ലോക്സഭാ സ്പീക്കർ ഓം ബിർളയെ സ്ഥാനത്തുനിന്നും നീക്കാനായി പ്രതിപക്ഷം കൊണ്ടുവന്ന അവിശ്വാസ പ്രമേയം സഭ ശബ്ദവോട്ടോടെ തള്ളി. കടുത്ത വാദപ്രതിവാദങ്ങൾക്കും പ്രതിപക്ഷ പ്രതിഷേധങ്ങൾക്കും ഒടുവിലായിരുന്നു പ്രമേയത്തിന്മേലുള്ള നടപടികൾ പൂർത്തിയായത്. സഭയുടെ അന്തസ്സ് കാത്തുസൂക്ഷിക്കാനുള്ള നീക്കത്തിന്റെ ഭാഗമായാണ് പ്രമേയമെന്ന് ചർച്ചയ്ക്ക് തുടക്കമിട്ട കോൺഗ്രസ് അംഗം ഗൗരവ് ഗൊഗോയി പറഞ്ഞു. വ്യക്തിപരമായ നീക്കമല്ല ഇതെന്നും സ്പീക്കറുടെ നിഷ്പക്ഷത ചോദ്യം ചെയ്യപ്പെടുന്നുണ്ടെന്നും അദ്ദേഹം ആരോപിച്ചു.
ചർച്ചയിൽ പങ്കെടുത്ത കേന്ദ്ര ആഭ്യന്തര മന്ത്രി അമിത് ഷാ പ്രമേയത്തെ ശക്തമായി എതിർത്തു. സ്പീക്കർ സഭയുടെ നിഷ്പക്ഷനായ സംരക്ഷകനാണെന്നും ഭരണ-പ്രതിപക്ഷ ഭേദമന്യേ എല്ലാവരെയും ഒരുപോലെയാണ് അദ്ദേഹം കാണുന്നതെന്നും ഷാ വ്യക്തമാക്കി. ചർച്ചയ്ക്കിടെ പ്രതിപക്ഷ നേതാവ് രാഹുൽ ഗാന്ധിയുടെ നിലപാടുകളെ അമിത് ഷാ പരിഹസിച്ചത് സഭയിൽ വലിയ ബഹളത്തിന് കാരണമായി. അമിത് ഷാ പാർലമെന്ററി വിരുദ്ധമായ ഭാഷയാണ് ഉപയോഗിക്കുന്നതെന്ന് ആരോപിച്ച് പ്രതിപക്ഷം നടുത്തളത്തിലിറങ്ങി പ്രതിഷേധിച്ചു.
പ്രതിപക്ഷാംഗങ്ങളുടെ ശക്തമായ മുദ്രാവാക്യം വിളികൾക്കിടയിലാണ് പ്രമേയം വോട്ടിനിട്ടതും തള്ളിയതും. ഭരണപക്ഷത്തിന് വ്യക്തമായ ഭൂരിപക്ഷമുള്ള സഭയിൽ പ്രമേയം പരാജയപ്പെടുമെന്ന് ഉറപ്പായിരുന്നുവെങ്കിലും സ്പീക്കറുടെ പ്രവർത്തന ശൈലിക്കെതിരെ രാഷ്ട്രീയമായി സമ്മർദ്ദം ചെലുത്താനാണ് പ്രതിപക്ഷം ഇതിലൂടെ ശ്രമിച്ചത്. സഭാനടപടികളിൽ സ്പീക്കർ കാണിക്കുന്ന താൽപ്പര്യങ്ങൾ ജനാധിപത്യ വിരുദ്ധമാണെന്ന ആരോപണം രാഹുൽ ഗാന്ധിയും ചർച്ചയിൽ ഉന്നയിച്ചു.
