വാഷിംഗ്ടൺ: 2009-ൽ ടെക്സാസിലെ ഫോർട്ട് ഹൂഡ് സൈനിക താവളത്തിൽ 13 പേരെ വെടിവച്ചുകൊന്ന കേസിൽ ശിക്ഷിക്കപ്പെട്ട മുൻ യുഎസ് ആർമി മേജർ നിഡാൽ ഹസന്റെ വധശിക്ഷ തത്സമയം സംപ്രേഷണം ചെയ്യാനുള്ള പെന്റഗൺ നീക്കത്തിനെതിരെ യുഎസിൽ കടുത്ത പ്രതിഷേധം ഉയരുന്നു. ഫയറിംഗ് സ്ക്വാഡ് ഉപയോഗിച്ചുള്ള വധശിക്ഷ പരസ്യമായി സംപ്രേഷണം ചെയ്യുന്നത് ഭീകരപ്രവർത്തനങ്ങൾക്ക് പ്രോത്സാഹനമാകുമെന്നും കുറ്റവാളിക്ക് രക്തസാക്ഷിത്വ പരിവേഷം നൽകുമെന്നും രാജ്യത്തെ പ്രമുഖ ജനപ്രതിനിധികളും സുരക്ഷാ വിദഗ്ദ്ധരും മുന്നറിയിപ്പ് നൽകി.
വരുന്ന ഡിസംബർ മൂന്നിന് നടക്കാനിരിക്കുന്ന വധശിക്ഷ തത്സമയം സംപ്രേഷണം ചെയ്യുമെന്ന് യുഎസ് പ്രതിരോധ സെക്രട്ടറി പീറ്റ് ഹെഗ്സെത്താണ് അറിയിച്ചത്. ഇത്തരം ഗുരുതരമായ കുറ്റകൃത്യങ്ങൾക്ക് കടുത്ത പ്രത്യാഘാതങ്ങൾ ഉണ്ടാകുമെന്ന് പൊതുജനങ്ങളെ ബോധ്യപ്പെടുത്താനാണ് ഈ തീരുമാനമെന്ന് അദ്ദേഹം വ്യക്തമാക്കി. പ്രതിരോധ സെക്രട്ടറിയുടെ ശുപാർശയ്ക്ക് പ്രസിഡന്റ് ഡൊണാൾഡ് ട്രംപ് അംഗീകാരം നൽകുകയും ഫയറിംഗ് സ്ക്വാഡിലൂടെയുള്ള വധശിക്ഷ അയാൾ അർഹിക്കുന്നുണ്ടെന്ന് പ്രതികരിക്കുകയും ചെയ്തു.
എന്നാൽ, പെന്റഗണിന്റെയും ഭരണകൂടത്തിന്റെയും ഈ നിലപാടിനെതിരെ ഡെമോക്രാറ്റിക്, റിപ്പബ്ലിക്കൻ പാർട്ടികളിൽ നിന്ന് ഒരുപോലെ വിമർശനം ഉയർന്നിട്ടുണ്ട്. തീരുമാനം അങ്ങേയറ്റം അറപ്പുളവാക്കുന്നതാണെന്ന് വിശേഷിപ്പിച്ച റിപ്പബ്ലിക്കൻ സെനറ്റർ തോം ടില്ലിസ്, ഇത്തരം പരസ്യ വധശിക്ഷകൾ ഇറാന്റെയും അഫ്ഗാനിസ്ഥാന്റെയും സ്വേച്ഛാധിപത്യ ഭരണാധികാരികളാണ് നടപ്പാക്കാറുള്ളതെന്നും അമേരിക്കയിൽ ഇത് സംഭവിക്കാൻ പാടില്ലെന്നും തുറന്നടിച്ചു. വധശിക്ഷ തത്സമയം കാണിക്കുന്നത് പ്രാകൃതമാണെന്നും ഭീകര സംഘടനയായ ഐഎസ്ഐഎസ് നടത്തുന്ന കൊലപാതകങ്ങളെ അമേരിക്ക അനുകരിക്കുകയാണോ എന്നും ഡെമോക്രാറ്റിക് സെനറ്റർ ക്രിസ് മർഫി ചോദിച്ചു.
വധശിക്ഷയെ പിന്തുണയ്ക്കുന്നുണ്ടെങ്കിലും അത് ലൈവ് ആയി കാണിക്കുന്നത് ജിഹാദികളുടെ രീതിയാണെന്ന് റിപ്പബ്ലിക്കൻ ജനപ്രതിനിധി ഓസ്റ്റിൻ സ്കോട്ടും പ്രതികരിച്ചു.
അക്രമങ്ങളെ പരസ്യമായി ദൃശ്യവൽക്കരിക്കുന്നത് കൂടുതൽ തീവ്രവാദികളെ സൃഷ്ടിക്കാൻ മാത്രമേ ഉപകരിക്കൂ എന്ന് മുൻ നയതന്ത്ര ഉദ്യോഗസ്ഥനായ നെഡ് പ്രൈസ് ചൂണ്ടിക്കാട്ടി. നിഡാൽ ഹസൻ വീൽചെയറിലിരിക്കുന്ന വ്യക്തിയാണെന്നും, ഫയറിംഗ് സ്ക്വാഡ് അയാളെ വെടിവച്ചുകൊല്ലുന്ന ദൃശ്യങ്ങൾ കുറ്റവാളിയോട് സഹതാപം വളർത്താനും മധ്യപൂർവേഷ്യൻ രാജ്യങ്ങളിൽ കൂടുതൽ ഭീകരവാദികൾക്ക് പ്രചോദനമാകാനും ഇടയാക്കുമെന്ന് കൺസർവേറ്റീവുകളും ആശങ്ക പ്രകടിപ്പിക്കുന്നു.
പെന്റഗണിന്റെ ഈ തീരുമാനം മരണ സംസ്കാരത്തിന്റെ ക്രൂരമായ പ്രോത്സാഹനമാണെന്നും ഇത് പുനഃപരിശോധിക്കണമെന്നും യുഎസ് കത്തോലിക്കാ മെത്രാൻ സമിതി അധ്യക്ഷൻ ആർച്ച്ബിഷപ്പ് പോൾ എസ്. കോക്ലിയും ആവശ്യപ്പെട്ടു.
അതേസമയം, 2009-ലെ വെടിവയ്പ്പിൽ ഏഴ് തവണ വെടിയേറ്റിട്ടും ജീവൻ തിരിച്ചുകിട്ടിയ മുൻ സൈനികൻ അലോൻസോ ലൺസ്ഫോർഡ് വധശിക്ഷ നേരിട്ട് കാണാൻ താൻ ഉണ്ടാകുമെന്ന് വ്യക്തമാക്കിയെങ്കിലും പൊതുജനങ്ങൾക്കായി ഇത് സംപ്രേഷണം ചെയ്യുന്നതിനോട് വിയോജിപ്പ് പ്രകടിപ്പിച്ചു. ഇത് ആളുകൾക്ക് വിനോദത്തിനുള്ള ഒന്നല്ലെന്ന് അദ്ദേഹം ഓർമ്മിപ്പിച്ചു. വധശിക്ഷയെ ഒരു പൊതു പ്രദർശനമാക്കുന്നത് യുഎസ് ഉപേക്ഷിച്ച പഴയകാല പ്രാകൃത രീതികളിലേക്ക് തിരിച്ചുപോകുന്നതിന് തുല്യമാണെന്നാണ് നിയമ വിദഗ്ദ്ധരും അഭിപ്രായപ്പെടുന്നത്. 1936-ൽ കെന്റക്കിയിൽ റേണി ബെഥിയ എന്നയാളെ തൂക്കിലേറ്റിയതാണ് അമേരിക്കൻ ചരിത്രത്തിൽ ഇതിന് മുൻപ് നടന്ന അവസാനത്തെ പരസ്യ വധശിക്ഷ.
