ന്യൂഡൽഹി: രാജ്യത്ത് പ്രീമിയം പെട്രോൾ വില വർധിപ്പിച്ചു. വിവിധ എണ്ണക്കമ്പനികൾ ലിറ്ററിന് 2.09 രൂപ മുതൽ 2.35 രൂപ വരെയാണ് വർധിപ്പിച്ചത്. ബിപിസിഎൽ സ്പീഡ് (BPCL Speed), എച്ച്പിസിഎൽ പവർ (HPCL Power), ഐഒസിഎൽ എക്സ്പി95 (IOCL XP95) എന്നീ പ്രീമിയം ഇന്ധനങ്ങൾക്കാണ് വില വർധനവ് ബാധകമാകുന്നത്. എന്നാൽ, സാധാരണ പെട്രോളിന്റെയും ഡീസലിന്റെയും വിലയിൽ നിലവിൽ മാറ്റമില്ലെന്ന് എണ്ണക്കമ്പനികൾ അറിയിച്ചു.
പ്രീമിയം ഇന്ധനം ഉപയോഗിക്കുന്ന ഉയർന്ന നിലവാരമുള്ള വാഹന ഉടമകൾക്ക് പുതിയ വില വർധനവ് അധിക ബാധ്യതയാകും. അന്താരാഷ്ട്ര വിപണിയിലെ ക്രൂഡ് ഓയിൽ വിലയിലുണ്ടായ മാറ്റങ്ങളാണ് ഈ വിലവർധനവിന് പിന്നിലെ പ്രധാന കാരണം. ഇന്ന് ഉച്ചയ്ക്ക് ശേഷമാണ് പുതുക്കിയ വില സംബന്ധിച്ച അറിയിപ്പ് പുറത്തുവന്നത്.
സാധാരണ ഇന്ധനവിലയിൽ മാറ്റമില്ലാത്തത് സാധാരണക്കാർക്ക് ആശ്വാസകരമാണെങ്കിലും, പ്രീമിയം വിഭാഗത്തിലുണ്ടായ ഈ വർധനവ് വരും ദിവസങ്ങളിൽ മറ്റ് ഇന്ധനങ്ങളുടെ വിലയെയും ബാധിക്കുമോ എന്ന ആശങ്ക നിലനിൽക്കുന്നുണ്ട്. തിരഞ്ഞെടുപ്പ് കാലമായതിനാൽ സാധാരണ ഇന്ധനവില ഉയർത്താൻ സാധ്യതയില്ലെന്നായിരുന്നു മുൻപുള്ള വിലയിരുത്തലുകൾ. എന്നാൽ പ്രീമിയം പെട്രോളിന്റെ വില വർധനവ് വാഹന വിപണിയിലും ചർച്ചയായിട്ടുണ്ട്.
