അഹമ്മദാബാദ്: അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടന്ന ആവേശകരമായ ഫൈനലിൽ ന്യൂസിലൻഡിനെ 96 റൺസിന് തകർത്ത് ഇന്ത്യ ടി20 ലോകകപ്പ് നിലനിർത്തി. ഇന്ത്യ ഉയർത്തിയ 256 റൺസിന്റെ കൂറ്റൻ ലക്ഷ്യം പിന്തുടർന്ന കിവികൾ 19 ഓവറിൽ 159 റൺസിന് എല്ലാവരും പുറത്തായി. ഇതോടെ മൂന്ന് തവണ ടി20 ലോകകപ്പ് നേടുന്ന ടീമെന്ന ചരിത്രനേട്ടം ഇന്ത്യ സ്വന്തമാക്കി. നാല് വിക്കറ്റുകൾ വീഴ്ത്തി കിവികളുടെ നട്ടെല്ലൊടിച്ച ജസ്പ്രിത് ബുംറയാണ് ഇന്ത്യൻ വിജയത്തിൽ ബൗളിംഗിൽ നിർണ്ണായകമായത്.
നേരത്തെ ടോസ് നഷ്ടപ്പെട്ട് ബാറ്റിംഗിനിറങ്ങിയ ഇന്ത്യയെ സഞ്ജു സാംസണിന്റെ വെടിക്കെട്ട് ഇന്നിംഗ്സാണ് (46 പന്തിൽ 89) കൂറ്റൻ സ്കോറിലെത്തിച്ചത്. ഓപ്പണർ അഭിഷേക് ശർമയും (52), ഇഷാൻ കിഷനും (54) അർധസെഞ്ച്വറികളുമായി സഞ്ജുവിന് മികച്ച പിന്തുണ നൽകി. ഒന്നാം വിക്കറ്റിൽ സഞ്ജു-അഭിഷേക് സഖ്യം 98 റൺസും, രണ്ടാം വിക്കറ്റിൽ സഞ്ജു-കിഷൻ സഖ്യം 105 റൺസും കൂട്ടിച്ചേർത്തതോടെ ഇന്ത്യൻ സ്കോർ കുതിച്ചുയർന്നു. അവസാന ഓവറുകളിൽ വിക്കറ്റുകൾ വീണെങ്കിലും ഇന്ത്യ പടുത്തുയർത്തിയ റൺമലയ്ക്ക് മുന്നിൽ കിവികൾ പതറുകയായിരുന്നു.
മറുപടി ബാറ്റിംഗിൽ തുടക്കം മുതൽ തന്നെ ന്യൂസിലൻഡിന് വിക്കറ്റുകൾ നഷ്ടമായി. പവർ പ്ലേയിൽ തന്നെ ഫിൻ അലൻ, രചിൻ രവീന്ദ്ര, ഗ്ലെൻ ഫിലിപ്സ് എന്നിവർ മടങ്ങിയതോടെ അവർ പ്രതിരോധത്തിലായി. 52 റൺസെടുത്ത ടിം സീഫെർട്ടും 43 റൺസെടുത്ത മിച്ചൽ സാന്റ്നറും പൊരുതി നോക്കിയെങ്കിലും ഇന്ത്യൻ ബൗളിംഗ് നിരയ്ക്ക് മുന്നിൽ മറ്റുതാരങ്ങൾ നിഷ്പ്രഭരായി. നീഷം, മാറ്റ് ഹെന്റി തുടങ്ങിയവർ പരാജയപ്പെട്ടതോടെ ന്യൂസിലൻഡ് തോൽവി സമ്മതിച്ചു. വിജയത്തോടെ ഇന്ത്യൻ ക്രിക്കറ്റ് ആരാധകർക്ക് ആവേശം നൽകി ലോകകിരീടം ഒരിക്കൽ കൂടി നീലപ്പട കൈപ്പിടിയിലൊതുക്കി.
