ടൊറന്റോ: കാനഡയിലെ ലിബറല് എം.പി സല്മ സഹിദിന്റെ സ്കാര്ബറോയിലെ വസതിക്ക് മുന്നില് നിര്ത്തിയിട്ടിരുന്ന വാഹനങ്ങള്ക്ക് തീയിട്ട സംഭവത്തില് ടൊറന്റോ പോലീസ് അന്വേഷണം ആരംഭിച്ചു. സംഭവം മനഃപൂര്വമുള്ള തീവയ്പ്പ് ആണെന്നാണ് പോലീസിന്റെ പ്രാഥമിക നിഗമനം.
വ്യാഴാഴ്ച പുലര്ച്ചെ 1:20-നും 1:30-നും ഇടയില് ബെല്ലമി റോഡ് നോര്ത്തിനും ലോറന്സ് അവന്യൂ ഈസ്റ്റിനും സമീപമാണ് സംഭവം. നിരവധി വാഹനങ്ങള്ക്ക് തീപിടിച്ചതായുള്ള വിവരം ലഭിച്ചതിനെ തുടര്ന്ന് ടൊറന്റോ പോലീസും ഫയര് സര്വീസും സ്ഥലത്തെത്തി തീയണച്ചു. പോലീസ് പറയുന്നതനുസരിച്ച് മൂന്ന് വാഹനങ്ങള്ക്ക് കേടുപാടുകള് സംഭവിച്ചിട്ടുണ്ട്.
തന്റെ കാറിനും മറ്റൊരു വാഹനത്തിനും തീയിട്ടതായി Scarborough Centre-Don Valley East മണ്ഡലത്തെ പ്രതിനിധീകരിക്കുന്ന സല്മ സഹിദ് അറിയിച്ചു. തീ കണ്ട മകനും അയല്വാസികളും 911-ല് വിളിച്ച് വിവരം അറിയിക്കുകയായിരുന്നു. രണ്ട് വാഹനങ്ങളും പൂര്ണമായി നശിച്ചെങ്കിലും വീടിന് കേടുപാടുകളില്ലെന്നും കുടുംബാംഗങ്ങള് എല്ലാവരും സുരക്ഷിതരാണെന്നും സഹിദ് വ്യക്തമാക്കി.
ആക്രമണത്തിന് പിന്നിലെ കാരണം സംബന്ധിച്ച് ഇപ്പോള് ഊഹാപോഹങ്ങള്ക്ക് തയ്യാറല്ലെന്നും പോലീസ് അന്വേഷണത്തിന്റെ ഫലം കാത്തിരിക്കുകയാണെന്നും സഹിദ് പറഞ്ഞു. ഇത്തരം ആക്രമണങ്ങള് അംഗീകരിക്കാനാവില്ലെന്നും ജനങ്ങളെ സേവിക്കുന്ന തന്റെ പ്രവര്ത്തനങ്ങളില് നിന്ന് ഇതൊന്നും തന്നെ പിന്തിരിപ്പിക്കില്ലെന്നും അവര് വ്യക്തമാക്കി.
സംഭവത്തെ കനേഡിയന് പ്രധാനമന്ത്രി മാര്ക്ക് കാര്ണി ശക്തമായി അപലപിച്ചു. ഇത് ”ഭീരുത്വപരമായ അക്രമവും ഭീഷണിപ്പെടുത്തലുമാണ്” എന്ന് വിശേഷിപ്പിച്ച കാര്ണി, ഇത്തരം പ്രവൃത്തികള് കാനഡയില് അംഗീകരിക്കാനാവില്ലെന്ന് പറഞ്ഞു. സഹിദും കുടുംബവും സുരക്ഷിതരാണെന്നതില് ആശ്വാസമുണ്ടെന്നും അന്വേഷണത്തില് ടൊറന്റോ പോലീസിന് പൂര്ണ പിന്തുണയുണ്ടെന്നും അദ്ദേഹം അറിയിച്ചു.
ടൊറന്റോ മേയര് ഒലിവിയ ചൗവും സംഭവത്തെ അപലപിച്ചു. അക്രമവും ഭീഷണിപ്പെടുത്തലും ഒരിക്കലും സഹിക്കാനാവില്ലെന്ന് അവര് വ്യക്തമാക്കി.
സംഭവത്തില് ആര്ക്കും പരിക്കേറ്റിട്ടില്ല. നിലവില് പ്രതികളെക്കുറിച്ചുള്ള വിവരങ്ങളൊന്നും പോലീസ് പുറത്തുവിട്ടിട്ടില്ല. സിസിടിവി ദൃശ്യങ്ങള് പരിശോധിക്കുകയും സാക്ഷികളില് നിന്ന് വിവരങ്ങള് ശേഖരിക്കുകയും ചെയ്തുവരികയാണ്. അന്വേഷണം തുടരുന്നു.
വാര്ത്ത: പ്രസാദ് തീയാടിക്കല്
MP Salma Zahid’s car set on fire in Toronto; sabotage suspected.
