ഹ്യൂസ്റ്റണ്: പാമ്പാടി തിരുമേനിയുടെ 61-ാം ഓര്മ്മപ്പെരുന്നാള് ഏപ്രില് 11 ശനിയാഴ്ച്ച ഹ്യൂസ്റ്റണിലെ ഉര്ശ്ലേം അരമന ചാപ്പലില് ഭക്ത്യാദരപൂര്വ്വം ആചരിച്ചു. രാവിലെ എട്ടിന് ് പ്രഭാത നമസ്കാരത്തെ തുടര്ന്ന് നടന്ന വിശുദ്ധ കുര്ബാനയ്ക്ക് റവ. ഫാ. നിതിന് വി. രാജന് നേതൃത്വം നല്കി.
ഈ ഓര്മ്മപ്പെരുന്നാള് പാമ്പാടി തിരുമേനിയുടെ നാമത്തില് ഹ്യൂസ്റ്റണ് പ്രദേശത്തെ വിവിധ ഓര്ത്തഡോക്സ് ദേവാലയങ്ങളിലെ വിശ്വാസികളെ ഒരുമിപ്പിച്ച ആത്മീയ സംഗമമായി മാറി. തിരുമേനിയുടെ ജീവിതം പ്രതിപാദിക്കുന്ന വിനയവും സേവനവും ഈ ഐക്യത്തില് പ്രതിഫലിച്ചു.
ഓര്മ്മപ്പെരുന്നാളിനോടനുബന്ധിച്ച് പാമ്പാടി തിരുമേനി ഗ്ലോബല് കമ്മ്യൂണിറ്റിയുടെ നേതൃത്വത്തില് പെരുന്നാള് കമ്മിറ്റി സജീവമായി പ്രവര്ത്തിച്ചു. അമേരിക്കന് സൗത്ത് വെസ്റ്റ് ഭദ്രാസന സെക്രട്ടറി റവ. ഫാ. ജോര്ജ് എസ്. മാത്യൂസ് അധ്യക്ഷനായിരുന്ന കമ്മിറ്റിയില് ഫെബിന് കുറിയാക്കോസ്, അമ്മു കൊച്ചമ്മ, ബിനു കെ. ജോണ്, ബിബി പരയില്, റിജോ ജേക്കബ്, ജസ്റ്റിന് ജോര്ജ് എന്നിവര് അംഗങ്ങളായി സേവനം അനുഷ്ഠിച്ചു.
നേര്ച്ചയായി നെയ്യപ്പവും പഴവും വിതരണം ചെയ്തു. വിശ്വാസികളുടെ സഹോദരത്വവും പങ്കിടലും പ്രതിഫലിപ്പിച്ച് പ്രഭാതഭക്ഷണവും എല്ലാവര്ക്കുമായി ഒരുക്കിയിരുന്നു.
പാമ്പാടി തിരുമേനിയുടെ ആത്മീയ പാത പിന്തുടരാനും, വിശ്വാസത്തില് ഐക്യത്തോടെ മുന്നോട്ട് പോകാനും ഈ ഓര്മ്മപ്പെരുന്നാള് വിശ്വാസികള്ക്ക് പ്രചോദനമായി.
The 61st anniversary of Pampady Thirumeni was celebrated with devotion at the Urslem Palace Chapel.
