പ്രതിരോധ മേഖലയിൽ സ്വയംപര്യാപ്തത ലക്ഷ്യമിട്ടുള്ള ഇന്ത്യയുടെ തന്ത്രപ്രധാന നീക്കങ്ങൾക്ക് കരുത്തുപകർന്ന് മൂന്നാമത്തെ ആണവ അന്തർവാഹിനി ഐഎൻഎസ് അരിധമൻ നാവികസേനയുടെ ഭാഗമായി. വിശാഖപട്ടണത്ത് നടന്ന ചടങ്ങിൽ പ്രതിരോധമന്ത്രി രാജ്നാഥ് സിങ്ങ് അന്തർവാഹിനി രാജ്യത്തിന് സമർപ്പിച്ചു. അരിധമൻ എന്നത് കേവലം ഒരു വാക്ക് മാത്രമല്ല, ഇന്ത്യയുടെ ശക്തിയുടെ പ്രതീകമാണെന്ന് അദ്ദേഹം ചടങ്ങിൽ പ്രതികരിച്ചു. പാക്കിസ്ഥാനും ചൈനയ്ക്കും ഒരുപോലെ വെല്ലുവിളിയാകുന്ന ഈ അന്തർവാഹിനി ഇന്ത്യയുടെ സമുദ്രസുരക്ഷയിൽ നിർണ്ണായക പങ്കുവഹിക്കും.
അഡ്വാൻസ്ഡ് ടെക്നോളജി വെസ്സൽ (ATV) പദ്ധതിയുടെ കീഴിൽ നിർമ്മിച്ച മൂന്നാമത്തെ അരിഹന്ത്-ക്ലാസ് ആണവ അന്തർവാഹിനിയാണിത്. കടലിനടിയിൽ നിന്ന് ആണവ ആക്രമണം നടത്താനുള്ള ശേഷിയാണ് ഇതിന്റെ ഏറ്റവും വലിയ പ്രത്യേകത. ഐഎൻഎസ് അരിധമന്റെ തൊണ്ണൂറ് ശതമാനത്തിലധികം ഭാഗങ്ങളും ഇന്ത്യയിൽ തന്നെയാണ് രൂപകൽപ്പന ചെയ്ത് നിർമ്മിച്ചത് എന്നത് രാജ്യത്തിന് അഭിമാനകരമാണ്. വിശാഖപട്ടണത്തെ കപ്പൽ നിർമ്മാണ കേന്ദ്രത്തിൽ നിർമ്മിച്ച ഈ അന്തർവാഹിനിയിലെ ആണവ റിയാക്ടർ ഇന്ത്യൻ എഞ്ചിനീയർമാരുടെ സാങ്കേതിക വൈദഗ്ധ്യത്തിന് തെളിവായി നിൽക്കുന്നു.
തദ്ദേശീയ സാങ്കേതികവിദ്യയുടെ കരുത്തിൽ നിർമ്മിച്ചതിനാൽ, ഇതിന്റെ അറ്റകുറ്റപ്പണികൾക്കോ ഭാവിയിലെ നവീകരണങ്ങൾക്കോ വേണ്ടി ഇന്ത്യയ്ക്ക് മറ്റ് രാജ്യങ്ങളെ ആശ്രയിക്കേണ്ടി വരില്ല. ശത്രുരാജ്യങ്ങളുടെ നഗരങ്ങളെയോ സൈനിക താവളങ്ങളെയോ കടലിനടിയിൽ ഒളിച്ചിരുന്ന് നിശ്ശേഷം തകർക്കാൻ ഈ അന്തർവാഹിനിക്ക് സാധിക്കും. ഐഎൻഎസ് അരിധമന്റെ ആയുധപ്പുരയിലെ ഏറ്റവും മാരകമായ ആയുധം 3,500 കിലോമീറ്റർ പരിധിയുള്ള കെ-4 ബാലിസ്റ്റിക് മിസൈലുകളാണ്. ദീർഘദൂര ലക്ഷ്യങ്ങളെ കൃത്യമായി തകർക്കാൻ ശേഷിയുള്ള ഈ മിസൈലുകൾ ഇന്ത്യയുടെ പ്രതിരോധ കവചത്തിന് ആത്മവിശ്വാസം പകരുന്നു.
കടലിൽ നിന്ന് ദീർഘദൂര ആണവ ആക്രമണങ്ങൾ നടത്താൻ കഴിവുള്ള ചുരുക്കം ചില രാജ്യങ്ങളുടെ പട്ടികയിൽ ഇന്ത്യ ഇതോടെ മുൻനിരയിൽ ഇടം പിടിച്ചിരിക്കുകയാണ്. ചൈനയുടെയും പാക്കിസ്ഥാന്റെയും ഭീഷണികളെ ഫലപ്രദമായി നേരിടാൻ അരിധമന്റെ സാന്നിധ്യം ഇന്ത്യൻ നാവികസേനയെ സഹായിക്കും. സമുദ്രാതിർത്തികളിൽ നിശബ്ദനായ കാവൽക്കാരനായി നിലയുറപ്പിക്കുന്ന ഈ ആണവ അന്തർവാഹിനി ഇന്ത്യയുടെ സൈനിക ചരിത്രത്തിലെ സുപ്രധാന നാഴികക്കല്ലായി മാറും.
