ന്യൂഡല്‍ഹി: അമേരിക്ക ലോകത്തിലെ ഏറ്റവും ദുര്‍ബലമായ രാജ്യമാണെന്ന് ഇറാന്‍ പരമോന്നത നേതാവ് മൊജ്തബ ഖമേനിയുടെ പ്രതിനിധി അബ്ദുല്‍ മജീദ് ഹക്കീം ഇലാഹി. ഇറാനെതിരായ യുദ്ധത്തില്‍ ലക്ഷ്യങ്ങളൊന്നും കൈവരിക്കാന്‍ അമേരിക്കയ്ക്ക് കഴിഞ്ഞില്ലെന്നും അദ്ദേഹം ആരോപിച്ചു. എന്‍ഡിടിവി വേള്‍ഡ് സമ്മിറ്റ് 2026ല്‍ സംസാരിക്കുകയായിരുന്നു അദ്ദേഹം.
ഫെബ്രുവരി 28ന് ഇറാനെതിരെ ആക്രമണം ആരംഭിച്ചപ്പോള്‍ അമേരിക്കയ്ക്ക് മൂന്ന് പ്രധാന ലക്ഷ്യങ്ങളുണ്ടായിരുന്നുവെന്നാണ് ഇലാഹിയുടെ ആരോപണം. ഇറാനിലെ ഭരണകൂടത്തെ മാറ്റുക, രാജ്യത്തെ അഞ്ച് ഭാഗങ്ങളായി വിഭജിക്കുക, ഇറാന്റെ എണ്ണസമ്പത്ത് നിയന്ത്രണത്തിലാക്കുക എന്നിവയായിരുന്നു ലക്ഷ്യങ്ങള്‍. എന്നാല്‍ മൂന്ന് ദിവസത്തിനുള്ളില്‍ ലക്ഷ്യങ്ങള്‍ കൈവരിക്കുമെന്ന് അവകാശപ്പെട്ട അമേരിക്കയ്ക്ക് ഒന്നും നേടാനായില്ലെന്നും അദ്ദേഹം പറഞ്ഞു.
അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ പ്രസ്താവനകളെയും ഇലാഹി പരിഹസിച്ചു. ഓരോ സമയത്തും ട്രംപ് വ്യത്യസ്തമായ പ്രസ്താവനകളാണ് നടത്തുന്നതെന്നും എന്നാല്‍ യുദ്ധത്തിലൂടെ ലക്ഷ്യങ്ങളൊന്നും നേടാന്‍ അമേരിക്കയ്ക്ക് കഴിഞ്ഞിട്ടില്ലെന്നും അദ്ദേഹം പറഞ്ഞു. അമേരിക്കയും ഇസ്രായേലും നടത്തിയ ആക്രമണങ്ങളില്‍ നിരപരാധികള്‍ കൊല്ലപ്പെട്ടതായും വീടുകള്‍, സ്‌കൂളുകള്‍, സര്‍വകലാശാലകള്‍, ഫാക്ടറികള്‍ എന്നിവ തകര്‍ന്നതായും ഇലാഹി ആരോപിച്ചു.
അതേസമയം, ഇറാന്‍ പരമോന്നത നേതാവ് മൊജ്തബ ഖമേനി പൂര്‍ണ ആരോഗ്യവാനാണെന്നും ഔദ്യോഗിക ചുമതലകള്‍ നിര്‍വഹിക്കുന്നുണ്ടെന്നും ഇലാഹി അവകാശപ്പെട്ടു. ഇറാന്‍ പ്രസിഡന്റ് മസൂദ് പെസെഷ്‌കിയാനുമായി മൊജ്തബ ഏഴ് മണിക്കൂര്‍ നീണ്ട കൂടിക്കാഴ്ച നടത്തിയതായും പാര്‍ലമെന്റ് സ്പീക്കര്‍ മുഹമ്മദ് ബാഗര്‍ ഗാലിബാഫുമായും കൂടിക്കാഴ്ച നടത്തിയതായും അദ്ദേഹം പറഞ്ഞു. മൊജ്തബയുടെ ആരോഗ്യനില മികച്ചതാണെന്ന് അദ്ദേഹത്തെ നേരില്‍ കണ്ട സുഹൃത്തുക്കള്‍ അറിയിച്ചതായും ഇലാഹി വ്യക്തമാക്കി.
സുരക്ഷാ കാരണങ്ങളാലാണ് മൊജ്തബ ഖമേനി മാധ്യമങ്ങള്‍ക്ക് മുന്നില്‍ പ്രത്യക്ഷപ്പെടാത്തതെന്നാണ് ഇലാഹിയുടെ വിശദീകരണം. ചില രാത്രികളില്‍ അദ്ദേഹം തെരുവിലിറങ്ങാറുണ്ടെന്നും ഇറാനില്‍ നടന്ന ജനകീയ പ്രകടനങ്ങളില്‍ പങ്കെടുത്തിട്ടുണ്ടെന്നും അദ്ദേഹം അവകാശപ്പെട്ടു. എന്നാല്‍ മൊജ്തബയുടെ ആരോഗ്യനിലയും പൊതുപരിപാടികളിലെ പങ്കാളിത്തവും സംബന്ധിച്ച ഈ അവകാശവാദങ്ങള്‍ സ്വതന്ത്രമായി സ്ഥിരീകരിച്ചിട്ടില്ല.
‘America is the weakest country in the world’; Iran launches sharp criticism against Trump
