ന്യൂഡൽഹി: രാജ്യത്ത് വീണ്ടും ലോക്ക്ഡൗൺ ഏർപ്പെടുത്താൻ പോകുന്നു എന്ന തരത്തിൽ പ്രചരിക്കുന്ന വാർത്തകൾ പൂർണ്ണമായും അടിസ്ഥാനരഹിതമാണെന്ന് കേന്ദ്ര പെട്രോളിയം മന്ത്രി ഹർദീപ് സിംഗ് പുരി വ്യക്തമാക്കി. അത്തരമൊരു നിർദ്ദേശം നിലവിൽ സർക്കാരിന്റെ പരിഗണനയിലില്ലെന്ന് അദ്ദേഹം പറഞ്ഞു. പശ്ചിമേഷ്യൻ സംഘർഷത്തെത്തുടർന്ന് ഉണ്ടായേക്കാവുന്ന ഇന്ധന പ്രതിസന്ധിയെ നേരിടാൻ രാജ്യം സജ്ജമാണെന്നും ജനങ്ങൾ പരിഭ്രാന്തരാകേണ്ടതില്ലെന്നും അദ്ദേഹം സോഷ്യൽ മീഡിയ പ്ലാറ്റ്ഫോമായ ‘എക്സി’ലൂടെ (X) അറിയിച്ചു.
പ്രധാനമന്ത്രി നരേന്ദ്ര മോദി പാർലമെന്റിൽ നടത്തിയ ‘കോവിഡ് കാലത്തെപ്പോലെയുള്ള തയ്യാറെടുപ്പുകൾ വേണം’ എന്ന പരാമർശം തെറ്റായി വ്യാഖ്യാനിക്കപ്പെട്ടതാണ് ലോക്ക്ഡൗൺ ഭീതിക്ക് കാരണമായത്. എന്നാൽ ഇത് ഭരണപരമായ ജാഗ്രതയെക്കുറിച്ചും ഇന്ധന സംരക്ഷണത്തെക്കുറിച്ചുമുള്ള നിർദ്ദേശമായിരുന്നുവെന്നും അല്ലാതെ ജനങ്ങളുടെ സഞ്ചാരത്തിന് നിയന്ത്രണം ഏർപ്പെടുത്താനല്ലെന്നും കേന്ദ്രം വിശദീകരിച്ചു. രാജ്യത്തെ ഇന്ധനം, പാചകവാതകം (LPG), മറ്റ് അവശ്യവസ്തുക്കൾ എന്നിവയുടെ ലഭ്യത സർക്കാർ നിരന്തരം നിരീക്ഷിച്ചുവരികയാണെന്നും മന്ത്രി കൂട്ടിച്ചേർത്തു.
വ്യാജ വാർത്തകൾ പ്രചരിപ്പിക്കുന്നത് ഉത്തരവാദിത്തമില്ലാത്ത പ്രവണതയാണെന്നും ഇത്തരം സാഹചര്യങ്ങളിൽ ജനങ്ങൾ ശാന്തത പാലിക്കണമെന്നും ഹർദീപ് സിംഗ് പുരി ആവശ്യപ്പെട്ടു. 2020-ലെ ലോക്ക്ഡൗണിന്റെ ആറാം വാർഷികം അടുത്തുവരുന്ന സാഹചര്യത്തിൽ ഓൺലൈനിൽ ഇത്തരം അഭ്യൂഹങ്ങൾ വേഗത്തിൽ പടരുകയായിരുന്നു. എന്നാൽ രാജ്യം സാമ്പത്തികമായി സുരക്ഷിതമാണെന്നും വിതരണ ശൃംഖലകൾ തടസ്സപ്പെടാതിരിക്കാൻ ആവശ്യമായ എല്ലാ നടപടികളും സർക്കാർ സ്വീകരിച്ചിട്ടുണ്ടെന്നും അദ്ദേഹം ഉറപ്പുനൽകി.
