വാഷിംഗ്ടണ്‍: അമേരിക്കയിലെ പ്രമുഖ ഹാക്കിങ് അന്വേഷണത്തിനിടെ കനേഡിയന്‍ സൈബര്‍ സുരക്ഷാ മേഖലയിലെ ഉന്നത ഉദ്യോഗസ്ഥന്‍ എഡ്വേര്‍ഡ് ദുബ്രോവ്‌സ്‌കിയെ എഫ്ബിഐ അറസ്റ്റ് ചെയ്തു. സ്വന്തം ക്ലയന്റുകളില്‍നിന്ന് പണം തട്ടിയെടുക്കാന്‍ സൈബര്‍ കുറ്റവാളികളുമായി ചേര്‍ന്ന് പ്രവര്‍ത്തിച്ചെന്നാണ് യുഎസ് പ്രോസിക്യൂഷന്റെ ആരോപണം. ഷൈനി ഹണ്ടേഴ്‌സ് എന്ന കുപ്രസിദ്ധ സൈബര്‍ കുറ്റകൃത്യ സംഘവുമായി ബന്ധമുള്ളവരുമായി ദുബ്രോവ്‌സ്‌കി സഹകരിച്ചിരുന്നുവെന്നാണ് സംശയം. ഒക്ടോബര്‍ ആദ്യം ഫിലാഡല്‍ഫിയയില്‍ സൈബര്‍ സുരക്ഷാ സമ്മേളനത്തില്‍ പങ്കെടുക്കാനെത്തിയപ്പോഴാണ് 54 കാരനായ ഇയാള്‍ പിടിയിലായത്.
ഫിലാഡല്‍ഫിയയിലെ ഫെഡറല്‍ കോടതിയില്‍ ഒക്ടോബര്‍ എട്ടിന് നടന്ന പ്രാഥമിക വാദത്തിനിടെ, ദുബ്രോവ്‌സ്‌കി സ്വന്തം ക്ലയന്റുകളെയും ബിസിനസ് പങ്കാളികളെയും ഉള്‍പ്പെടുത്തി തട്ടിപ്പ് നടത്തിയെന്നാണ് അസിസ്റ്റന്റ് യുഎസ് അറ്റോര്‍ണി ആന്റണി കരിസിമി ആരോപിച്ചത്. കുറ്റകരമായ ഗൂഢാലോചന, ഭീഷണിയിലൂടെ വാണിജ്യപ്രവര്‍ത്തനങ്ങളില്‍ ഇടപെടല്‍ തുടങ്ങിയ കുറ്റങ്ങളാണ് ഇയാള്‍ക്കെതിരെ ചുമത്തിയിരിക്കുന്നത്. ക്രിപ്‌റ്റോകറന്‍സി ഇടപാടുകളിലും കുറ്റകൃത്യങ്ങളുമായി ബന്ധപ്പെട്ട വ്യക്തികളുമായുള്ള ബന്ധങ്ങളിലും ഇയാള്‍ ഏര്‍പ്പെട്ടിരുന്നുവെന്നും പ്രോസിക്യൂഷന്‍ ആരോപിച്ചു. ഇടപാടുകളില്‍ മോനേറോ എന്ന ക്രിപ്‌റ്റോകറന്‍സി ഉപയോഗിച്ചിരുന്നതായും ഇത് ഇടപാടുകള്‍ കണ്ടെത്തുന്നത് പ്രയാസകരമാക്കുന്നുവെന്നും പ്രോസിക്യൂട്ടര്‍ കോടതിയില്‍ പറഞ്ഞു.
ഷൈനി ഹണ്ടേഴ്‌സ് സംഘം കഴിഞ്ഞ മാസം എഫ്ബിഐയുടെ തൊഴില്‍ അപേക്ഷാ പോര്‍ട്ടല്‍ ഹാക്ക് ചെയ്ത് വലിയ തോതില്‍ വിവരങ്ങള്‍ മോഷ്ടിച്ചതായി അവകാശപ്പെട്ടിരുന്നു. മോഷ്ടിച്ച രഹസ്യവിവരങ്ങള്‍ പുറത്തുവിടാതിരിക്കാന്‍ പണം ആവശ്യപ്പെടുന്നതാണ് സംഘത്തിന്റെ പതിവ് രീതിയെന്നാണ് റിപ്പോര്‍ട്ട്. എന്നാല്‍ ദുബ്രോവ്‌സ്‌കിക്കെതിരായ അന്വേഷണത്തിന്റെ വിശദാംശങ്ങള്‍ ഉള്‍ക്കൊള്ളുന്ന എഫ്ബിഐയുടെ ക്രിമിനല്‍ പരാതി നിലവില്‍ രഹസ്യമായി സൂക്ഷിച്ചിരിക്കുകയാണ്. അറസ്റ്റിലായ കനേഡിയന്‍ പൗരനുമായി ബന്ധപ്പെട്ട വിവരങ്ങള്‍ അറിയാമെന്ന് കാനഡയിലെ റോയല്‍ കനേഡിയന്‍ മൗണ്ടഡ് പൊലീസ് അറിയിച്ചു. കേസില്‍ കുറ്റാരോപിതനായ വ്യക്തിയുടെ പങ്ക് സംബന്ധിച്ച കൂടുതല്‍ വിവരങ്ങള്‍ ഇതുവരെ പരസ്യപ്പെടുത്തിയിട്ടില്ല.
ആരോപണങ്ങള്‍ പൂര്‍ണമായും തെളിയിക്കപ്പെട്ടിട്ടില്ലെന്നും തന്റെ കക്ഷി നിരപരാധിത്വം തെളിയിക്കാന്‍ നിയമപോരാട്ടം നടത്തുമെന്നും കോടതി നിയോഗിച്ച പ്രതിഭാഗം അഭിഭാഷകന്‍ ടിം റൈറ്റ് വ്യക്തമാക്കി. സൈബര്‍ സുരക്ഷാ രംഗത്ത് അറിയപ്പെടുന്ന, ബഹുമാനിക്കപ്പെടുന്ന വ്യവസായിയാണ് ദുബ്രോവ്‌സ്‌കിയെന്നും തന്റെ പേര് കളങ്കപ്പെടാതിരിക്കാന്‍ അദ്ദേഹം കേസിനെ നേരിടുമെന്നും അഭിഭാഷകന്‍ പറഞ്ഞു. സൈബര്‍ ആക്രമണത്തിന് ഇരയാകുന്ന കമ്പനികള്‍ക്ക് മോചനദ്രവ്യ ചര്‍ച്ചകളില്‍ സഹായം നല്‍കുന്ന വിദഗ്ധനെന്ന നിലയിലാണ് ദുബ്രോവ്‌സ്‌കി സ്വയം പരിചയപ്പെടുത്തിയിരുന്നത്. ‘സൈബര്‍ എക്‌സ്റ്റോര്‍ഷന്‍: സ്ട്രാറ്റജിക് റെസ്‌പോണ്‍സ്’ എന്ന പുസ്തകവും അടുത്തിടെ പ്രസിദ്ധീകരിച്ചിരുന്നു.
ദുബ്രോവ്‌സ്‌കി മുമ്പ് സൈബര്‍ സുരക്ഷാ സ്ഥാപനമായ സൈപ്പറില്‍ മാനേജിങ് ഡയറക്ടറായി പ്രവര്‍ത്തിച്ചിരുന്നു. 2024ല്‍ കാനഡയിലെ ഹാമില്‍ട്ടണ്‍ നഗരത്തിലുണ്ടായ സൈബര്‍ ആക്രമണത്തില്‍നിന്ന് കരകയറാന്‍ സഹായിച്ച സ്ഥാപനമാണിത്. എന്നാല്‍ ഹാമില്‍ട്ടണ്‍ നഗരത്തിന്റെ സൈബര്‍ ആക്രമണവുമായി ബന്ധപ്പെട്ട പ്രവര്‍ത്തനങ്ങളില്‍ ദുബ്രോവ്‌സ്‌കിക്ക് പങ്കുണ്ടായിരുന്നില്ലെന്ന് കമ്പനി വ്യക്തമാക്കി. നിലവില്‍ ദുബ്രോവ്‌സ്‌കിയെ ടെക്‌സസിലേക്ക് മാറ്റാനും അവിടെ തടങ്കല്‍ സംബന്ധിച്ച ഔദ്യോഗിക വാദം കേള്‍ക്കാനും കോടതി ഉത്തരവിട്ടു.
FBI arrests Canadian cybersecurity expert for colluding with cybercriminals
