മുതിർന്ന സിപിഎം നേതാവ് ജി. സുധാകരനെതിരെ കടുത്ത വിമർശനവുമായി മന്ത്രി സജി ചെറിയാൻ. ജി. സുധാകരൻ പാർട്ടിയുടെ ചങ്കിൽ കുത്തുകയാണ് ചെയ്തതെന്നും ഇത് രാഷ്ട്രീയ വഞ്ചനയാണെന്നും അദ്ദേഹം ആരോപിച്ചു. അതേസമയം, സീറ്റ് നിഷേധിക്കപ്പെട്ടിട്ടും പാർട്ടിയെ ചതിക്കാതെ കൂടെനിന്ന കോൺഗ്രസ് നേതാവ് കെ. സുധാകരന്റേത് രാഷ്ട്രീയ ധാർമികതയാണെന്നും സജി ചെറിയാൻ അഭിപ്രായപ്പെട്ടു. ചേർത്തലയിൽ നടന്ന തിരഞ്ഞെടുപ്പ് യോഗത്തിലാണ് അദ്ദേഹം ഈ വിവാദ പരാമർശങ്ങൾ നടത്തിയത്.
കോൺഗ്രസ് ഇപ്പോൾ പിരിച്ചുവിടേണ്ട അവസ്ഥയിലാണെന്ന് പരിഹസിച്ച സജി ചെറിയാൻ, യുഡിഎഫിലെ സീറ്റ് നിർണ്ണയത്തെയും രൂക്ഷമായി വിമർശിച്ചു. കഷ്ടപ്പെടുന്നവർക്ക് വിലയില്ലാത്ത പാർട്ടിയായി കോൺഗ്രസ് മാറിയെന്നും അവസരവാദികൾക്കാണ് അവിടെ സ്ഥാനമെന്നും അദ്ദേഹം പറഞ്ഞു. ആലപ്പുഴയിൽ ഷുക്കൂർ ഉൾപ്പെടെയുള്ള നേതാക്കൾ കടുത്ത പ്രതിഷേധത്തിലാണെന്നും ഒരാളും വിസ്മയമെന്ന് പറയുന്ന യുഡിഎഫ് പട്ടികയ്ക്കൊപ്പം പോകാൻ തയ്യാറല്ലെന്നും അദ്ദേഹം കൂട്ടിച്ചേർത്തു.
സ്വന്തം നിലപാടുകളിൽ ഉറച്ചുനിൽക്കുന്ന പ്രസ്ഥാനമാണ് സിപിഎം എന്ന് സജി ചെറിയാൻ വ്യക്തമാക്കി. നാളെ താൻ പാർട്ടി വിട്ടുപോയാൽ സ്വന്തം ഭാര്യ പോലും കൂടെവരില്ലെന്നും അവൾക്ക് പാർട്ടിയാണ് വലുതെന്നും അദ്ദേഹം പറഞ്ഞു. വി.ഡി. സതീശൻ പറയുന്ന ‘വിസ്മയം’ വെറും അവകാശവാദം മാത്രമാണെന്നും ചങ്കിൽ കുത്തിയവരെ കൂട്ടുപിടിച്ച് ജയിക്കാമെന്ന് കോൺഗ്രസ് കരുതേണ്ടെന്നും അദ്ദേഹം മുന്നറിയിപ്പ് നൽകി. സജി ചെറിയാന്റെ ഈ പ്രസംഗം വരും ദിവസങ്ങളിൽ രാഷ്ട്രീയ വൃത്തങ്ങളിൽ വലിയ ചർച്ചകൾക്ക് വഴിവെക്കും.
