വാഷിംഗ്ടണ്‍: വിദേശരാജ്യങ്ങളില്‍ കഴിയുന്ന അമേരിക്കന്‍ ഉദ്യോഗസ്ഥരെ ലക്ഷ്യമിട്ട് ഇറാന്‍ നടത്തുന്ന നീക്കങ്ങള്‍ ഗണ്യമായി വര്‍ധിച്ചതായി യുഎസ് രഹസ്യാന്വേഷണ വിഭാഗത്തിന്റെ വിലയിരുത്തല്‍. പശ്ചിമേഷ്യയിലും മറ്റ് ചില രാജ്യങ്ങളിലും അമേരിക്കന്‍ പൗരന്മാരെ ലക്ഷ്യമിട്ടുള്ള വലിയ ആക്രമണപദ്ധതികള്‍ ആസൂത്രണം ചെയ്യുന്നുവെന്നും ദേശീയ രഹസ്യാന്വേഷണ ഡയറക്ടര്‍ ജെയ് ക്ലേറ്റണ്‍ സ്റ്റേറ്റ് സെക്രട്ടറി മാര്‍ക്കോ റൂബിയോയ്ക്ക് അയച്ച മെമ്മോയില്‍ മുന്നറിയിപ്പ് നല്‍കി.
ഇറാന്‍ അമേരിക്കന്‍ ഉദ്യോഗസ്ഥരെ ലക്ഷ്യമിടാനുള്ള ശ്രമങ്ങള്‍ ഗണ്യമായി വര്‍ധിപ്പിച്ചതായി വിവിധ മാര്‍ഗങ്ങളിലൂടെ ലഭിച്ച രഹസ്യാന്വേഷണ വിവരങ്ങള്‍ സൂചിപ്പിക്കുന്നുവെന്ന് ഈ മാസം 23 ന് അയച്ച മെമ്മോയില്‍ ക്ലേറ്റണ്‍ വ്യക്തമാക്കി. മെമ്മോയുടെ ആധികാരികത ഒരു യുഎസ് ഉദ്യോഗസ്ഥന്‍ സ്ഥിരീകരിച്ചതായും റിപ്പോര്‍ട്ടില്‍ പറയുന്നു.
വിദേശത്തുള്ള അമേരിക്കന്‍ എംബസികളിലെ ജീവനക്കാരുടെ സുരക്ഷ സംബന്ധിച്ച് ലഭിക്കുന്ന പുതിയ വിവരങ്ങള്‍ നിരന്തരം വിലയിരുത്തുന്നുണ്ടെന്ന് യുഎസ് ഉദ്യോഗസ്ഥന്‍ വ്യക്തമാക്കി. ഹൂതി വിമതരുടെ ആക്രമണഭീഷണിയും അമേരിക്കന്‍ ഉദ്യോഗസ്ഥരെ ലക്ഷ്യമിട്ടുള്ള ഇറാന്റെ ഭീകരാക്രമണ പദ്ധതികളെക്കുറിച്ചുള്ള വിവരങ്ങളും മേഖലയിലെ നിയന്ത്രിത പ്രവര്‍ത്തനക്രമത്തില്‍ പ്രവര്‍ത്തിക്കുന്ന എംബസികളിലെ ജീവനക്കാരുടെ വിന്യാസം പുനഃക്രമീകരിക്കുന്നതിനെ സ്വാധീനിക്കുന്നുണ്ടെന്നും അദ്ദേഹം പറഞ്ഞു.
റൂബിയോയ്ക്ക് അയച്ച മെമ്മോയെക്കുറിച്ചുള്ള വിവരം ആദ്യം പുറത്തുവിട്ടത് ആക്‌സിയോസ് വാര്‍ത്താ വെബ്‌സൈറ്റാണ്. എന്നാല്‍ ഇറാന്റെ ഭാഗത്തുനിന്നുള്ളതായി പറയുന്ന പ്രത്യേക ആക്രമണപദ്ധതികളുടെ വിശദാംശങ്ങളോ ലക്ഷ്യമിടപ്പെടുന്ന ഉദ്യോഗസ്ഥരുടെ വിവരങ്ങളോ റിപ്പോര്‍ട്ടില്‍ വെളിപ്പെടുത്തിയിട്ടില്ല.
Intelligence report indicates an intensification of Iran’s efforts to target American officials abroad.
