വയനാട് ദുരന്തബാധിതർക്കായുള്ള ടൗൺഷിപ്പ് പദ്ധതിയുടെ ഒന്നാം ഘട്ടം മുഖ്യമന്ത്രി പിണറായി വിജയൻ ഉദ്ഘാടനം ചെയ്തു. മുണ്ടക്കൈ, ചൂരൽമല ഉരുൾപൊട്ടലിൽ സർവ്വസ്വവും നഷ്ടപ്പെട്ട 178 കുടുംബങ്ങൾക്കുള്ള വീടുകളുടെ താക്കോൽദാനം ചടങ്ങിൽ നിർവ്വഹിച്ചു. ലോകത്തിന് തന്നെ മാതൃകയായ രീതിയിൽ അതിവേഗമാണ് പുനരധിവാസ പ്രവർത്തനങ്ങൾ പൂർത്തിയാക്കിയതെന്ന് മുഖ്യമന്ത്രി പറഞ്ഞു.
ആധുനിക സൗകര്യങ്ങളോടു കൂടിയ ടൗൺഷിപ്പാണ് ദുരന്തബാധിതർക്കായി ഒരുക്കിയിരിക്കുന്നത്. സുരക്ഷിതമായ സ്ഥലത്ത് വീടുകൾ നിർമ്മിക്കുന്നതിനൊപ്പം അടിസ്ഥാന സൗകര്യങ്ങളും ഉറപ്പാക്കിയിട്ടുണ്ട്. പുനരധിവാസത്തിന്റെ രണ്ടാം ഘട്ട പ്രവർത്തനങ്ങൾ ഉടൻ ആരംഭിക്കുമെന്നും എല്ലാ കുടുംബങ്ങൾക്കും എത്രയും വേഗം സ്ഥിരമായ താമസസൗകര്യം ഒരുക്കുമെന്നും സർക്കാർ വ്യക്തമാക്കി.
ജനപ്രതിനിധികളും ഉന്നത ഉദ്യോഗസ്ഥരും പങ്കെടുത്ത ചടങ്ങിൽ വൻ ജനപങ്കാളിത്തമാണ് ഉണ്ടായത്. വീടുകളുടെ നിർമ്മാണത്തിൽ സഹായിച്ച സന്നദ്ധ സംഘടനകളെയും വ്യക്തികളെയും മുഖ്യമന്ത്രി അഭിനന്ദിച്ചു. വയനാടിന്റെ അതിജീവനം കേരളത്തിന്റെ കരുത്താണെന്നും ഇനിയുള്ള ഘട്ടങ്ങളിലും എല്ലാവരുടെയും പിന്തുണ ആവശ്യമാണെന്നും അദ്ദേഹം കൂട്ടിച്ചേർത്തു.
