കോഴിക്കോട്/കല്പറ്റ: സംസ്ഥാനത്ത് കനത്ത കാറ്റും മഴയും തുടരുന്ന സാഹചര്യത്തിൽ നാളെ (ജൂലൈ 9, വ്യാഴാഴ്ച) കോഴിക്കോട്, വയനാട് ജില്ലകളിലെ എല്ലാ വിദ്യാഭ്യാസ സ്ഥാപനങ്ങൾക്കും അതത് ജില്ലാ കളക്ടർമാർ അവധി പ്രഖ്യാപിച്ചു. കേന്ദ്ര കാലാവസ്ഥാ വകുപ്പ് കനത്ത മഴ മുന്നറിയിപ്പ് നൽകിയ പശ്ചാത്തലത്തിൽ, വിദ്യാർത്ഥികളുടെ സുരക്ഷ മുൻനിർത്തിയാണ് മുൻകരുതൽ നടപടിയായി അവധി നൽകിയിരിക്കുന്നത്.
പ്രൊഫഷണൽ കോളേജുകൾ, സ്കൂളുകൾ, മദ്രസകൾ, ട്യൂഷൻ സെന്ററുകൾ, അംഗനവാടികൾ എന്നിവയുൾപ്പെടെയുള്ള എല്ലാ വിദ്യാഭ്യാസ സ്ഥാപനങ്ങൾക്കും അവധി ബാധകമായിരിക്കും. അതേസമയം, മുൻകൂട്ടി നിശ്ചയിച്ച പ്രകാരമുള്ള സർവകലാശാലാ പരീക്ഷകൾക്കും പിഎസ്സി പരീക്ഷകൾക്കും ഈ അവധി ബാധകമായിരിക്കില്ലെന്ന് അധികൃതർ വ്യക്തമാക്കി. പരീക്ഷകൾ മാറ്റമില്ലാതെ നടക്കും. കുട്ടികളുടെ പഠനം തടസ്സപ്പെടാതിരിക്കാൻ സ്കൂളുകൾക്ക് ഓൺലൈൻ ക്ലാസുകൾ ക്രമീകരിക്കാവുന്നതാണ്.
മലയോര മേഖലകളിലും കനത്ത മഴ തുടരുന്ന സാഹചര്യത്തിൽ പ്രത്യേകിച്ച് വയനാട്ടിലെ ചുരം മേഖലകളിലും കോഴിക്കോട്ടെ ഉൾപ്രദേശങ്ങളിലും അതീവ ജാഗ്രത പുലർത്താൻ ദുരന്തനിവാരണ അതോറിറ്റി നിർദ്ദേശം നൽകിയിട്ടുണ്ട്. ജനങ്ങൾ അനാവശ്യ യാത്രകൾ ഒഴിവാക്കണമെന്നും പുഴകളിലും ജലാശയങ്ങളിലും ഇറങ്ങരുതെന്നും അധികൃതർ മുന്നറിയിപ്പ് നൽകി.
