യുഡിഎഫിന്റെ സ്ഥാനാർത്ഥി നിർണ്ണയം അത്യന്തം വേഗത്തിലും ഐക്യത്തോടെയുമാണ് പൂർത്തിയാക്കിയതെന്ന് പ്രതിപക്ഷ നേതാവ് വി.ഡി. സതീശൻ. ഘടകകക്ഷികളുമായി സീറ്റ് വിഭജനത്തിൽ യാതൊരുവിധ അപസ്വരങ്ങളും ഉണ്ടായില്ല എന്നത് രാഷ്ട്രീയ വിസ്മയമാണെന്ന് അദ്ദേഹം പറഞ്ഞു. ഡൽഹിയിൽ കേവലം മൂന്നേകാൽ മണിക്കൂർ നീണ്ട ചർച്ചയ്ക്കൊടുവിൽ 92 സീറ്റുകളിലെ സ്ഥാനാർത്ഥികളെ നിശ്ചയിക്കാൻ കോൺഗ്രസിന് സാധിച്ചു. ജി. സുധാകരൻ ഉൾപ്പെടെയുള്ള നേതാക്കളുടെ നിലപാടുകളെ അദ്ദേഹം അഭിനന്ദിക്കുകയും പയ്യന്നൂർ, തളിപ്പറമ്പ് മണ്ഡലങ്ങളിൽ സിപിഎം മുതിർന്ന നേതാക്കളുടെ പരോക്ഷ പിന്തുണ യുഡിഎഫിനുണ്ടെന്ന് അവകാശപ്പെടുകയും ചെയ്തു.
അധികാരത്തിൽ എത്തിയാൽ മൂന്ന് മാസത്തിനുള്ളിൽ തിരഞ്ഞെടുപ്പ് ഗ്യാരന്റികൾ നടപ്പാക്കുമെന്ന് സതീശൻ ഉറപ്പുനൽകി. സ്ത്രീകൾക്ക് കെഎസ്ആർടിസിയിൽ സൗജന്യ യാത്ര അനുവദിക്കുമെന്നും ഇതിനായി സർക്കാർ സബ്സിഡി നൽകുമെന്നും അദ്ദേഹം പറഞ്ഞു. പികെ ശശിക്കെതിരെയുള്ള ആരോപണങ്ങൾ പാർട്ടിക്കുള്ളിലെ തർക്കം മാത്രമാണെന്നും അത് പരിശോധിച്ചുവെന്നും അദ്ദേഹം വ്യക്തമാക്കി. നിലവിൽ തെറ്റ് തിരുത്തി വന്ന പുതിയ അൻവറിനെയാണ് യുഡിഎഫ് പിന്തുണയ്ക്കുന്നതെന്നും ജയിച്ചാൽ യുഡിഎഫിനൊപ്പം നിൽക്കുന്ന നാല് സ്വതന്ത്രരുമായി ധാരണയിലെത്തിയിട്ടുണ്ടെന്നും അദ്ദേഹം വെളിപ്പെടുത്തി.
മുഖ്യമന്ത്രി പദത്തിനായി കോൺഗ്രസിനുള്ളിൽ വടംവലി ഉണ്ടാകില്ലെന്നും കൂട്ടായ നേതൃത്വമാണ് മുന്നോട്ടുള്ളതെന്നും സതീശൻ പറഞ്ഞു. എഐസിസി നടപടിക്രമങ്ങൾ അനുസരിച്ച് ഹൈക്കമാൻഡ് മുഖ്യമന്ത്രിയെ തീരുമാനിക്കും. ഉമ്മൻചാണ്ടി മന്ത്രിസഭയിൽ അംഗമാകാൻ കഴിയാത്തതിൽ മുൻപ് വിഷമമുണ്ടായിരുന്നെങ്കിലും ഇപ്പോൾ താൻ പൂർണ്ണ സംതൃപ്തനാണെന്നും അദ്ദേഹം കൂട്ടിച്ചേർത്തു. ഇടുക്കി, പത്തനംതിട്ട, എറണാകുളം, മലപ്പുറം ജില്ലകളിൽ മികച്ച വിജയം നേടുമെന്നും കോട്ടയത്ത് കടുത്ത മത്സരം പ്രതീക്ഷിക്കുന്നതായും സതീശൻ വ്യക്തമാക്കി.
