വത്തിക്കാന്‍സിറ്റി: ശ്വാസകോശ അര്‍ബുദത്തെത്തുടര്‍ന്ന് ശസ്ത്രക്രിയയ്ക്ക് വിധേയനായ ലിയോ പതിനാലാമന്‍ മാര്‍പാപ്പ ഔദ്യോഗിക ജോലികളില്‍ വീണ്ടും സജീവമായതായി വത്തിക്കാന്‍ അറിയിച്ചു. ശസ്ത്രക്രിയ കഴിഞ്ഞ് ദിവസങ്ങള്‍ക്കുള്ളിലാണ് മാര്‍പാപ്പ ജോലികള്‍ പുനരാരംഭിച്ചത്. 71 കാരനായ പോപ്പിന്റെ വലതു ശ്വാസകോശത്തിന്റെ താഴത്തെ ഭാഗം നീക്കംചെയ്യുന്നതിനുള്ള ശസ്ത്രക്രിയയാണ് ഈ ആഴ്ച നടത്തിയത്. വ്യാഴാഴ്ച ഉച്ചയോടെ അദ്ദേഹം വീണ്ടും കുര്‍ബാനയില്‍ സഹകാര്‍മികത്വം വഹിച്ചതായും വത്തിക്കാന്‍ പ്രസ് ഓഫീസ് പ്രസ്താവനയില്‍ വ്യക്തമാക്കി.
ശസ്ത്രക്രിയയ്ക്കുശേഷം റോമിലെ അഗോസ്റ്റിനോ ജെമെല്ലി സര്‍വകലാശാലാ ആശുപത്രിയില്‍ ചികിത്സയില്‍ കഴിയുന്ന പോപ്പ് ലിയോയുടെ ആരോഗ്യനില തൃപ്തികരമാണെന്നാണ് റിപ്പോര്‍ട്ട്. വ്യാഴാഴ്ച ആശുപത്രിയില്‍ അദ്ദേഹം സുഖമായി ഉറങ്ങിയെന്നും രാവിലെ എഴുന്നേറ്റ് പ്രഭാതഭക്ഷണം കഴിച്ചെന്നും വത്തിക്കാന്‍ നേരത്തെ അറിയിച്ചിരുന്നു. അന്നുതന്നെ വൈകുന്നേരം വത്തിക്കാന്‍ സ്റ്റേറ്റ് സെക്രട്ടേറിയറ്റിലെ ഡെപ്യൂട്ടി മോണ്‍സിഞ്ഞോര്‍ പൗലോ റുഡെല്ലിയുമായി അദ്ദേഹം കൂടിക്കാഴ്ച നടത്തുകയും ചെയ്തു. പോപ്പിന്റെ ആശുപത്രിവാസവും തുടര്‍പരിചരണവും ഒരാഴ്ചയോളം നീളുമെന്നാണ് പ്രതീക്ഷിക്കുന്നത്.
ശസ്ത്രക്രിയയ്ക്കുശേഷം നടത്തിയ രക്തപരിശോധനയുടെയും നെഞ്ചിന്റെ എക്‌സ്-റേയുടെയും ഫലങ്ങള്‍ സാധാരണ നിലയിലാണെന്ന് വത്തിക്കാന്‍ അറിയിച്ചു. ശസ്ത്രക്രിയയ്ക്കുശേഷമുള്ള ആരോഗ്യവീണ്ടെടുപ്പ് പ്രതീക്ഷിച്ച രീതിയില്‍ മുന്നോട്ടുപോകുകയാണെന്നും അധികൃതര്‍ വ്യക്തമാക്കി. ശ്വാസകോശത്തിന്റെ പ്രവര്‍ത്തനം മെച്ചപ്പെടുത്തുന്നതിനുള്ള ഫിസിയോതെറാപ്പിയും പോപ്പ് നടത്തുന്നുണ്ട്. ഭക്ഷണം പതിവായി കഴിക്കുന്ന അദ്ദേഹം ആശുപത്രിയിലെ മുറിയില്‍ നടക്കുകയും ചെയ്യുന്നുണ്ട്. ശസ്ത്രക്രിയ വിജയകരമായിരുന്നുവെന്നും സങ്കീര്‍ണതകളൊന്നും ഉണ്ടായില്ലെന്നും ഡോക്ടര്‍മാര്‍ അറിയിച്ചതായി റിപ്പോര്‍ട്ടില്‍ പറയുന്നു.
ശ്വാസകോശത്തിലെ കോശങ്ങളില്‍ ആരംഭിക്കുന്ന അഡിനോകാര്‍സിനോമ എന്ന അര്‍ബുദമാണ് പോപ്പിന് സ്ഥിരീകരിച്ചത്. ശ്വാസകോശ അര്‍ബുദങ്ങളില്‍ ഏറ്റവും സാധാരണമായ നോണ്‍-സ്‌മോള്‍ സെല്‍ വിഭാഗത്തില്‍പ്പെടുന്ന രോഗമാണിത്. ശ്വാസകോശത്തിന്റെ ഉപരിതലത്തിലുള്ള മ്യൂക്കസ് ഉല്‍പാദിപ്പിക്കുന്ന കോശങ്ങളിലാണ് സാധാരണയായി ഈ അര്‍ബുദം ആരംഭിക്കുന്നതെന്ന് അമേരിക്കന്‍ കാന്‍സര്‍ സൊസൈറ്റി വ്യക്തമാക്കുന്നു. പോപ്പിനെ ഓപ്പറേഷന്‍ തിയറ്ററില്‍ ഏകദേശം മൂന്ന് മണിക്കൂര്‍ പാര്‍പ്പിച്ചിരുന്നുവെന്നും ശസ്ത്രക്രിയയ്ക്ക് മാത്രം 90 മിനിറ്റോളം വേണ്ടിവന്നുവെന്നും ഡോക്ടര്‍മാര്‍ അറിയിച്ചു.
Pope Leo XIV resumes active duties following lung surgery; serves as a co-celebrant at Holy Mass.
