റിയാദ്: സൗദി അറേബ്യന്‍ തലസ്ഥാനമായ റിയാദിലെ അന്താരാഷ്ട്ര വിമാനത്താവളത്തിലും അരാംകോയുടെ എണ്ണ ശുദ്ധീകരണശാലയിലും രാജ്യത്തിന്റെ തെക്കന്‍ മേഖലകളിലെ വിവിധ കേന്ദ്രങ്ങളിലും ആക്രമണം നടത്തിയതായി യെമനിലെ ഇറാന്‍ പിന്തുണയുള്ള ഹൂതികള്‍.. അതേസമയം, സൗദിയുടെ നേതൃത്വത്തിലുള്ള സഖ്യസേന ചെങ്കടല്‍ തീരത്തെ ഹൂതി കേന്ദ്രങ്ങള്‍ ആക്രമിച്ച് തകര്‍ത്തതായി അറിയിച്ചു. സംഘര്‍ഷം രൂക്ഷമായതോടെ തിങ്കളാഴ്ച വൈകുന്നേരം റിയാദില്‍ ശക്തമായ സ്‌ഫോടനശബ്ദങ്ങള്‍ കേട്ടതായി റിപ്പോര്‍ട്ടുണ്ട്. ഹൂതി വക്താവ് റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളവും അരാംകോ റിഫൈനറിയും മറ്റ് കേന്ദ്രങ്ങളും ലക്ഷ്യമിട്ടതായി വ്യക്തമാക്കി.
ഹൂതി ആക്രമണങ്ങള്‍ വര്‍ധിക്കുന്ന സാഹചര്യത്തില്‍ പുതിയ പരസ്പര പ്രതിരോധ കരാറിന്റെ ഭാഗമായി സൗദി അറേബ്യയിലേക്ക് സൈനികരെ അയക്കുമെന്ന് പാകിസ്ഥാനും തുര്‍ക്കിയും പ്രഖ്യാപിച്ചു. അതേസമയം, സൗദിയും അന്താരാഷ്ട്ര അംഗീകാരമുള്ള യെമന്‍ സര്‍ക്കാരിന്റെ സഖ്യകക്ഷികളും ഹൂതികളുടെ നിയന്ത്രണത്തിലുള്ള മുഴുവന്‍ പ്രദേശങ്ങളും തിരിച്ചുപിടിക്കാനുള്ള വലിയ സൈനിക നീക്കത്തിന് തുടക്കം കുറിച്ചു. യെമന്‍ സൈന്യം 1,000 ലേറെ വ്യോമാക്രമണങ്ങള്‍ നടത്തിയതായും ഹൂതികളുടെ നിയന്ത്രണത്തിലുള്ള തലസ്ഥാനമായ സനാഅയ്‌ക്കെതിരെ ആക്രമണം ആരംഭിച്ചതായും അറിയിച്ചു. സൗദിയുടെ നേതൃത്വത്തിലുള്ള സഖ്യസേനയുടെ വക്താവ് തുര്‍ക്കി അല്‍-മാലികി, ചെങ്കടല്‍ തീരത്തെ ഹൊദൈദയില്‍ ഹൂതികളുടെ സൈനിക കേന്ദ്രങ്ങള്‍ ലക്ഷ്യമിട്ട് നാവികസേന ആക്രമണം നടത്തിയതായി അറിയിച്ചു. ആയുധശേഖരങ്ങളും സ്‌ഫോടക വസ്തുക്കള്‍ ഘടിപ്പിച്ച ബോട്ടുകള്‍ സൂക്ഷിച്ചിരുന്ന കേന്ദ്രങ്ങളും നാവിക മൈനുകളും തകര്‍ത്തതായും അദ്ദേഹം വ്യക്തമാക്കി.
ഹൂതികളുടെ നിയന്ത്രണത്തിലുള്ള യെമന്‍ പ്രദേശങ്ങള്‍ മുഴുവന്‍ തിരിച്ചുപിടിക്കുകയാണ് സര്‍ക്കാരിന്റെ ലക്ഷ്യമെന്ന് ഞായറാഴ്ച പ്രഖ്യാപിച്ചിരുന്നു. യെമന്‍ ജനസംഖ്യയുടെ ഭൂരിഭാഗവും താമസിക്കുന്ന പ്രദേശങ്ങളാണ് ഇവയില്‍ ഉള്‍പ്പെടുന്നത്. കഴിഞ്ഞ മാസം ചെങ്കടല്‍ തീരത്തിന്റെ വലിയ ഭാഗങ്ങളും എണ്ണ, ചരക്ക് കപ്പല്‍ ഗതാഗതത്തിന് നിര്‍ണായകമായ ബാബ് അല്‍-മന്ദബ് കടലിടുക്കിന് സമീപമുള്ള പ്രദേശങ്ങളും ഹൂതികള്‍ പിടിച്ചെടുത്തിരുന്നു. യെമനിലെ ആഭ്യന്തരയുദ്ധം വീണ്ടും രൂക്ഷമായതോടെ അയല്‍രാജ്യമായ സൗദി അറേബ്യക്കെതിരെയും ഹൂതികള്‍ ആക്രമണം ശക്തമാക്കിയിട്ടുണ്ട്. സൗദി കപ്പലുകള്‍ക്കെതിരെ കടല്‍ ഉപരോധവും ഹൂതികള്‍ പ്രഖ്യാപിച്ചിട്ടുണ്ട്. അതിനിടെ, സൗദി, പാകിസ്ഥാന്‍, തുര്‍ക്കി പ്രതിനിധികള്‍ റിയാദില്‍ അടിയന്തര യോഗം ചേര്‍ന്നു. ആക്രമണമുണ്ടായാല്‍ പരസ്പരം സഹായിക്കുമെന്ന് ഉറപ്പുനല്‍കുന്ന പ്രതിരോധ കരാറിന്റെ അടിസ്ഥാനത്തിലായിരുന്നു യോഗം.
ഹൂതി ആക്രമണങ്ങള്‍ സൗദിയുടെ എണ്ണ അടിസ്ഥാനസൗകര്യങ്ങളെയും ചെങ്കടലിലെ എണ്ണക്കപ്പലുകളെയും ലക്ഷ്യമിടുന്നതായി റിപ്പോര്‍ട്ടുണ്ട്. ഞായറാഴ്ച നടന്ന ആക്രമണത്തെ തുടര്‍ന്ന് ചെങ്കടലിലേക്ക് എണ്ണ എത്തിക്കുന്ന സൗദിയുടെ ഈസ്റ്റ്-വെസ്റ്റ് പൈപ്പ്ലൈന്‍ വഴിയുള്ള പമ്പിങ് വീണ്ടും തടസ്സപ്പെട്ടതായി സൗദി ഊര്‍ജ മേഖലയിലെ ഒരു വൃത്തം അറിയിച്ചു. ഹോര്‍മുസ് കടലിടുക്ക് ഇറാന്‍ തടഞ്ഞതിനെ തുടര്‍ന്ന് സൗദിയുടെ എണ്ണ കയറ്റുമതിക്ക് ഈ പൈപ്പ്ലൈന്‍ നിര്‍ണായകമായി മാറിയിരുന്നു. ഇതിനിടെ ആഗോള എണ്ണ വിപണിയിലെ സ്ഥിതി കൂടുതല്‍ ആശങ്കാജനകമാകുന്നതായി സൗദി അരാംകോ മേധാവി അമീന്‍ നാസര്‍ മുന്നറിയിപ്പ് നല്‍കി. യുദ്ധം മൂലം ആഗോള എണ്ണ ശേഖരം വളരെ താഴ്ന്ന നിലയിലാണെന്നും നിലവിലെ ആഗോള എണ്ണ വിതരണ സംവിധാനം വലിയ സമ്മര്‍ദത്തിലാണെന്നും അദ്ദേഹം പറഞ്ഞു.
Houthi attack in Saudi Arabia: Houthis claim to have attacked Riyadh airport and an Aramco refinery.
