അഞ്ചരക്കണ്ടി ഡെന്റൽ കോളേജ് വിദ്യാർത്ഥി നിതിൻ രാജിന്റെ മരണവുമായി ബന്ധപ്പെട്ട് പോലീസ് അന്വേഷണ സംഘം വീട്ടിലെത്തി മൊഴിയെടുപ്പ് പൂർത്തിയാക്കി. നിതിന്റെ അച്ഛൻ ഉൾപ്പെടെയുള്ള കുടുംബാംഗങ്ങളിൽ നിന്ന് വിശദമായ വിവരങ്ങൾ ശേഖരിച്ചെങ്കിലും ആരോഗ്യസ്ഥിതി മോശമായതിനാൽ അമ്മയുടെ മൊഴി രേഖപ്പെടുത്താനായില്ല. അധ്യാപകരിൽ നിന്ന് നിതിൻ നേരിട്ട ക്രൂരമായ മാനസിക പീഡനങ്ങളെക്കുറിച്ച് കുടുംബം പോലീസിനോട് വിശദീകരിച്ചു. നിതിന്റെ മൊബൈൽ ഫോൺ കസ്റ്റഡിയിലെടുത്ത പോലീസ്, കൂടുതൽ തെളിവുകൾക്കായി ഇത് ശാസ്ത്രീയ പരിശോധനയ്ക്ക് അയക്കും.
മകന്റെ മരണത്തിന് ശേഷം മാത്രം സഹപാഠികൾ പ്രതികരിച്ചതിൽ നിതിന്റെ അച്ഛൻ വേദന പ്രകടിപ്പിച്ചു. കുറ്റക്കാരായ അധ്യാപകർക്കെതിരെ കർശന നടപടി വേണമെന്നും കോളേജിന്റെ അംഗീകാരം റദ്ദാക്കണമെന്നും അദ്ദേഹം ആവശ്യപ്പെട്ടു. മാധ്യമങ്ങളിലൂടെ പുറത്തുവന്ന ശബ്ദരേഖകളെക്കുറിച്ചും സഹപാഠികളുടെ മൊഴികളെക്കുറിച്ചും പോലീസ് വിശദമായ അന്വേഷണം നടത്തുന്നുണ്ട്. ഇനിയൊരു വിദ്യാർത്ഥിക്കും ഇത്തരമൊരു ഗതി ഉണ്ടാകരുതെന്നാണ് ആവശ്യമെന്നും അച്ഛൻ പ്രതികരിച്ചു. നീതി കിട്ടണമെന്നും അദ്ദേഹം കൂട്ടിച്ചേർത്തു.
