.
