ഹൂസ്റ്റണ്‍, (ടെക്‌സസ്): സ്റ്റാഫോര്‍ഡിലെ ഗുഡ് ഷെപ്പേര്‍ഡ് എപ്പിസ്‌കോപ്പല്‍ ഇന്ത്യന്‍ ചര്‍ച്ചിന്റെ സാമൂഹിക സേവന സംരംഭമായ ‘ബഡ്ഡീസ്’ (Buddies) സൗജന്യ സംഗീതപഠന പദ്ധതിക്ക് ലണ്ടനിലെ പ്രശസ്തമായ ട്രിനിറ്റി കോളേജ് ഓഫ് മ്യൂസിക്കിന്റെ അഫിലിയേഷന്‍ ലഭിച്ചു. കുട്ടികള്‍ക്ക് പൂര്‍ണമായും സൗജന്യമായി പിയാനോ പരിശീലനം നല്‍കുന്ന ഈ സംരംഭത്തിന് അന്താരാഷ്ട്ര സംഗീതവിദ്യാഭ്യാസ രംഗവുമായി ഔദ്യോഗിക ബന്ധം സ്ഥാപിക്കാന്‍ കഴിഞ്ഞതായി സഭാവികാരി റവ. ഡോ. റോയ് വര്‍ഗീസ് അറിയിച്ചു.
?അഞ്ചുവര്‍ഷത്തോളമായി പ്രവര്‍ത്തിക്കുന്ന ബഡ്ഡീസ് പ്രോഗ്രാമില്‍ നിലവില്‍ വിവിധ പ്രായക്കാരായ അന്‍പതോളം കുട്ടികള്‍ സൗജന്യമായി പിയാനോ അഭ്യസിക്കുന്നുണ്ട്. പുതിയ അഫിലിയേഷനിലൂടെ വിദ്യാര്‍ഥികള്‍ക്ക് ട്രിനിറ്റി കോളേജിന്റെ അംഗീകൃത സിലബസ് അനുസരിച്ച് പഠനം നടത്താനും ഗ്രേഡഡ് സംഗീതപരീക്ഷകളില്‍ പങ്കെടുക്കാനും അവസരം ലഭിക്കും. പരീക്ഷകള്‍ വിജയകരമായി പൂര്‍ത്തിയാക്കുന്നവര്‍ക്ക് അന്താരാഷ്ട്ര അംഗീകാരമുള്ള പ്രാവീണ്യ സര്‍ട്ടിഫിക്കറ്റുകള്‍ (Certificates of Proficiency) സ്വന്തമാക്കാം. ലണ്ടന്‍ ട്രിനിറ്റി കോളേജ് ഓഫ് മ്യൂസിക്കിലെ പൂര്‍വവിദ്യാര്‍ഥിയായ ആഷിക് ജോണ്‍ ആണ് പ്രോഗ്രാമിന്റെ ഡയറക്ടറും പരിശീലകനും. അദ്ദേഹത്തിന്റെ നേതൃത്വത്തില്‍ കുട്ടികള്‍ക്ക് വ്യക്തിഗത ശ്രദ്ധയും ക്രമബദ്ധമായ പരിശീലനവും നല്‍കിവരുന്നു.
?കോവിഡ് മഹാമാരിക്കാലത്തെ അടച്ചുപൂട്ടലുകളും സാമൂഹിക ഒറ്റപ്പെടലുകളും മൂലം കുട്ടികള്‍ക്ക് നഷ്ടപ്പെട്ട അവസരങ്ങള്‍ വീണ്ടെടുക്കാനും, അവരുടെ മാനസികാരോഗ്യവും സര്‍ഗാത്മക കഴിവുകളും പരിപോഷിപ്പിക്കാനും ലക്ഷ്യമിട്ടാണ് സഭ ഈ പദ്ധതിക്ക് തുടക്കം കുറിച്ചത്. സ്വകാര്യ സംഗീതപരിശീലനത്തിന് വലിയ തുക ചെലവഴിക്കേണ്ടിവരുന്ന സാഹചര്യത്തില്‍, സാമ്പത്തിക-സാമൂഹിക വ്യത്യാസങ്ങളില്ലാതെ എല്ലാ കുട്ടികള്‍ക്കും അന്താരാഷ്ട്ര നിലവാരത്തിലുള്ള സംഗീതവിദ്യാഭ്യാസം സൗജന്യമായി ലഭ്യമാക്കുന്നത് കുടുംബങ്ങള്‍ക്ക് വലിയ ആശ്വാസമാണ്. ഡിജിറ്റല്‍ ലോകത്തിന്റെ അമിതസ്വാധീനവും സമ്മര്‍ദങ്ങളും നേരിടുന്ന പുതിയ കാലഘട്ടത്തില്‍, കുട്ടികളില്‍ ഏകാഗ്രത, അച്ചടക്കം, ആത്മവിശ്വാസം, വൈകാരിക സന്തുലിതാവസ്ഥ എന്നിവ വളര്‍ത്താന്‍ സംഗീതപഠനം സഹായിക്കുന്നു എന്ന തിരിച്ചറിവിലാണ് പദ്ധതി മുന്നോട്ടുപോകുന്നത്.
?”സമൂഹത്തിന്റെ ആവശ്യങ്ങള്‍ തിരിച്ചറിഞ്ഞ് ക്രിയാത്മകമായി പ്രതികരിക്കുമ്പോഴാണ് സഭയുടെ ദൗത്യം കൂടുതല്‍ അര്‍ത്ഥവത്താകുന്നത്. കോവിഡ് കാലത്ത് ഒരു ചെറിയ സംരംഭമായി ആരംഭിച്ച പദ്ധതി ഇന്ന് അന്‍പതോളം കുട്ടികള്‍ക്ക് സൗജന്യ സംഗീതവിദ്യാഭ്യാസം നല്‍കുന്ന നിലയിലേക്ക് വളര്‍ന്നു. ട്രിനിറ്റി കോളേജുമായുള്ള അഫിലിയേഷന്‍ ഈ കുട്ടികളുടെ കഴിവുകള്‍ക്ക് അന്താരാഷ്ട്ര അംഗീകാരം നേടാനുള്ള പുതിയ വാതിലുകള്‍ തുറക്കുകയാണ്,” റവ. ഡോ. റോയ് വര്‍ഗീസ് വ്യക്തമാക്കി.
ആരാധനയിലും ആത്മീയ പ്രവര്‍ത്തനങ്ങളിലും മാത്രം ഒതുങ്ങാതെ സമൂഹത്തിന്റെ വിദ്യാഭ്യാസപരവും സാംസ്‌കാരികവുമായ ആവശ്യങ്ങളോട് ചേര്‍ന്നുനില്‍ക്കുക എന്നതാണ് സഭയുടെ ലക്ഷ്യമെന്നും അദ്ദേഹം കൂട്ടിച്ചേര്‍ത്തു.
?അമേരിക്കയിലെ ആംഗ്ലിക്കന്‍ കമ്മ്യൂണിയന്റെ അംഗസഭയായ ദി എപ്പിസ്‌കോപ്പല്‍ ചര്‍ച്ചിന്റെ ടെക്‌സസ് രൂപതയില്‍പ്പെട്ട ഇന്ത്യന്‍ സഭാസമൂഹമാണ് സ്റ്റാഫോര്‍ഡിലെ ഗുഡ് ഷെപ്പേര്‍ഡ് എപ്പിസ്‌കോപ്പല്‍ ഇന്ത്യന്‍ ചര്‍ച്ച്. ഇന്ത്യയിലെ സി.എസ്.ഐ (CSI), സി.എന്‍.ഐ (CNI) സഭകള്‍ ഉള്‍പ്പെടുന്ന ആംഗ്ലിക്കന്‍ കൂട്ടായ്മയുടെ ഭാഗമായ എപ്പിസ്‌കോപ്പല്‍ ചര്‍ച്ച്, മലങ്കര മാര്‍ത്തോമ്മാ സുറിയാനി സഭയുമായി പൂര്‍ണ സഭാസഹവര്‍ത്തിത്വബന്ധവും (Full Communion) പുലര്‍ത്തുന്നുണ്ട്.
International Recognition for Free Piano Training: Trinity College London Affiliation for the ‘Buddies’ Music Education Program at Houston Good Shepherd Episcopal Indian Church
