വത്തിക്കാൻ :തന്റെ ഭരണകാലത്തെ ആദ്യ ഈസ്റ്റർ ജാഗരണ ശുശ്രൂഷകൾക്ക് വത്തിക്കാനിലെ സെന്റ് പീറ്റേഴ്സ് ബസിലിക്കയിൽ ലിയോ പതിനാലാമൻ മാർപ്പാപ്പ നേതൃത്വം നൽകി. യുദ്ധങ്ങൾ തകർത്ത ലോകത്ത് സമാധാനവും ഐക്യവും പുലരണമെന്ന് അദ്ദേഹം വിശ്വാസികളോട് ആഹ്വാനം ചെയ്തു.
ക്രിസ്തുവിന്റെ ഉയിർപ്പിനെ അനുസ്മരിച്ചുകൊണ്ട്, ഇരുളടഞ്ഞ ബസിലിക്കയിലേക്ക് തിരി തെളിയിച്ചു പ്രവേശിച്ച മാർപ്പാപ്പ “ക്രിസ്തുവിന്റെ പ്രകാശം മഹത്വത്തിൽ ഉദിക്കുന്നു” എന്ന് പ്രഖ്യാപിച്ചു.
യുഎസ്-ഇസ്രായേൽ-ഇറാൻ സംഘർഷം, റഷ്യ-ഉക്രെയ്ൻ യുദ്ധം എന്നിവയുടെ പശ്ചാത്തലത്തിൽ, ശത്രുത അവസാനിപ്പിക്കാൻ അദ്ദേഹം ആവശ്യപ്പെട്ടു. യുദ്ധം ചെയ്യുന്നവരുടെ പ്രാർത്ഥന ദൈവം കേൾക്കില്ലെന്ന് അദ്ദേഹം മുൻപ് ഓർമ്മിപ്പിച്ചിരുന്നു.
യേശുവിന്റെ കല്ലറയ്ക്ക് മുകളിലുണ്ടായിരുന്ന കല്ല് പോലെ, ഭയം, സ്വാർത്ഥത, നീതികേട് തുടങ്ങിയ ‘ഭാരമേറിയ കല്ലുകൾ’ ഹൃദയങ്ങളിൽ നിന്ന് മാറ്റി പുതിയ ജീവിതത്തിലേക്ക് വരാൻ അദ്ദേഹം വിശ്വാസികളെ ആഹ്വാനം ചെയ്തു.
പരമ്പരാഗത രീതികളിലേക്ക് മടങ്ങുന്നതിന്റെ ഭാഗമായി, ഇത്തവണ പെസഹാ വ്യാഴാഴ്ച 12 വൈദികരുടെ പാദങ്ങളാണ് മാർപ്പാപ്പ കഴുകിയത്. കൂടാതെ, ദുഃഖവെള്ളിയാഴ്ച നടന്ന കുരിശിന്റെ വഴിയിൽ 14 സ്ഥലങ്ങളിലും അദ്ദേഹം സ്വയം കുരിശ് വഹിച്ചത് പതിറ്റാണ്ടുകൾക്ക് ശേഷമുള്ള അപൂർവ്വ കാഴ്ചയായി. ചടങ്ങുകളുടെ ഭാഗമായി ലോകത്തിന്റെ വിവിധ ഭാഗങ്ങളിൽ നിന്നുള്ള 10 പേർക്ക് അദ്ദേഹം ജ്ഞാനസ്നാനം നൽകുകയും ചെയ്തു.
ഞായറാഴ്ച രാവിലെ സെന്റ് പീറ്റേഴ്സ് സ്ക്വയറിൽ നടക്കുന്ന ഈസ്റ്റർ കുർബാനയ്ക്ക് ശേഷം അദ്ദേഹം ലോകത്തിന് ഈസ്റ്റർ സന്ദേശം നൽകും.
