കൊച്ചി: 2026-ലെ നിയമസഭാ തിരഞ്ഞെടുപ്പിൽ യു.ഡി.എഫ് മികച്ച വിജയം കൈവരിച്ചതിന് പിന്നാലെ കേരളത്തിൽ മുഖ്യമന്ത്രി സ്ഥാനത്തെച്ചൊല്ലിയുള്ള കോൺഗ്രസിലെ ആഭ്യന്തര തർക്കം പുതിയ തലത്തിലേക്ക്. എറണാകുളം പള്ളുരുത്തിയിലാണ് ഇപ്പോൾ വി.ഡി. സതീശനെയും ഷാഫി പറമ്പിലിനെയും പിന്തുണച്ചുകൊണ്ടുള്ള പുതിയ ഫ്ലക്സ് ബോർഡുകൾ പ്രത്യക്ഷപ്പെട്ടിരിക്കുന്നത്. ‘വി.ഡി.എസ് കേരളം ഭരിക്കട്ടെ, ഷാഫി പറമ്പിൽ കോൺഗ്രസിനെ നയിക്കട്ടെ’ എന്ന വാചകങ്ങളാണ് ഫ്ലക്സിലുള്ളത്. ഗ്രൂപ്പ് പോര് മുറുകുന്നതിനിടയിൽ സതീശനെയും ഷാഫിയെയും ഒരുമിച്ച് ഉയർത്തിക്കാട്ടിയുള്ള ഈ നീക്കം രാഷ്ട്രീയ വൃത്തങ്ങളിൽ വലിയ ചർച്ചയായിട്ടുണ്ട്.
മുഖ്യമന്ത്രി പദത്തിനായി വി.ഡി. സതീശൻ, കെ.സി. വേണുഗോപാൽ, രമേശ് ചെന്നിത്തല എന്നിവരുടെ അനുയായികൾ വ്യത്യസ്ത ചേരികളായി തിരിഞ്ഞ് പോസ്റ്റർ യുദ്ധം നടത്തുന്നതിനിടയിലാണ് പള്ളുരുത്തിയിലെ ഈ പുതിയ ഫ്ലക്സ്. നേരത്തെ വിവിധയിടങ്ങളിൽ വ്യക്തിഗതമായി നേതാക്കളെ പിന്തുണച്ച് ബോർഡുകൾ ഉയർന്നിരുന്നുവെങ്കിലും, ഭരണ-സംഘടനാ തലപ്പത്തേക്ക് സതീശനെയും ഷാഫിയെയും ഒരേപോലെ നിർദ്ദേശിക്കുന്ന രീതിയിലുള്ള പരസ്യമായ അവകാശവാദം ഇതാദ്യമാണ്.
