ചെന്നൈ: സ്പെഷ്യൽ ഇന്റൻസീവ് റിവിഷനും (എസ്.ഐ.ആർ) മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനുമെതിരെ കോക്ക്റോച്ച് ജനതാ പാർട്ടി (സി.ജെ.പി) നടത്തുന്ന പ്രക്ഷോഭങ്ങൾക്ക് പൂർണ്ണ പിന്തുണ പ്രഖ്യാപിച്ച് ഡി.എം.കെ. പാർട്ടി അധ്യക്ഷനും തമിഴ്‌നാട് മുഖ്യമന്ത്രിയുമായ എം.കെ. സ്റ്റാലിന്റെ അധ്യക്ഷതയിൽ ചെന്നൈയിൽ ചേർന്ന ഡി.എം.കെ എം.പിമാരുടെ യോഗത്തിലാണ് സി.ജെ.പിക്ക് പിന്തുണ നൽകാൻ തീരുമാനിച്ചത്.
ഇതോടൊപ്പം, തെരഞ്ഞെടുപ്പ് കമ്മീഷനെതിരായ രാഷ്ട്രീയ പ്രക്ഷോഭങ്ങളിൽ കോൺഗ്രസ് സ്വീകരിക്കുന്ന നിലപാടിനോട് വിയോജിപ്പ് പ്രകടിപ്പിച്ച ഡി.എം.കെ, കോൺഗ്രസിൽ നിന്ന് അകലം പാലിക്കാനും തീരുമാനിച്ചു.
മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ ഉടനടി രാജിവെക്കുക, എസ്.ഐ.ആർ നടപടികൾ പൂർണ്ണമായി റദ്ദാക്കുക, വോട്ടെടുപ്പിൽ ബാലറ്റ് പേപ്പർ രീതി പുനഃസ്ഥാപിക്കുക എന്നീ പ്രധാന ആവശ്യങ്ങൾ ഉന്നയിക്കുന്ന പ്രമേയവും യോഗത്തിൽ പാസാക്കി. വോട്ടർപട്ടിക പരിഷ്കരണ വിഷയത്തിൽ കോൺഗ്രസും ഭരണകക്ഷിയായ തമിഴക വെട്രി കഴകവും (ടി.വി.കെ) ഇരട്ടത്താപ്പാണ് സ്വീകരിക്കുന്നതെന്നും ഡി.എം.കെ രൂക്ഷമായി ആരോപിച്ചു.
ഡി.എം.കെ എപ്പോഴും ഇന്ത്യയിലെ യുവതയ്ക്കൊപ്പം ഉറച്ചുനിൽക്കുമെന്ന് പാർട്ടി ഡെപ്യൂട്ടി ജനറൽ സെക്രട്ടറിയും പാർലമെന്ററി പാർട്ടി നേതാവുമായ കനിമൊഴി കരുണാനിധി വ്യക്തമാക്കി. ചെന്നൈയിൽ എസ്.ഐ.ആറിനെതിരെ നടന്ന വിദ്യാർത്ഥി പ്രക്ഷോഭത്തിൽ പങ്കെടുത്ത ശേഷമായിരുന്നു അവരുടെ പ്രതികരണം.
