കണ്ണൂർ നിയമസഭാ സീറ്റിനെച്ചൊല്ലി കോൺഗ്രസിനുള്ളിൽ കെ. സുധാകരൻ ഉയർത്തിയ കലാപം രൂക്ഷമാകുന്നു. എംപിമാർ മത്സരിക്കേണ്ടതില്ലെന്ന ഹൈക്കമാൻഡ് നിർദ്ദേശത്തിൽ പ്രതിഷേധിച്ച് ഡൽഹിയിൽ തുടരുന്ന അദ്ദേഹം ബുധനാഴ്ച മാധ്യമങ്ങളെ കാണും. തന്നെ അനുനയിപ്പിക്കാൻ എത്തിയ രമേശ് ചെന്നിത്തല ഉൾപ്പെടെയുള്ള നേതാക്കളുടെ നീക്കങ്ങളെ സുധാകരൻ തള്ളിക്കളഞ്ഞു. സീറ്റ് നിർണ്ണയ ചർച്ചകളിൽ തന്നെ പൂർണ്ണമായും അവഗണിച്ചുവെന്നും തനിക്ക് ലഭിച്ച ഉറപ്പുകൾ ലംഘിക്കപ്പെട്ടുവെന്നുമാണ് അദ്ദേഹത്തിന്റെ പ്രധാന പരാതി. ആദ്യഘട്ട പട്ടികയിൽ കണ്ണൂർ മണ്ഡലത്തെ ഒഴിവാക്കിയത് അദ്ദേഹത്തിനുള്ള സൂചനയാണെങ്കിലും കടുത്ത നിലപാടിൽ തന്നെ സുധാകരൻ ഉറച്ചുനിൽക്കുകയാണ്.
അതിനിടെ, കണ്ണൂരിൽ സുധാകരൻ അനുകൂലികളുടെ പ്രതിഷേധം രൂക്ഷമായി തെരുവിലേക്ക് പടർന്നു. സിറ്റിംഗ് എംഎൽഎ സണ്ണി ജോസഫിന്റെ മണ്ഡലമായ പേരാവൂരിൽ സുധാകരനെ അനുകൂലിച്ചും സണ്ണി ജോസഫിനെതിരെയുമായി നിരവധി ഫ്ലക്സ് ബോർഡുകളാണ് ഉയർന്നത്. “നട്ടുനനച്ചു വളർത്തിയവനെ ഇല്ലായ്മ ചെയ്താൽ കനത്ത തിരിച്ചടി നേരിടേണ്ടി വരും” എന്ന രൂക്ഷമായ മുന്നറിയിപ്പാണ് അണികൾ ഈ ബോർഡുകളിലൂടെ നൽകുന്നത്. കണ്ണൂർ ഡിസിസി ഓഫീസിന് മുന്നിലും സമാനമായ രീതിയിൽ പ്രതിഷേധങ്ങൾ ഇരമ്പുകയാണ്.
ബുധനാഴ്ച കേന്ദ്ര തിരഞ്ഞെടുപ്പ് സമിതി യോഗം ചേരാനിരിക്കെ സുധാകരൻ എന്ത് പ്രഖ്യാപനം നടത്തുമെന്നാണ് രാഷ്ട്രീയ കേരളം ഉറ്റുനോക്കുന്നത്. താൻ മത്സരിക്കുമെന്ന നിലപാടിൽ അദ്ദേഹം ഉറച്ചുനിൽക്കുകയോ അല്ലെങ്കിൽ നേതൃപദവികൾ രാജിവെച്ച് കടുത്ത തീരുമാനങ്ങളിലേക്ക് കടക്കുകയോ ചെയ്താൽ അത് യുഡിഎഫിന്റെ തെരഞ്ഞെടുപ്പ് സാധ്യതകളെ സാരമായി ബാധിക്കും. കരുത്തനായ നേതാവ് പരസ്യമായി കലാപക്കൊടി ഉയർത്തിയത് കോൺഗ്രസ് ഹൈക്കമാൻഡിന് വലിയ തലവേദനയാണ് സൃഷ്ടിച്ചിരിക്കുന്നത്.
