ലബനനിലെ നൂറോളം കേന്ദ്രങ്ങളിൽ ഇസ്രായേൽ നടത്തിയ ശക്തമായ വ്യോമാക്രമണത്തിൽ 89 പേർ കൊല്ലപ്പെട്ടു. തലസ്ഥാനമായ ബെയ്റൂത്ത് ഉൾപ്പെടെയുള്ള നഗരങ്ങളെ ലക്ഷ്യമിട്ടുണ്ടായ ആക്രമണത്തിൽ എഴുന്നൂറിലധികം പേർക്ക് പരിക്കേറ്റതായാണ് റിപ്പോർട്ട്. ജനവാസ മേഖലകളിലെ ബഹുനില കെട്ടിടങ്ങൾ തകരുകയും ആശുപത്രികൾ പരിക്കേറ്റവരെക്കൊണ്ട് നിറയുകയും ചെയ്തു. ആക്രമണത്തെ ‘കാടത്തം’ എന്ന് വിശേഷിപ്പിച്ച ലബനൻ പ്രസിഡന്റ് ജോസഫ് ഔൺ, മരണസംഖ്യ ഇനിയും ഉയർന്നേക്കാമെന്ന് ഭയപ്പെടുന്നതായി വ്യക്തമാക്കി. തിരിച്ചടിയായി ഇസ്രായേലിന്റെ വടക്കൻ മേഖലകളിലേക്ക് ഹിസ്ബുള്ള റോക്കറ്റ്-മിസൈൽ ആക്രമണങ്ങൾ തുടരുകയാണ്.
ലബനനിലെ ആക്രമണങ്ങൾക്ക് പിന്നാലെ തന്ത്രപ്രധാനമായ ഹോർമുസ് കടലിടുക്കിലൂടെയുള്ള എണ്ണക്കപ്പൽ ഗതാഗതം ഇറാൻ തടഞ്ഞു. അമേരിക്കയും ഇറാനും തമ്മിലുണ്ടാക്കിയ വെടിനിർത്തൽ ധാരണയുടെ ലംഘനമായാണ് ഈ നീക്കം വിലയിരുത്തപ്പെടുന്നത്. കപ്പലുകൾക്ക് സുരക്ഷിത പാത ഒരുക്കണമെന്ന കരാറിലെ പ്രധാന നിബന്ധന നിലനിൽക്കെയാണ്, ഇസ്രായേൽ ആക്രമണത്തിൽ പ്രതിഷേധിച്ച് ഇറാൻ പാത അടച്ചത്. ഇന്ന് രാവിലെ രണ്ട് ടാങ്കറുകളെ കടത്തിവിട്ട ശേഷം മറ്റുള്ളവയുടെ ഗതാഗതം ഇറാനിയൻ സൈന്യം പൂർണ്ണമായും നിർത്തിവെച്ചു.
മേഖലയിൽ സമാധാനം പുനഃസ്ഥാപിക്കാൻ ലക്ഷ്യമിട്ടുള്ള വെടിനിർത്തൽ കരാർ ഇതോടെ പൂർണ്ണമായും തകർച്ചയുടെ വക്കിലെത്തി. ടയർ നഗരം ഉൾപ്പെടെയുള്ള ഇടങ്ങളിൽ നിന്ന് ജനങ്ങളോട് ഒഴിഞ്ഞുപോകാൻ ഇസ്രായേൽ സൈന്യം മുന്നറിയിപ്പ് നൽകിയിട്ടുണ്ട്. ഹോർമുസ് കടലിടുക്ക് അടച്ചതോടെ ആഗോള എണ്ണ വിപണിയിൽ വലിയ പ്രതിസന്ധി ഉണ്ടാകുമെന്ന ആശങ്ക ശക്തമായി. അന്താരാഷ്ട്ര തലത്തിൽ നയതന്ത്ര ഇടപെടലുകൾ നടക്കുന്നുണ്ടെങ്കിലും പശ്ചിമേഷ്യയിൽ യുദ്ധസമാനമായ സാഹചര്യം തുടരുകയാണ്.
