പ്രസാദ് തീയാടിക്കൽ
പാറ്റ്ന: ബിഹാറിന്റെ പ്രശസ്ത കാർഷിക ഉൽപ്പന്നമായ മിഥില മഖാന (Fox Nuts) ആദ്യമായി കടൽമാർഗം കാനഡയിലേക്ക് കയറ്റുമതി ചെയ്തു. ദർഭംഗയിൽ നിന്ന് രണ്ട് കണ്ടെയ്നറുകളിലായി 7 മെട്രിക് ടൺ മൂല്യവർധിത (Value-added) ഫ്ലേവർഡ് മഖാനയാണ് മുണ്ട്ര തുറമുഖം വഴി കാനഡയിലേക്ക് അയച്ചത്. ബിഹാറിന്റെ കാർഷിക കയറ്റുമതി രംഗത്തെ ചരിത്രനേട്ടമായാണ് ഈ സംരംഭം വിലയിരുത്തപ്പെടുന്നത്.
കൃഷി-സംസ്കരിച്ച ഭക്ഷ്യ ഉൽപ്പന്നങ്ങളുടെ കയറ്റുമതി പ്രോത്സാഹിപ്പിക്കുന്ന APEDAയുടെ നേതൃത്വത്തിലായിരുന്നു കയറ്റുമതി. ആരോഗ്യഗുണങ്ങൾ ഏറെയുള്ളതിനാൽ ലോകമെമ്പാടും “സൂപ്പർ ഫുഡ്” എന്ന പേരിൽ ശ്രദ്ധ നേടിയ മഖാനയ്ക്ക് അമേരിക്കയ്ക്കു പിന്നാലെ കാനഡയിലും വർധിച്ചുവരുന്ന ആവശ്യകതയുണ്ട്.
ബിഹാറിലെ മിഥില മേഖലയാണ് ഇന്ത്യയിലെ മഖാനയുടെ പ്രധാന ഉൽപാദനകേന്ദ്രം. ജി.ഐ. (Geographical Indication) അംഗീകാരം നേടിയ ഈ ഉൽപ്പന്നത്തിന്റെ ആദ്യ കടൽ കയറ്റുമതി സംസ്ഥാനത്തെ കർഷകർക്ക് പുതിയ അന്താരാഷ്ട്ര വിപണി തുറക്കുമെന്നും കാർഷിക മേഖലയ്ക്ക് വലിയ ഉത്തേജനമാകുമെന്നും അധികൃതർ പ്രതീക്ഷ പ്രകടിപ്പിച്ചു. പ്രധാനമന്ത്രിയുടെ ഓഫീസും ബിഹാർ മുഖ്യമന്ത്രിയും ഈ നേട്ടത്തെ അഭിനന്ദിച്ചിട്ടുണ്ട്.
