മാസപ്പടി കേസിൽ സർക്കാരിന്റെ നിലപാടുകളെയും മുന്നണി ഏകോപനത്തെയും ചൊല്ലി കോൺഗ്രസിനുള്ളിൽ ചേരിപ്പോര് കനക്കുന്നതിനിടയിൽ നേതാക്കൾക്ക് പരസ്യ പ്രസ്താവന വിലക്കി കെ.പി.സി.സി പ്രസിഡന്റ് സണ്ണി ജോസഫ് രംഗത്തെത്തി. പിണറായി വിജയനെ രക്ഷിക്കാൻ യു.ഡി.എഫ് സർക്കാർ ശ്രമിക്കുന്നുവെന്ന താഴെത്തട്ടിലെ പ്രവർത്തകരുടെയും യുവനേതാക്കളുടെയും വികാരം ശക്തമാകുന്നതിനിടയിലാണ് ഈ അടിയന്തര നടപടി. പിണറായിക്കെതിരായ കേസ് ഇല്ലാതാക്കാൻ സർക്കാർ ശ്രമിച്ചിട്ടില്ലെന്നും, സുപ്രീം കോടതി വിധികളുടെ അടിസ്ഥാനത്തിൽ പക്വതയാർന്ന നിയമപരമായ തീരുമാനമാണ് സ്വീകരിച്ചതെന്നും അദ്ദേഹം ന്യായീകരിച്ചു. എന്നാൽ ഉമ്മൻചാണ്ടിക്ക് ലഭിക്കാത്ത നീതി പിണറായിക്ക് എന്തിനാണെന്ന മാത്യു കുഴൽനാടന്റെ ചോദ്യം ഏറ്റെടുത്ത് കോട്ടയത്ത് ഫ്ലെക്സുകൾ ഉൾപ്പെടെ സ്ഥാപിച്ച് പ്രവർത്തകർ പ്രതിഷേധം കടുപ്പിച്ചിട്ടുണ്ട്.
പാർട്ടിയിൽ ചേരിപ്പോര് ശക്തമാക്കുന്നതിൽ അടൂർ പ്രകാശിന്റെ വിമർശനങ്ങൾ വലിയ ചർച്ചയായി മാറിയിട്ടുണ്ട്. സർക്കാരിന്റെ പ്രധാന തീരുമാനങ്ങളിൽ മുഖ്യമന്ത്രി കൂടിയാലോചിക്കുന്നില്ലെന്ന് ആരോപിച്ച അടൂർ പ്രകാശ്, വിമർശിച്ചതിന്റെ പേരിൽ തന്നെ കൺവീനർ സ്ഥാനത്തുനിന്ന് പുകച്ചുപുറത്താക്കാൻ ശ്രമം നടക്കുന്നുവെന്നും ആവർത്തിച്ചു. എന്നാൽ സ്ഥാനമോഹികൾക്ക് ഇഷ്ടപ്പെട്ടത് ലഭിച്ചില്ലെങ്കിൽ എല്ലാം നശിപ്പിച്ചുകളയുമെന്ന് കരുതരുതെന്ന് മുഖ്യമന്ത്രിയെ പിന്തുണച്ചുകൊണ്ട് ഐ.എൻ.ടി.യു.സി സംസ്ഥാന പ്രസിഡന്റ് ആർ. ചന്ദ്രശേഖരനും വ്യക്തമാക്കി. ഇതിനിടയിലാണ് വിവാദ പ്രസ്താവനകൾ ആരുടെ ഭാഗത്തുനിന്നായാലും അത് പാർട്ടിക്ക് ഗുണകരമല്ലെന്നും, അഭിപ്രായവ്യത്യാസങ്ങൾ പാർട്ടി വേദികളിൽ പറയണമെന്നും ആവശ്യപ്പെട്ട് കെ.പി.സി.സി അധ്യക്ഷൻ കർശന വിലക്കേർപ്പെടുത്തിയത്.
ക്യാബിനറ്റ് പദവി തീരുമാനങ്ങളിലെ അഭിപ്രായം പാർട്ടി വേദികളിൽ പറയുമെന്ന് കെ.സി. വേണുഗോപാൽ ഡൽഹിയിൽ വ്യക്തമാക്കിയ അതേ ദിവസമാണ് അടൂർ പ്രകാശ് പരസ്യമായി രംഗത്തെത്തിയത്. ഇത് കെ.സി. വേണുഗോപാലിനെ ലക്ഷ്യമിട്ടാണെന്ന തരത്തിൽ വി.ഡി. സതീശൻ പക്ഷം പ്രചാരണം തുടങ്ങിയിരുന്നു. ഇതിന് പിന്നാലെ തങ്ങളെ എല്ലാത്തിനും ഉന്നമിടേണ്ടതില്ലെന്ന് കെ.സി. വേണുഗോപാലും മറുപടി നൽകി. എന്നാൽ മുഖ്യമന്ത്രിയെ വിമർശിക്കുന്നതിന് പിന്നിൽ കർട്ടന് പിറകിൽ മറ്റാരോ ഉണ്ടെന്ന ആരോപണവുമായി ആരോഗ്യമന്ത്രി കെ. മുരളീധരനും രംഗത്തെത്തിയത് കോൺഗ്രസിലെ ഗ്രൂപ്പ് പോര് കൂടുതൽ സങ്കീർണ്ണമാക്കിയിരിക്കുകയാണ്. ഇതിനിടെ വൈദ്യുതി നിരക്ക് വർധനവിലും സണ്ണി ജോസഫ് വ്യക്തത വരുത്തി. നിരക്ക് കൂട്ടാൻ തീരുമാനിച്ചിട്ടില്ലെന്നാണ് വൈദ്യുതി മന്ത്രി പറഞ്ഞത്.
