മാവേലിക്കര: പരിസ്ഥിതി സംരക്ഷണത്തിന്റെ അടിയന്തര പ്രാധാന്യം വിളിച്ചോതുന്ന ”ദി ഗ്രീന് അലേര്ട്ട്” എന്ന ഡോക്യുമെന്ററി ഫിലിം ആഗോള തലത്തില് ശ്രദ്ധ നേടുന്നു. ചുരുങ്ങിയ സമയത്തിനുള്ളില് ശക്തമായ സന്ദേശം കൈമാറുന്ന ഈ ഡോക്യുമെന്ററി, ലോകമെമ്പാടുമുള്ള സര്ക്കാരുകളുടെയും പരിസ്ഥിതി സംഘടനകളുടെയും ശ്രദ്ധയില്പ്പെടുന്ന പ്രധാന വിഷയങ്ങളെ ആവിഷ്കരിക്കുന്നു.
പ്രൊഫ. കെ. പി. മാത്യു രചനയും കെ. സി. തുളസിദാസ് സംവിധാനവും നിര്വഹിച്ച ചിത്രം, ബോസ്റ്റണിലെ കുര്യന് ഫൗണ്ടേഷന്റെ ബാനറില് തമ്പി കുര്യന് നിര്മ്മിച്ചതാണ്. 150-ലധികം കലാകാരന്മാരുടെ പങ്കാളിത്തത്തോടെയാണ് ചിത്രം സാക്ഷാത്കരിച്ചത്. ആധുനിക സാങ്കേതിക വിദ്യകളുടെ സഹായത്തോടെ ദൃശ്യാവിഷ്കാരം സവിശേഷമാക്കിയിട്ടുണ്ട്. മലയാളം, ഇംഗ്ലീഷ്, ഹിന്ദി ഉള്പ്പെടെ പത്ത് ഭാഷകളില് ചിത്രം പുറത്തിറങ്ങും.
ഐക്യരാഷ്ട്രസഭയുടെ പരിസ്ഥിതി വിഭാഗം, വിവിധ അന്താരാഷ്ട്ര സംഘടനകള്, ചലച്ചിത്രമേളകള് എന്നിവിടങ്ങളില് ചിത്രം പ്രദര്ശിപ്പിക്കാന് പദ്ധതിയുണ്ട്. പരിസ്ഥിതി വിഷയങ്ങളില് വിദഗ്ധരും സിനിമാ മേഖലയിലെ പ്രമുഖരും പങ്കെടുത്ത പ്രിവ്യൂ ഷോയില് ചിത്രത്തിന് മികച്ച പ്രതികരണമാണ് ലഭിച്ചത്.
ജലക്ഷാമം, വനനശീകരണം, കാട്ടുതീ, വന്യമൃഗങ്ങളുടെ ആക്രമണം, വായുമലിനീകരണം എന്നിവയുള്പ്പെടെയുള്ള ഭീഷണികളെ ചിത്രം ശക്തമായി മുന്നോട്ടുവെക്കുന്നു. മനുഷ്യനും പ്രകൃതിയും നേരിടുന്ന ഭാവി പ്രതിസന്ധികളെ യാഥാര്ത്ഥ്യബോധത്തോടെ അവതരിപ്പിക്കുന്നതാണ് ചിത്രത്തിന്റെ പ്രധാന സവിശേഷത. കാട്ടുതീയില് നിന്ന് രക്ഷപ്പെടുന്ന മനുഷ്യരും മൃഗങ്ങളും, അപ്രതീക്ഷിത വെള്ളപ്പൊക്കവും തുടങ്ങിയ ദൃശ്യങ്ങള് പ്രേക്ഷകര്ക്കിടയില് ശക്തമായ പ്രതികരണം സൃഷ്ടിക്കുന്നു.
ലൈവ് ആക്ഷനും എഐ സാങ്കേതികവിദ്യയും സംയോജിപ്പിച്ചുള്ള അവതരണം സിനിമയ്ക്ക് വ്യത്യസ്തമായ ദൃശ്യഭാഷ നല്കുന്നു. പരിസ്ഥിതി സംരക്ഷണം അനിവാര്യമാണെന്ന സന്ദേശം പ്രേക്ഷകരില് ബോധവല്ക്കരണമായി എത്തിക്കുന്നതില് ചിത്രം വിജയിച്ചിരിക്കുന്നു.പ്രത്യേകിച്ചും ലോക പരിസ്ഥിതി നിരീക്ഷകരായ ജോണ് മോയര്, അല് ഗോര്, വനേസ്സ നകാട്ടെ, ഗ്രെറ്റതങ് ബര്ഗ്, സ്വാമി വിവേകാനന്ദന്, ഗാന്ധിജി തുടങ്ങിയവരുടെ രൂപസാദൃശ്യമുള്ളവരെ അണിനിരത്തി അവര് നടത്തുന്ന മുന്നറിയിപ്പുകളും ആഹ്വാനങ്ങളും കോരിത്തരിപ്പിക്കുന്നവയാണ്.
”ദി ഗ്രീന് അലേര്ട്ട്” ഹ്രസ്വചിത്രത്തിന്റെ ആദ്യ പ്രദര്ശനം 2026 ഏപ്രില് 1-ന് രാവിലെ 10.30-ന് മാവേലിക്കര സാന്ദ്ര തിയേറ്ററില് നടന്നു. പ്രീവ്യു കണ്ടവരെല്ലാം വളരെ പ്രോത്സാഹജനകമായ അഭിപ്രായങ്ങള് രേഖപ്പെടുത്തുകയുണ്ടായി. അവരുടെ കാഴ്ചപ്പാടില്, പരിസ്ഥിതി സംരക്ഷണത്തിന്റെ ആവശ്യകതയെപ്പറ്റി ഇത്രയും ഗാഢമായി അവബോധം സൃഷ്ടിക്കുന്ന ഈ ഡോകുമെന്ററി ലോകശ്രദ്ധ പിടിച്ചുപറ്റുമെന്നും, നിരവധി അംഗീകാരങ്ങള് തേടിയെത്തുമെന്നും അവര് അവകാശപ്പെടുന്നു
‘The Green Alert’ documentary film: A strong warning against the global environmental crisis
