ആലപ്പുഴ: നിയമസഭാ തിരഞ്ഞെടുപ്പിന്റെ പശ്ചാത്തലത്തിൽ അമ്പലപ്പുഴയിലെ സ്ഥാനാർത്ഥിത്വത്തെക്കുറിച്ച് പ്രതികരിച്ച് എഐസിസി ജനറൽ സെക്രട്ടറി കെ.സി. വേണുഗോപാൽ. അമ്പലപ്പുഴയിൽ യുഡിഎഫിന് സ്ഥാനാർത്ഥി ഉണ്ടാകുമോ എന്ന ചോദ്യത്തിന് ഇപ്പോൾ അവിടെ സ്ഥാനാർത്ഥിയുണ്ടെന്നായിരുന്നു അദ്ദേഹത്തിന്റെ മറുപടി. എന്നാൽ അത് സി പി എം നേതാവായിരുന്ന ജി. സുധാകരനാണോ എന്ന ചോദ്യത്തിന്, താൻ ജ്യോത്സ്യനല്ലെന്നും ഭാവി പ്രവചിക്കാനില്ലെന്നും വേണുഗോപാൽ പരിഹസിച്ചു. ജി. സുധാകരന്റെ അഭിപ്രായങ്ങൾ അദ്ദേഹത്തോട് തന്നെ ചോദിക്കണമെന്നും തിരഞ്ഞെടുപ്പ് കാലത്തെ എല്ലാ കാര്യങ്ങളും ഇപ്പോൾ പരസ്യപ്പെടുത്താൻ കഴിയില്ലെന്നും അദ്ദേഹം വ്യക്തമാക്കി.
മുഖ്യമന്ത്രി പിണറായി വിജയന്റെ മൂന്നാം ഊഴത്തെക്കുറിച്ചുള്ള വാർത്തകളെയും വേണുഗോപാൽ ശക്തമായി വിമർശിച്ചു. പിണറായി വിജയൻ മൂന്നാമതും അധികാരത്തിൽ വരുന്നത് യഥാർത്ഥ കമ്മ്യൂണിസ്റ്റുകാർക്ക് പോലും ചിന്തിക്കാൻ പറ്റാത്ത കാര്യമാണെന്ന് അദ്ദേഹം പറഞ്ഞു. നിലവിലെ ഭരണത്തിൽ ഇടതുപക്ഷ അനുഭാവികൾ പോലും അസംതൃപ്തരാണെന്നും കേരളത്തിൽ മാറ്റത്തിനായുള്ള ആഗ്രഹം ജനങ്ങൾക്കിടയിൽ പ്രകടമാണെന്നും അദ്ദേഹം കൂട്ടിച്ചേർത്തു.
സ്ഥാനാർത്ഥി നിർണ്ണയവുമായി ബന്ധപ്പെട്ട ചർച്ചകൾ ദില്ലിയിൽ പുരോഗമിക്കുകയാണെന്നും ജയസാധ്യതയും ജനപിന്തുണയും മാത്രമായിരിക്കും പ്രധാന മാനദണ്ഡമെന്നും വേണുഗോപാൽ ഓർമ്മിപ്പിച്ചു. ജി. സുധാകരന്റെ പേര് അമ്പലപ്പുഴയിൽ യുഡിഎഫ് സ്വതന്ത്രനായി ചർച്ചകളിൽ വരുന്നുണ്ടെങ്കിലും ഔദ്യോഗികമായ സ്ഥിരീകരണം ഹൈക്കമാൻഡ് പട്ടിക പുറത്തുവരുന്നതോടെ മാത്രമേ ഉണ്ടാകൂ. വരും ദിവസങ്ങളിൽ സ്ഥാനാർത്ഥി നിർണ്ണയത്തിൽ കൂടുതൽ വ്യക്തത വരുമെന്ന് പ്രതീക്ഷിക്കുന്നു.
