ന്യൂഡൽഹി: ഫ്ലൈ ദുബായ് വിമാനത്തിൽ സഹപൈലറ്റിന്റെ ആക്രമണത്തിൽ നിന്ന് 174 യാത്രക്കാരുടെ ജീവൻ സാഹസികമായി രക്ഷിച്ച മലയാളി പൈലറ്റ് ക്യാപ്റ്റൻ സ്മിത്ത് മച്ചാറുമായി പ്രധാനമന്ത്രി നരേന്ദ്ര മോദി വീഡിയോ കോളിലൂടെ സംസാരിച്ചു. ആക്രമണത്തിൽ പരിക്കേറ്റ് ആശുപത്രിയിൽ ചികിത്സയിൽ കഴിയുന്ന സ്മിത്തുമായി സംസാരിച്ച പ്രധാനമന്ത്രി, അദ്ദേഹത്തിന്റെ സമാനതകളില്ലാത്ത ധീരതയെ വാനോളം പ്രശംസിച്ചു. മറ്റുള്ളവരുടെ ജീവനെടുക്കുന്നവരല്ല, മറിച്ച് സ്വന്തം ജീവൻ പണയം വെച്ചും അത് സംരക്ഷിക്കുന്നവരാണ് ഇന്ത്യക്കാരെന്ന് ലോകത്തിന് മുന്നിൽ തെളിയിക്കാൻ സ്മിത്തിന്റെ ഈ പ്രവർത്തിയിലൂടെ സാധിച്ചതായി പ്രധാനമന്ത്രി പറഞ്ഞു. സ്മിത്തിന്റെ ആരോഗ്യം വേഗത്തിൽ മെച്ചപ്പെടുന്നുണ്ടെന്ന് ഡോക്ടർമാർ അറിയിച്ചു.
മരണത്തെ മുഖാമുഖം കണ്ട ആ ഭീതിജനകമായ നിമിഷങ്ങളും പ്രാർത്ഥന നൽകിയ കരുത്തും സ്മിത്ത് മച്ചാർ ആശുപത്രി കിടക്കയിൽ നിന്ന് പ്രധാനമന്ത്രിയോട് വിശദീകരിച്ചു. കത്തികുത്തേറ്റുള്ള കഠിനമായ വേദനയിലും കോക്ക്പിറ്റിന്റെ വാതിൽ അടയ്ക്കാതെ സഹപൈലറ്റിന്റെ ക്രൂരതയിൽ നിന്ന് വിമാനം സുരക്ഷിതമായി നിലത്തിറക്കാൻ സ്മിത്തിന് കഴിഞ്ഞത് വൻ ദുരന്തമാണ് ഒഴിവാക്കിയത്. പ്രധാനമന്ത്രിയുമായി നേരിട്ട് സംസാരിക്കാൻ സാധിച്ചത് വലിയ ആശ്വാസവും സന്തോഷവും നൽകുന്നുവെന്ന് സ്മിത്ത് വികാരഭരിതനായി പറഞ്ഞു.
കഴിഞ്ഞ ദിവസം സ്മിത്തിന്റെ കുടുംബാംഗങ്ങളുമായി സംസാരിച്ച പ്രധാനമന്ത്രി, ആവശ്യമായ എല്ലാ നയതന്ത്ര സഹായങ്ങളും അടിയന്തരമായി ലഭ്യമാക്കാൻ ഉദ്യോഗസ്ഥർക്ക് നിർദ്ദേശം നൽകിയിരുന്നു. സ്മിത്ത് മച്ചാർ ഇന്ത്യയുടെ യഥാർത്ഥ ഹീറോയാണെന്ന് വിശേഷിപ്പിച്ച പ്രധാനമന്ത്രി, അദ്ദേഹത്തിന്റെ കുടുംബത്തിന് എല്ലാവിധ പിന്തുണയും വാഗ്ദാനം ചെയ്തിട്ടുണ്ട്. സ്മിത്തിന്റെ ധീരമായ ഇടപെടലിനെ അന്താരാഷ്ട്ര തലത്തിലും പ്രവാസി സമൂഹത്തിനിടയിലും വലിയ ആദരവോടെയാണ് കാണുന്നത്.
